ފައި ގިރުނު މައްސަލައިގައި ޑޮކްޓަރުގެ މައްސަލަތަކެއް އެބަ ހުރި: ހެލްތު

ފުޓްބޯޅަ ކުޅެނިކޮށް ކުޑަ ހުޅަށް ލިބުނު ގެއްލުމަކާ ގުޅިގެން ތ. އަތޮޅު ހޮސްޕިޓަލުން ޕްލާސްޓަރު އެޅި ޒުވާނެއްގެ ފައިން ތަންގަނޑެއް ގިރި، ހަލާކުވި މައްސަލައިގައި ޑޮކްޓަރުގެ މައްސަލަތަކެއް ހުރި ކަމަށް ހެލްތު މިނިސްޓްރީން މިއަދު ބުނެފި އެވެ.

ހެލްތު މިނިސްޓްރީގެ ޑެޕިއުޓީ ޑިރެކްޓަރު ޖެނެރަލް ތަސްލީމާ އުސްމާން ވިދާޅުވީ އެމައްސަލަ ތަހުގީގުކުރުމުން އެނގުނީ ބަލަންވާ ވަރަށް ނުބެލުމުގެ މައްސަލަތަކެއް ހުރި ކަން ކަމަށެވެ. އެހެންކަމުން އޭނާއާ މެދު ފިޔަވަޅު އަޅަން މެޑިކަލް ކައުންސިލަށް ފޮނުވާފައިވާ ކަމަށް ވެސް އޭނާ ވިދާޅުވި އެވެ.

ތިމަރަފުށީ އުމުރުން 25 އަހަރުގެ އަލަމް އައްބާސްގެ ފައިގައި އެ އަތޮޅު، އަތޮޅު ހޮސްޕިޓަލުން ޕްލާސްޓަރު އެޅީ ކުޑަ ހުޅުގައި ރެނދެއް ލާފައިވާ ކަމަށް ފެނިގެންނެވެ. އެކަމަކު އޭނާގެ އާއިލާ އިން ވާހަކަ ދެއްކި މީހަކު ބުނި ގޮތުގައި ޕްލާސްޓަރު އެޅިތާ ދެ ދުވަސް ތެރޭގައި އެ ހިސާބުގަނޑު ފާރުވާން ފެށީ އެވެ. ޕްލާސްޓަރު ނައްޓާލިއިރު އެ ހިސާބު އޮތީ ފާރުވެ، ދޮސް އުފެދިފަ އެވެ.

އޭނާ މާލެ ގެނެސް އޭޑީކޭގައި ފަރުވާ ދޭން ފެށީ ފައިގެ އެ ބައި ގިރިފައި އޮތުމުންނެވެ. ފައި ބުރިކޮށްލަން ޖެހިދާނެ ކަމުގެ ބިރު ކުރިން އުފެދުނު ނަމަވެސް ފަރުވާދީ މިހާރު ވަނީ ވަރަށް ބޮޑަށް ރަނގަޅުވެފަ އެވެ.

ތ. އަތޮޅުން އަލަމްގެ ފައިގައި ޕްލާސްޓަރު އެޅީ ބޭރުގެ ޑޮކްޓަރެކެވެ. އެކަމަކު އޭނާއާ ބެހޭ އިތުރު އެއްވެސް ތަފްސީލެއް ނުދެ އެވެ.

ޕްލާސްޓަރު އަޅައިގެން މިވަރުގެ މައްސަލައެއް ދިމާވިކަން އާންމުންނާ ހަމައަށް ތިލަވި މިއީ ފުރަތަމަ ފަހަރެވެ. އެހެން ބައެއް ޑޮކްޓަރުން އޭރު ބުނި ގޮތުގައި އެ މައްސަލާގައި ޑޮކްޓަރުގެ އިހުމާލެއް އޮންނާނެ އެވެ.

އެކަމަކު ތ. އަތޮޅު ހޮސްޕިޓަލްގެ މެނޭޖަރު އަހުމަދު ޒަކީ އޭރު ވިދާޅުވެފައި ވަނީ އަލަމްގެ މައްސަލައިގައި ހޮސްޕިޓަލްގެ އިހުމާލެއް އޮތް ކަމަށް ގަބޫލުނުކުރެއްވޭ ކަމަށެވެ.