ކޭތަހިފުމުން މާބަނޑުމީހުންނަށް ލިބޭނެ ވަކި ގެއްލުމެއް ނެތް

ކޭތަ ހިފާފައި ހުންނަ ވަގުތުތަކުގައި މާ ބަނޑުމީހުން އެއްވެސް މަސައްކަތެއް ކުރާކަށް ނުވާނެ ކަމަށް ވަރަށް ކުރީ ޒަމާނުއްސުރެ ބައެއް މީހުން ގަބޫލުކުރެ އެވެ. އެކަމަކު އެއީ ހަމައެކަނި ވަހުމެއްގެ މައްޗަށް ކުރާ ކަމެކެވެ. ސައިންޓިފިކް ގޮތުން ބަލާއިރު އޭގައި އަސްލެއް އޮވެދާނެ ކަމަށް ބެލެވިފައިވަނީ ވަރަށް މަދު ކަމެއްގަ އެވެ.

ކޭތަ ހިފުމުން ބައެއް މީހުން މާބަނޑު އަންހެނުން ލައްވާ އެއްވެސް ކަމެއް ނުކުރުވަން ބާރުއަޅަ އެވެ. އަދި ކޭތަ ހިފާފައި ހުންނަ ވަގުތު ބަސްނާހާ ދަރިންގެ ގައިގައި ތަޅައިގެން އެ ކުދިން ބަސް އަހާ ކަމަށް ވެސް ބައެއް މީހުން ބުނެ އުޅެ އެވެ.

މާބަނޑު މީހުންނާއި ކޭތައާ ހުރި ގުޅުމަކީ ކޮބައި ހެއްޔެވެ؟ ކޭތަ ނުވީއްލަނީސް ބޭރަށް ނުނިކުތުމަށް ވަރަށް ގިނަ މީހުން މާބަނޑު މީހުންނަށް ނަސޭހަތް ދެ އެވެ. އަދި ކޭތަ ހިފާފައި ހުންނަ ވަގުތު ކައްކާ ކައި ނުހެދުމަށް ވެސް އިރުޝާދު ދެ އެވެ. އެހެން ބުނަނީ ބަނޑުގައި އޮންނަ ދަރިފުޅުގެ އައިބެއް ލާފާނެތީ އެވެ.

ފެންވަރަން ވެސް ޖެހެނީ ކޭތަ ވީއްލީމަ އެވެ. މާބަނޑުމީހެއް ނަމަ ކޭތަ ހިފުމަށް ފަހު އޮންނަން ޖެހޭނީ އެނދުގައި އަރާމުކުރާށެވެ. ވަކިން ޚާއްސަކޮށް ތޫނު އެއްޗެތީގެ ތެރޭގައި ހިމެނޭ ވަޅި، ކަތުރު ފަދަ އެއްޗެތި ބޭނުންކުރުން އޮންނަނީ މުޅިން މަނާވެފަ އެވެ. ބަނޑުގައި އޮތް ދަރިފުޅުގެ ތުންފަތް ފެޅި އައިބު ވެދާނެތީ އެވެ. ނުވަތަ ކުއްޖާގެ ގައިގައި އުފަން ލަފެއް އިނދެދާނެތީ އެވެ.

އެކި ގައުމުތަކުގެ ތަފާތު ސަގާފަތްތަކުގައި މިކަމާ މެދު ދެކޭ ގޮތް ވެސް ތަފާތެވެ. އިންޑިއާގައި ކޭތައާ މެދު ދެކެނީ ވަރަށް ސުންޕާ ކަމެއްގެ ގޮތުގަ އެވެ. އެއީ މާބަނޑުމީހުންނަށް ގެއްލުން ހުރި ކަމެއްގެ ގޮތުގައި ބަލަ އެވެ. ނަމަވެސް އެ ގޮތަށް ގަބޫލުނުކުރާ ސަގާފަތްތައް ހިމެނޭ ގައުމުތައް ވެސް ދުނިޔޭގައި ބައިވަރެވެ.

