މިއީ ނިއު އަށް ހާއްސަ ފައިނަލެއް: އޮސްކާ

މި ސީޒަނުގެ މިހާތަނަށް ނިއު ރޭޑިއަންޓްގެ އެންމެ ބޮޑު ވާދަވެރިއެއްގެ ގޮތުގައި ފެނިފައި ވަނީ ޓީސީ ސްޕޯޓްސް ކްލަބް ކަމަށާއި އެ ޓީމާ ދެކޮޅަށް އެފްއޭ ކަޕް ފައިނަލުގައ މިރޭ ކުޅޭ މެޗަކީ ވަރަށް ހާއްސަ ފައިނަލަކަށް ވެގެންދާނެ ކަމަށް ނިއުގެ ކޯޗު އޮސްކާ ބްރުޒޮން ބުނެފި އެވެ.

ނިއު އިން ވަނީ މި ސީޒަނުގެ މިހާތަނަށް ޓީސީއާ ދެކޮޅަށް ކުޅުނު ހަތަރު މެޗުން ވެސް މޮޅުވެފަ އެވެ. އޮސްކާ ނިއުއާ ހަވާލުވި ފަހުން ޓީސީއާ ދެކޮޅަށް ކުޅުނީ ދެ މެޗެވެ.

އުރީދޫ ދިވެހި ޕްރިމިއާ ލީގުގެ ފަހު މެޗުން ނިއު ވަނީ ޓީސީ 3-2 އިން ބަލިކޮށްފަ އެވެ. އޮސްކާ ބުނީ އެ މެޗަށް ވުރެން މި މެޗު ހުރިހާ ގޮތަކުން ވެސް އުނދަގޫވާނެ ކަމަށެވެ.

"ވަރަށް ވަރަށް އުނދަގޫވާނެ މި މެޗު. ޓީސީ އަކީ މި ސީޒަނުގައި އަހަރެމެންގެ ވާދަވެރިން. ހުރިހާ މުބާރާތެއްގައި ވެސް އެކަން ފެނިއްޖެ. ނަސީބު ވެސް އެހީވުމާ އެކު އަހަރެމެންނަށް ދިވެހި ޕްރިމިއާ ލީގު ލިބިއްޖެ. އަހަންނަށް ޔަގީން ފައިނަލުގައި ޓީސީ ވަަރަށް ރަނގަޅު ފައިޓެއް ދޭނެކަން،" އޮސްކާ ބުންޏެވެ.

އޭނާ ބުނީ ޓީސީގެ އެޓޭކް ވަރުގަދަ ކަމަށާއި އެހެން ނަމަވެސް އެ ޓީމުގައި ވެސް ބަލިފައިތަކެއް އެބަހުރި ކަަމަށެވެ.

"ޓީސީގެ އެބައޮތް އެޓޭކަށް ބަލާއިރު ވަރަށް ވަރުގަދަ ޓީމެއް. އެޓީމުގެ އެޓޭކިން ސްޓްރެންތު ވަރަށް ވަރުގަދަ. އެހެން ނަމަވެސް ކޮންމެވެސް ވަރެއްގެ ބަލިކަށިކަމެއް އެބަހުރި އެ ޓީމުގެ ޑިފެންސުގައި،" އޮސްކާ ބުންޏެވ

އޮސްކާ ވަނީ ޓީސީގެ ކޯޗު މުހައްމަދު ނިޒާމް (ނިޒާމްބެ)ގެ ރޭވުންތެރިކަން ރަނގަޅުކަން މީގެ ކުރިން ވެސް ފާހަގަކޮށްފަ އެވެ. ޓީސީން ކުރިއަށް ޕްރެސްކޮށްގެން ކުޅޭ އެޓޭކިން ފުޓްބޯޅަ ހުއްޓުވަން އުނދަގޫތަކެއް ދިމާވާ ކަމަށް ބުންޏެވެ.

"އަހަރެމެން ވަރަށް ވިސްނައިގެން ކުޅެން ޖެހޭ މެޗެއް މިއީ. އެމީހުންނަށް ގޯލު ޖަހާނެ ފުރުސަތެއްދީގެން ނުވާނެ. އަހަރެމެން އަތުގައި ކޮންޓްރޯލް އޮންނަ ވަގުތު ފަރުވާ ކުޑަކޮށްލައިގެން ލަނޑެއް ލިބިދާނެ ކަހަލަ މެޗެއް މިއީ،" އޮސްކާ ބުންޏެވެ.

މިދިޔަ އަހަރުގެ ރަނަރަޕްގެ ހައިސިއްޔަތުން މި ފަހަރުގެ އެފްއޭ ކަޕް ގުރުނެގިއިރު ޓީސީ އަށް ވަނީ ސެމީ ފައިނަލުގެ ސީދާ ޖާގައެއް ދީފަ އެވެ. އެއީ މުބާރާތުގައި ޓީމުތަކުން ބައިވެރިވި އަދަދު މަދުވުމުންނާއި އެންމެ ފަހުގެ ޗެމްޕިއަން ވެލެންސިއާ ނުކުޅޭތީ އެވެ.

އޮސްކާ ބުނީ ޓީސީ ފައިނަލަށް ދިޔައީ ނިއު އަށް ވުރެން މަދުން އެއް މެޗު ކުޅެގެން ކަމަށް ވިޔަސް އެ ޓީމަށް އޭގެއިން ނެގޭނެ މާ ބޮޑު އެޑްވާންޓޭޖެއް އޮތް ކަމަށް ނުދެކޭ ކަމަށެވެ.

"ޓީސީ ކުޅުނީ އަހަރެމެންނަށް ވުރެން މަދު މެޗެއް މި މުބާރާތުގައި. ރިކަވަރީ އަށް ރަނގަޅު ވަގުތެއް މިއީ. އެކަމަކު އަހަރެމެން މިއޮތީ ރަނގަޅު ފޯމެއްގައި. ރަނގަޅު ވިނިން ސްޓްރީކެއްގައި. ގިނަ ކުޅުންތެރިންތަކަކަށް ފުރުސަތު ދެވިއްޖެ އެއީ ވެސް ޕޮޒިޓިވް ކަމެއް،" އޮސްކާ ބުންޏެވެ.

އެފްއޭ ކަޕް ފައިނަލުގައި މިރޭ ނިއު ވާދަކުރާއިރު އެ ޓީމުން ވަނީ އެންމެ ފަހުން ކުޅުނު 14 މެޗުން މޮޅުވެފަ އެވެ. މިދިޔަ އަހަރުގެ އެފްއޭ ކަޕްގެ ސެމީ ފައިނަލުން ނިއު ކެޓީ ޓީސީ އަތުންނެވެ. އެ ފަހަރު ނިއު އަށް ލިބުނީ މުބާރާތުގެ ތިން ވަނަ އެވެ. މިއީ އެފްއޭ ކަޕް 11 ފަހަރު ހޯދި ނިއު 2014 ވަނަ އަހަރަށް ފަހު މި މުބާރާތުގެ ފައިނަލްގައި ކުޅޭ ފުރަތަމަ ފަހަރެވެ.

މިރޭގެ ފައިނަލް މެޗު ފަށާނީ 9 ޖަހާއިރު އެވެ. މިއަދު ހަވީރު 4 ޖަހާއިރު ކުޅޭނީ މުބާރާތުގެ ތިން ވަނަ ހޮވާ މެޗެވެ. ބައްދަލުކުރާނީ ގްރީން ސްޓްރީޓްސް އާއި މާޒިޔާ އެވެ.