ރޮހިންޖާއިންގެ 102 މީހަކު ކަނޑުމަތިން ސަލާމަތްކޮށް ލަންކާއަށް ގެންގޮސްފި

މިއަންމާގައި އެކަހެރިކޮށް، ހައްގުތައް ނިގުޅައިގެންފައިވާ ރޮހިންޖާއިންގެ 102 މީހަކު މަސް ބޯޓެއްގައި އޮޔާ ދަނިކޮށް ސްރީ ލަންކާގެ ކަނޑުގެ ސަރަހައްދުން ފެނިގެން ސަލާމަތްކޮށް އެ ގައުމަށް ގެންގޮސްފި އެވެ.

ލަންކާގެ ކަނޑުގެ ސިފައިން މިއަދު ބުނީ އިއްޔެ ހަވީރު މަސްވެރިންގެ ބަޔަކަށް ފެނުނު އެ ބޯޓުގައި 25 ކުޑަކުދިން ވެސް ތިބި ކަމަށާއި އެންމެން މިހާރު ލަންކާގެ އިރުމަތީގައި އޮންނަ ޓްރިންކޮމަލީގެ ބަނދަރަށް ގެންގޮސް ކާބޯތަކެއްޗާއި ފެން ފޯރުކޮށްދީފައިވާ ކަމަށެވެ.

"އެ މީހުން ބޯޓުން ފައިބަން ހުއްދަ ދިނުމުގެ ކުރިން މެޑިކަލް ޓެސްޓުތައް ކުރަންޖެހޭ،" ނޭވީގެ ތަރުޖަމާނު ވިދާޅުވި އެވެ.

ރޮހިންޖާ ދަރިކޮޅުގެ މީހުންގެ ތެރޭގައި މުސްލިމުން ގިނަ އެވެ. އެއީ މިއަންމާގައި ވަރަށް ބޮޑަށް އަނިޔާ ލިބެމުންދާ ބަޔަކަށް ވާއިރު، ކޮންމެ އަހަރަކު ވެސް އެތައް ހާސް ބަޔަކު ކަނޑުމަތީގެ ދިގު ދަތުރުތައްކޮށް، ފުރާނަ ނުރައްކަލަށް ހުށަހެޅިގެން، ދެކުނުއިރުމަތީން މެލޭޝިއާ އަށް ނުވަތަ އިންޑޮނީޝިއާއަށް ދެ އެވެ.

މި ސަރަހައްދަށް ރޮހިންޖާ މީހުން އައުމަކީ އާންމު ކަމެއް ނޫނެވެ. އެކަމަކު ހާލުގައި ޖެހިފައިވާ 100 އަށް ވުރެ ގިނަ ރޮހިންޖާ ރެފިއުޖީން ލަންކާގެ ކަނޑުގެ ސިފައިން 2022 ވަނަ އަހަރުގެ ޑިސެމްބަރު މަހު ވެސް ސަލާމަތްކުރި އެވެ.

މިއަންމާއިން ލަންކާއާ ހިސާބަށް އަންނަން ހުޅަނގު ދެކުނު ކަނޑު ހުރަސްކޮށް ގާތްގަނޑަކަށް 1،750 ކިލޯމީޓަރު (1،100 މޭލު) އަށް ދަތުރުކުރަން ޖެހެ އެވެ.

ކަނޑުގެ ސިފައިންގެ ތަރުޖަމާނު ވިދާޅުވީ ހާލުގައި ޖެހިފައި ތިބި މީހުންގެ ބަސް ދަންނަ މީހުން ނެތުމުން މުއާމަލާތުކުރަން ދަތި ކަމަށާއި އެހެންވެ އެ މީހުން ދާން ގަސްތުކޮށްގެން ތިބީ ކޮން ގައުމަކަށް ކަމެއް އަދި ސާފު ނުވާ ކަމަށެވެ. އޭނާ ވިދާޅުވީ މި ދުވަސްވަރު މޫސުން ގޯސްކަމުން ޖެހޭ ކޮޅިގަނޑުތަކުގެ ސަބަބުން މިސްރާބު އޮޅިގެން މި ހިސާބަށް އާދެވުނީ ކަމަށް ވުން ވެސް އެކަށީގެންވާ ކަމަށެވެ.

މިޔަންމާގެ އަސްކަރިއްޔާއިން 2017 ވަނަ އަހަރު ރޮހިންޖާ ދަރިކޮޅުގެ މީހުންނާ ދެކޮޅަށް ހިންގި އަނިޔާވެރި އަމަލުތަކާ ހެދި އެތައް ހާސް ބަޔަކު އަވަށްޓެރި ބަންގްލަދޭޝްއަށް ދިޔަ އެވެ. އެ މައްސަލަ މިހާރު އދ.ގެ ކޯޓެއްގައި ގެންދަނީ ބަލަމުންނެވެ.

މިޔަންމާގެ އަސްކަރިއްޔާއިން 2021 ވަނަ އަހަރުގެ ބަޣާވާތަކުން ވެރިކަން އަތުލައިގަނެ އަނިޔާވެރިކަން އިސްކުރި ފަހުން އެތައް މިލިއަން ބަޔަކަށް ވަނީ ގައުމު ދޫކޮށް ދާން މަޖުބޫރުވެފަ އެވެ.

ރޮހިންޖާ މީހުންގެ ރަކީން ސްޓޭޓްގައި ހިނގަމުންދާ ހަމަނުޖެހުންތަކުގެ ސަބަބުން ވިޔަފާރި އާއި ދަނޑުވެރިކަން ހީނަރުވެ، އާންމު ބަނޑުހައިހޫނުކަމަކާ ކުރިމަތިވެދާނެ ކަމުގެ އިންޒާރު ވެސް އދ. އިން ވަނީ ދީފަ އެވެ. -- އޭއެފްޕީ