އެއިން އެއްވެސް ކަމެއް ސައިންސްގެ ދާއިރާ އިން ސާބިތެއްނުވެ އެވެ. ނަމަވެސް ކޭތައިގެ ގެއްލުން އިންސާނުންނަށް ލިބޭ ކަންތައްތަކެއް ފާހަގަކުރެވެ އެވެ. އެއީ ހަމައެކަނި މާބަނޑު މީހުންނަކަށް ނޫނެކެވެ. ހުރިހާ އެންމެންނަށެވެ.

ފޯޓީސް ހޮސްޕިޓަލުގެ އަންހެނުންގެ ޚާއްސަ ޑޮކްޓަރެއް ކަމަށްވާ ނީމާ ޝަރުމާ ވިދާޅުވީ ކޭތަ ހިފުމާ ގުޅިގެން މާބަނޑު މީހުން ނޫނަސް އެންމެންނަށް ވެސް ދިމާވާނެ މައްސަލަތަކެއް އެބަ ހުއްޓެވެ. އެއީ އިރުކޭތަ ހިފާފައި ހުންނަ ވަގުތު ހަމަ ލޮލުން އިރަށް ބެލުން ފަދަ ކަންކަމެވެ. ހަމަ ލޮލުން އިރުކޭތަށް ބަލައިފި ނަމަ ރެޓިނާ ހަލާކުވުން އޮންނާނީ ވަރަށް ގާތުގަ އެވެ. އިރުން ފޮނުވާ ރޭޑިއޭޝަނުން ލޯ ހިމާޔަތް ނުވާނެތީ އެވެ.

ކޭތަ ހިފާފައި ހުންނަ ވަގުތު ބޭރަށް ނުކުތުމާއި ކައިބޮއި ހެދުމުން ލިބިދާނެ ގެއްލުމަކީ މައިކްރޯބްސް އާއި ޖާމްސް އިން ދިފާއުނުވުމެވެ. އަވީގެ ސަބަބުން އޭގެ ބައެއް އެއްޗެހި މަރުވެ، ހަލާކުވެ އެވެ. ނަމަވެސް ކޭތަ ހިފުމުން ބިމަށް އަވި ނުލިބި ޓެމްޕްރޭޗާ ދަށަށް ގޮސް މައިކްރޯބްސް އާއި ބެކްޓީރިއާ އަދި ޖާމްސް އުފެދޭ މިންވަރު އިތުރުވެ އެވެ.

ކޭތަ ހިފާފައި ހުންނަނީ ކުޑަ ވަގުތުކޮޅަކަށް ނަމަ އެގޮތަށް ޖަރާސީމު އުފެދޭލެއް ވެސް ގިނައެއް ނުވާނެ އެވެ. އެހެންކަމުން ކޭތައަކީ ސިއްހަތަށް ގެއްލުން ލިބޭ އެއްޗެއް ކަމުގައި ބެލެވޭނެ އިތުރު ސަބަބެއް ނުފެންނަ ކަމަށް ޑރ. ނީމާ ވިދާޅުވި އެވެ.

މިޒަމާނުގައި އަހަރެމެންގެ ތެރެއިން ގިނަ މީހުން ކާން ބޭނުންކުރާ ގިނަ އެއްޗެތި ހުންނަނީ އައިސްއަލަމާރީގައި ފިނީގަ އެވެ. މި އެއްޗިއްސަށް އަވި ލިބޭނީ ވަރަށް މަދު ހާލަތެއްގަ އެވެ. އެހެންކަމުން ބަދިގޭގައި މަސައްކަތްކުރުމާއި ކެއުމުން، މާބަނޑު މީހަކަށް ވިޔަސް އަދި އާދައިގެ މީހަކަށް ވިޔަސް ލިބޭނެ ގެއްލުމެއް ސައިންސްގެ އަލީގައި ނުވިސްނޭ ކަމަށް އޭނާ ވިދާޅުވި އެވެ.