ރާއްޖޭން ވިއްކި 200 މިލިޔަން ޑޮލަރުގެ ބޮންޑަށް އިންޓަނޭޝަނަލް އެވޯޑެއް

ސަރުކާރުގެ ބައެއް މަޝްރޫއުތަކަށް ބޭނުންވާ ފައިސާ ހޯދުމަށް، ސިންގަޕޫރުގެ ސްޓޮކް އެކްސްޗޭންޖްގައި ލިސްޓްކޮށްގެން ވިއްކި 200 މިލިޔަން ޑޮލަރުގެ ސޮވެރިން ބޮންޑަށް އިންޓަނޭޝަނަލް އެވޯޑެއް ލިބިއްޖެ އެވެ.

ފަސް އަހަރުގެ ތެރޭގައި އަނބުރާ ދައްކަން ފަށަން ޖެހޭ ގޮތަށް ވިއްކި ބޮންޑަށް ލިބުނީ، ދަ އެސެޓް މެގަޒިން އިން ދޭ ޝަރަފްވެރި އެވޯޑެއް ކަމަށްވާ "ޓްރިޕަލް އޭ ކަންޓްރީ" އެވޯޑެވެ. ފިނޭންސް މިނިސްޓްރީން ނެރުނު ބަޔާނެއްގައި ބުނެފައިވަނީ މި އެވޯޑާ އެކު، އެ ބޮންޑަށް އިތުރު ކާމިޔާބީއެއް ލިބިފައިވާ ކަމަށެވެ.

"މި އެވޯޑާއި އެކު ސައުތު އޭޝިޔާގެ އެންމެ ރަނގަޅު އިންވެސްޓްމަންޓްތަކުގެ ތެރޭގައި މި ބޮންޑް ވަނީ ހިމެނިގެން ގޮސްފައި،" މި މަހުގެ 17 ވަނަ ދުވަހު ހޮންކޮންގްގައި ދިން އެވޯޑާ ގުޅޭ ގޮތުން ފިނޭންސް މިނިސްޓްރީން ނެރުނު ބަޔާނުގައި ބުނެފައިވެ އެވެ.

ހަތް ޕަސެންޓްގެ ކޫޕަން ރޭޓެއް، މިދިޔަ އަހަރުގެ މެއި މަހު ވިއްކާލި ބޮންޑް ގަތުމަށް އިންވެސްޓަރުން ޝައުގުވެރިކަން ބޮޑުވެ، 400 މިލިޔަން ޑޮލަރަށް ވުރެ ބޮޑު އަގުތަކެއް ހުށަހެޅިގެން ދިޔަ ކަމަށް ފިނޭންސް މިނިސްޓްރީން ވަނީ ބުނެފަ އެވެ.

ރާއްޖޭން ފުރަތަމަ ފަހަރަށް ބޭރުގައި ވިއްކި ބޮންޑަށް ލިބިފައިވާ އެވޯޑަކީ ފައިނޭންޝަލް އެކްސަލެންސްގެ ދާއިރާ އިން، މީގެ 19 އަހަރު ކުރިން ފެށިގެން ދެމުން އަންނަ، ޝަރަފްވެރި އެއް އެވޯޑެވެ.