ދުވާފަރުގައި އަންހެނަކު ރޭޕްކުރި މައްސަލައިގައި ފަސް މީހަކު ހައްޔަރުކޮށްފި

ރ. ދުވާފަރުގައި މިދިޔަ ބުރާސްފަތިދުވަހުގެ ރޭ ދަންވަރު 25 އަހަރުގެ އަންހެނަކު ރޭޕްކުރި މައްސަލައިގައި ފަސް މީހަކު ހައްޔަރުކޮށްފި އެވެ.

ފުލުހުންގެ މީޑިއާ އޮފިޝަލަކު މިއަދު ވިދާޅުވީއެފަދަ މައްސަލައެއް ހުށަހަޅައި ތަހުގީގުކުރަމުން އަންނަ ކަމަށެވެ. އިތުރު ތަފްސީލެއް ނުދެއްވަ އެވެ.

އެނގިފައިވާ ގޮތުގައި، ކައިވެނިކޮށްގެން ދުވާފަރުގައި ދިރިއުޅެމުން އަންނަ އަންހެން މީހާ ރޭޕްކުރީ، ބުރާސްފަތި ދުވަހުގެ ރޭ ދަންވަރު ގްރޫޕަކުން އޭނާ ދިރިއުޅޭ ގޭގަ އެވެ. އޭރު އެރޭ އޭނާގެ ފިރިމީހާ ހުރީ ބޮޑު ކަންނެލީގެ މަސްވެރިކަމަށް ގޮހެވެ.

އެ ރަށުން ވާހަކަ ދެއްކި ބައެއް މީހުން ބުނިގޮތުގައި، އަންހެންމީހާ ދިރިއުޅެނީ ފިރިމީހާގެ އާއިލާގެ ބައެއް މީހުންނާ އެކުގަ އެވެ. އެކަމަކު، އަންހެންމީހާއާ މެދު އަނިޔާވެރި އަމަލެއް ހިންގިކަން އެ ގޭގެ މީހުންނަށް އެނގުނީ، އެ ގްރޫޕު ދިޔަ ފަހުން ކަމަށް ވެސް ވެ އެވެ.

އަންހެންމީހާ ރޭޕްކުރުމުގައި ބައިވެރިވި ކަމަށް ތުހުމަތު ކުރެވޭ ފަސް މީހުން އެ އަތޮޅު އުނގޫފާރު ޕޮލިސް ސްޓޭޝަނަށް ގެންގޮސް، އެ ރަށުގެ ކޯޓުން ވަނީ އެ މީހުންގެ ބަންދަށް ހަފުތާއަކަށް ވުރެ ގިނަ ދުވަސް ޖަހައިފަ އެވެ. އޭގެ ތެރޭގައި 18 އަހަރު ނުފުރޭ ކުއްޖަކު ހިމެނޭތީ، އޭނާ ވަނީ ގޭބަންދަށް ބަދަލުކޮށްފަ އެވެ.

އެ ހާދިސާއާ ގުޅިގެން އަންހެން ކުއްޖާ ވަނީ ދުވާފަރު ދޫކޮށް، އޭނާގެ އަމިއްލަ ރަށަށް ބަދަލުވެފަ އެވެ.

މި މަހުގެ ކުރީކޮޅު މާލޭގައި ވެސް އަންހެނަކު ރޭޕްކޮށްލި މައްްސަލައެއް ފެންމަތިވެ ފުލުހުން ވަނީ ތަހުގީގު ފަށައިފަ އެވެ. އެ މައްސަލާގައި 34 އަހަރުގެ ފިރިހެނަކު ވަނީ ހައްޔަރުކޮށްފަ އެވެ. އަދި ލ. ކަލައިދޫގައި އުމުރުން 18 އަހަރު ނުފުރޭ އަންހެން ކުއްޖަކު ރޭޕުކޮށް، ބަރަހަނާ ފޮޓޯތަކެއް ލީކުކޮށްލާނެ ކަމަށް ބުނެ ބިރުދައްކަމުން އައި މައްސަލައެއް ވެސް ފުލުހުން އަންނަނީ ތަހުގީގުކުރަމުންނެވެ.