ސީރިއާގައި ކެމިކަލް ހަތިޔާރުގެ ހަމަލާ ދިނީ އަސަދުގެ ސަރުކާރުން: އދ

ޔުނައިޓެޑް ނޭޝަންސް (އޮކްޓޯބަރު 27) - ސީރިއާގައި މިދިޔަ އެޕްރީލް މަހު ކެމިކަލް ގޭހުގެ ހަމަލާއެއްދީ އެތައް ބަޔަކު މަރާލުމުގެ ފަހަތުގައި ވަނީ ރައީސް ބައްޝާރުލް އަސަދުގެ ސަރުކާރު ކަމަށް އދ.ގެ ތަހުގީގު ރިޕޯޓެއްގައި ބުނެފި އެވެ.

އުތުރުގެ އިދްލީބް ޕްރޮވިންސްގެ ޚާން ޝެއިޚޫންގައި އެޕްރީލް 4 ވަނަ ދުވަހު ސަރިން ކަމަށް ބެލޭ ގޭސް ބޭނުންކޮށްގެން ދިން ހަމަލާގައި 80 އަށް ވުރެ ގިނަ މީހުން މަރުވި އެވެ. އޭގެ ތެރޭގައި އަންހެނުންނާއި ކުޑަ ކުދިން ގިނަ އަދަދަކަށް ހިމެނެ އެވެ. ސަރިން ގޭހަކީ ސައިނަޑް ވިހަ އަށް ވުރެ 20 ގުނަ ބާރުގަދަ އެއްޗެކެވެ.

މި ހަމަލާ އަށް ރައްދު ދިނުމުގެ ގޮތުން އެމެރިކާ އިން ވަނީ ސީރިއާގެ އަސްކަރީ މަރުކަޒަކަށް ވައިގެ ހަމަލާތަކެއް ދީފަ އެވެ. އެމެރިކާ އިން ބުނެފައި ވަނީ ހަމަލާ ދިނީ ކެމިކަލް ހަމަލާ ދިން މަރުކަޒަށް ކަމަށެވެ.

އދ.ގެ މި ރިޕޯޓާ ގުޅިގެން ސީރިއާ ސަރުކާރުން ވަކި އެއްޗެއް އަަދި ނުބުނެ އެވެ. އެކަމަކު ސީރިއާ އިން ކުރިން ވަނީ އެކަން ދޮގުކޮށްފަ އެވެ. އަދި 2013 ވަނަ އަހަރުގެ އެއްބަސްވުމުގެ ދަށުން ސީރިއާގައި އެއްވެސް ބާވަތެއްގެ ކެމިކަލް ހަތިޔާރެއް ނުހުންނާނެ ކަމަށް އެ ގައުމުން ވަނީ ބުނެފަ އެވެ.

އެކަމަކު ޔޫއެން ކޮމިޝަން އޮފް އިންކްވަޔަރީ (ސީއޯއައި) އިން ބުނެފައި ވަނީ ސީރިއާގެ ވައިގެ ސިފައިން ޚާން ޝެއިޚޫން އަށް ދިން ހަމަލާގައި ކެމިކަލް ހަތިޔާރުގެ އަސަރު ހުރި ކަމުގެ ހެކި ލިބިފައިވާ ކަމަށެވެ. ތަހުގީގު ޓީމުގެ ހޯދުންތައް ބިނާކޮށްފައި ވަނީ ބޮމުގެ ބައިތަކުގެ ފޮޓޯތަކާއި ސެޓެލައިޓް ފޮޓޯ އަދި މަންޒަރު ދުށް މީހުންގެ ހެކި ބަހުގެ މައްޗަށެވެ.