ފަސް ފިރިހެނަކު ވެގެން ސަފާރީއެއްގައި ޓޫރިސްޓަކު ރޭޕްކުރި ކަމަށް ބުނާ މައްސަލައެއް ބަލަނީ

ފަސް ފިރިހެނަކު ވެގެން ސަފާރީއެއްގެ ތެރޭގައި އަންހެން ޓޫރިސްޓަކު ރޭޕްކުރި ކަމަށް ބުނާ ވާހަކަތަކެއް ސޯޝަލް މީޑިއާގައި އާންމުވުމާ ގުޅިގެން އެކަމާ ގުޅޭ ގޮތުން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން މިއަދު ބުނެފި އެވެ.

ފުލުހުން ބުނީ، ސަފާރީއެއްގައި ޓޫރިސްޓަކު ރޭޕްކުރި މައްސަލައެއް އެ އިދާރާ އަށް ލިބިފައި ނުވާ ކަމަށެވެ. އެކަމަކު، އެފަދަ މައްސަލަ ފުލުހުންގެ ސަމާލުކަމަށް އައުމާ ގުޅިގެން ބަލަން ޖެހޭ ކަންކަން މިހާރު ބަލަމުން އަންނަ ކަމަށް ފުލުހުން ބުންޏެވެ.

ސަފާރީއެއްގައި ޓޫރިސްޓަކު ރޭޕްކުރި ކަމަށް ބުނާ ވާހަކަ ދެއްކީ ރާއްޖޭގައި އުޅޭ ބިދޭސީންގެ ޕްރައިވެޓް ފޭސްބުކް ގްރޫޕެއްގަ އެވެ. އެ ގްރޫޕްގައި ހުރި ބައެއް މެސެޖުތަކުގެ ސްކްރީންޝޮޓްތައް ވަނީ ސޯޝަލް މީޑިއާގައި އާންމުންވެފަ އެވެ.

އެ މައްސަލައާ ގުޅޭ ގޮތުން ފޭސްބުކް ގްރޫޕުގައި ލިޔުނީ ވެސް ބިދޭސީ އަންހެނެކެވެ. އޭނާ ބުނި ގޮތުގައި، އޭނާ އާއި އޭނާގެ ރައްޓެއްސަކު ހުޅުމާލޭ މަގުމަަތީގައި ދަންވަރު މަޑުކޮށްގެން ތިއްބާ އަންހެނަކު ދުވަމުން އަންނަ ތަން ފެނުނެވެ. އެ އަންހެން މީހާ ދުވަމުން ގޮސް، އެ މީހުންނާ އަރާ ހަމަކޮށް މަޑުކުރުމުން، އޭނާ އެހީއަށް ބޭނުންވެފައި ހުރިހެން ހީވެގެން އެހީތެރިކަން ދޭން މަސައްކަތް ކުރި އެވެ.

"އޭނާ ގައިގައި ޒަހަމްތަކެއް ހުރި ތަން ވެސް އަހަރެންގެ އެކުވެރިޔާ އަށް ފެނުނު،" އެ ޕޯސްޓުގައި ލިޔެފައިވެ އެވެ.

"ވާހަކަ ދައްކަމުން އޭނާ ރޯން ފެށުމުން އެނގުނީ އޭނާ ރޭޕްކުރި ކަން. އޭނާ ބުނި ގޮތުގައި ފަސް ފިރިހެނުން ވެގެން އެކަން ކުރީ."

އަންހެން މީހާއާ ހަވާލާދީ އެ ޕޯސްޓުގައި ލިޔެފައިވާ ގޮތުގައި، އޭނާ ރޭޕްކުރީ މަސްތުވާތަކެތި ދިނުމަށް ފަހު އެވެ. އަންހެން މީހާގެ އަތުގައި ހުރި ފައިސާތައް އަތުލައި، އޭނާ މޫދަށް އެއްލާލަފާނެ ކަމުގެ ބިރު ވެސް އޮތް ކަމަށް ބުނެފައިވެ އެވެ.