ރޮހިންޖާ މީހުންނަށް ހަމަލާ ދިން ހާމުދުރުންނަކީ ޖަނަވާރުންތަކެއް: ލަންކާ

ކޮލަމްބޯ (ސެޕްޓެމްބަރު 28) - ލަންކާގައި ތިބި ރޮހިންޖާ ރެފިއުޖީންނަށް ހަމަލާ ދިން ބުޑިސްޓް ހާމުދުރުންނަކީ "ޖަނަވާރުންތަކެއް" ފަދަ ބައެއް ކަމަށް އެ ގައުމުގެ ސަރުކާރުން ބުނެފި އެވެ.

ލަންކާ ސަރުކާރުގެ ތަރުޖަމާން ރަޖީތާ ސެނެރަތުނަ ވިދާޅުވީ ރޮހިންޖާ މުސްލިމުންނަށް ހިމާޔަތް ދިނުމުގައި އިހުމާލުވި ސަލާމަތީ ފަރާތްތަކަށް ވެސް ފިޔަވަޅު އަޅާނެ ކަމަށެވެ. ލަންކާ ސަރުކާރުގެ ހެލްތު މިނިސްޓަރުގެ މަގާމު އަދާކުރައްވާ ސެނަރަތުނަ ވިދާޅުވީ ރޮހިންޖާ ރެފިއުޖީންނަށް ހާމުދުރުން ދިން ހަމަލާ ކުށްވެރި ކުރާ ކަމަށާއި ރެފިއުޖީން މިހާރު ވަނީ ރައްކާތެރި ތަނަކަށް ބަދަލުކޮށްފައި ކަމަށެވެ. ރެފިއުޖީ 31 މީހުންގެ ތެރޭގައި 16 ކުޑަ ކުދިންނާއި ހަތް އަންހެނުން ހިމެނޭ ކަމަށެވެ.

"ބުޑިސްޓެއްގެ ހައިސިއްޔަތުން އަޅުގަނޑު ވެސް ލަދުގަނޭ މި ހިނގައިދިޔަ ކަންތަކާ މެދު،" ނޫސްވެރިންނާ ވާހަކަ ދައްކަވަމުން ސެނަރަތުނަ ވިދާޅުވި އެވެ. "ޅަ ކުދިން އުރައިގެން ތިބި މައިން ވަނީ އެ މީހުން ތިބި އިމާރާތުން ނެރެލާފައި. ރޮހިންޖާ މީހުންނަށް ހަމަލާ ދިން ގްރޫޕުގައި އިސްކޮށް ތިބީ ހާމުދުރުން."

ބުޑިސްޓުންގެ ގްރޫޕް ވަނީ ރެފިއުޖީން ތިބި އިމާރާތުގެ ގޭޓް ހަލާކުކޮށްލުމަށް ފަހު އެތެރެއަށް ވަދެ ކުޑަދޮރުތައް ތަޅާލާ، ފަރުނީޗަރުތައް ހަލާކުކޮށްލައިފަ އެވެ. ބުޑިސްޓުންގެ ހަމަލާގައި ރެފިއުޖީންނަށް އެއްވެސް ގެއްލުމެއް ނުލިބެ އެވެ. ނަމަވެސް ފުލުހުންގެ ދެ މީހަކަށް އަނިޔާވެގެން ވަނީ ފަރުވާ ދީފަ އެވެ.

ސެނަރަތުނަ ވިދާޅުވީ ބުޑިސްޓުން ކޮންޓްރޯލް ކުރުމުގައި އިހުމާލުވި ފުލުހުންނަށް ފިޔަވަޅު އަޅަން އަންގާފައިވާ ކަމަށެވެ.

"މިއީ އެއް ނޫން ބުޑިޒަމުން ދަސްކޮށްދޭ ފިލާވަޅަކީ. ރެފިއުޖީންނަށް ހަމްދަރުދީ އާއި އަޅާލުން ދޭން ވާނެ. ރެފިއުޖީންނަށް ހަމަލާ ދިން މީހުންނަކީ ހާމުދުރުންނެއް ނޫން. އެއީ ޖަނަވާރުންތަކެއް،" ސެނެރަތުނަ ވިދާޅުވި އެވެ.

އިމާރާތަށް ވަން ހާމުދުރުންގެ އެކަކު ފޭސްބުކަށް އަޕްލޯޑްކޮށްފައިވާ ވީޑިއޯއެއްގައި ވަނީ އެހެން މީހުން ވެސް އެ އިމާރާތަށް ވަދެ ރޮހިންޖާ މީހުންނަށް ހަމަލާ ދިނުމަށް ގޮވާލައިފަ އެވެ.

"މިއީ މިއަންމާގެ ބުޑިސްޓް ހާމުދުރުން މަރާ ރޮހިންޖާ ޓެރަރިސްޓުން،" ރޮހިންޖާ މަންމައިންނަށް އިޝާރާތްކޮށް ބުޑިސްޓް ހާމުދުރު ބުންޏެވެ.

ލަންކާގެ ބުޑިސްޓް ހާމުދުރުންނާއި މިއަންމާގެ ހައްދުފަހަނަޅާފައިވާ ބުޑިސްޓުންނާ ގުޅުން އޮވެ އެވެ.

ރޮހިންޖާ ރެފިއުޖީންނަކީ މީގެ ފަސް މަސް ދުވަސް ކުރިން ލަންކާ ސިފައިން ކަނޑުމަތިން ސަލާމަތްކޮށްގެން ގެންދިޔަ ބައެކެވެ. ލަންކާގައި ތިބި ރޮހިންޖާ ރެފިއުޖީންނަށް ދިން ހަމަލާ އދ.ގެ ރެފިއުޖީންނާ ބެހޭ ކޮމިޝަނުން ވަނީ ކުށްވެރިކޮށްފަ އެވެ.