ވިއްސާރައިގައި ބޮޑަށް ގެއްލުންވީ ދަނޑުބިންތަކަށް: ޑިޒާސްޓާ

ސްރީ ލަންކާ ކައިރިން އުފެދުނު ތޫފާނުގެ ސަބަބުން ރާއްޖެ އަށް ކުރި ވިއްސާރައިގައި ބޮޑަށް ގެއްލުން ލިބުނީ ދަނޑުބިންތަކަކަށް ކަމަށް ނޭޝަނަލް ޑިޒާސްޓާ މެނޭޖްމަންޓް ސެންޓަރުން ބުނެފި އެވެ.

އެ ސެންޓަރުގެ ތަފާސްހިސާބުތަކަށް ބަލާއިރު، މިދިޔަ ހަފުތާގެ ފަހުކޮޅު ކުރި އެ ވިއްސާރައިގައި ގެއްލުން ލިބުނު ކަމަށް 57 ރަށަކުން ރިޕޯޓް ކޮށްފައިވެ އެވެ. އޭގެ ތެރެއިން 36 ރަށެއްގައި ފެންބޮޑުވެފައިވާ އިރު ގަދަ ވައިގަައި 18 ރަށަކަށް އެކިވަރުގެ ގެއްލުންތައް ކުރިމަތިވި އެވެ. އަދި ހަތަރު ރަށަކަށް އުދައަރާފައިވެ އެވެ.

ޑިޒާސްޓާ ސެންޓަރުގެ ޑިރެކްޓާ ޖެނެރަލް ސޮފީނާޒް ހަސަން "މިހާރު" އަށް ވިދާޅުވީ ކައުންސިލްތަކާ ގުޅިގެން ލިބުނު ގެއްލުންތައް ބެލުމުގެ މަސައްކަތް ކުރަމުން އަންނަ ކަމަށާއި އިއްޔެގެ ނިޔަލަށް 16 ރަށެއްގެ މައުލޫމާތު ލިބިފައިވާ ކަމަށެވެ.

އޭނާ ވިދާޅުވީ އެ ރިޕޯޓްތަކަށް ބަލާއިރު މީހުން ދިރިއުޅޭ ގޯތިގެދޮރަށް ލިބުނު ގެއްލުންތައް ކުޑަ ކަމަށާއި ބޮޑަށް ގެއްލުންވެފައި ހުރީ ރުއްގަހަށާއި ދަނޑުބިންތަކަކަށް ކަމަށެވެ. ނަމަވެސް އެ ގެއްލުންތަކުގެ ތަފްސީލުތައް ރަށު ކައުންސިލްތަކުން އަދި ނުލިބޭ ކަމަށް އެ ސެންޓަރުން ބުންޏެވެ.

"ބައެއް ގެތަކުގެ ހިފައި ގެންގުޅޭ ސާމާނާއި އިލެކްޓްރޯނިކް ސާމާނަށް ގެއްލުންވި ކަމަށް ރިޕޯޓްކޮށްފައިވޭ. ބޮޑަށް ގެއްލުންވީ ރުއްގަސްތަކާއި ދަނޑުބިންތަކަށް،" ސޮފީނާޒް ވިދާޅުވި އެވެ.

އޭނާ ވިދާޅުވީ ކައުންސިލްތައް މެދުވެރިކޮށް ހަދަމުންދާ ރިޕޯޓްތައް ނިމުނުހާ އަވަހަކަށް، ރަށްރަށަށް އެހީތެރިކަން ފޯރުކޮށްދިނުމުގެ މަސައްކަތް ފަށާނެ ކަމަށެވެ.

މޫސުމާ ބެހޭ ގައުމީ އިދާރާ އިން ބުނީ މިހާރު ރާއްޖެ އަށް ތޫފާނުގެ އަސަރު ނުކުރާ ކަމަށެވެ. އަދި މިހާރު ކުރަމުން ދަނީ މޫސުމީ ވިއްސާރައެއް ކަމަށް ވެސް މެޓް އޮފީހުން ބުންޏެވެ.