ރޮހިންޖާގެ 260 އަށް ވުރެ ގިނަ މީހުން އިންޑޮނީޝިއާއަށް

އަންހެނުންނާއި ކުޑަކުދިން ހިމެނޭ ގޮތަށް 260 އަށް ވުރެ ގިނަ ރޮހިންޖާ ރެފިއުޖީން އިންޑޮނީޝިއާގެ އެންމެ އިރުމަތީ ޕްރޮވިންސް ކަމަށްވާ އަޗޭއަށް ވަދެފި އެވެ.

މިއަންމާގައި އެކަހެރިކޮށް އަނިޔާގައި އުޅެންޖެހިފައިވާ، މުސްލިމުން ގިނަ ރޮހިންޖާ ދަރިކޮޅުގެ މީހުންގެ އެތައް ސަތޭކަ ބަޔަކު ކޮންމެ އަހަރަކު ވެސް މެލޭޝިއާ އާއި އިންޑޮނީޝިއާއިން ހިމާޔަތް ހޯދަން ރެފިއުޖީންގެ ގޮތުގައި އެ ގައުމުތަކަށްދެ އެވެ.

އިރުމަތީ އަޗޭގެ އޮފިޝަލެއް ކަމަށްވާ އިސްކަންދަރު ވިދާޅުވި ގޮތުގައި ރެފިއުޖީންގެ މި ގްރޫޕް އެ ސަރަހައްދުގެ ހުޅަނގު ޕިއުރިއުލަކް އަވަށުގެ ގޮނޑުދޮށަށް އައީ އާދީއްތަ ދުވަހުގެ ރޭ 10:25 ހާއިރު އެވެ.

"އޭގައި 264 މީހުން ތިބި. އެއީ 117 ފިރިހެނުންނާއި 147 އަންހެނުން،" އިސްކަންދަރު އިއްޔެ އޭއެފްޕީއަށް ވިދާޅުވި އެވެ.

އޭނާ ވިދާޅުވި ގޮތުގައި އެ މީހުން އެންމެ ފުރަތަމަ ތިބީ ދެ ބޯޓެއްގައި ކަމަށާއި އޭގެ ތެރެއިން އެއް ބޯޓު ފެތުމުން އެންމެން ދެ ވަނަ ބޯޓު ގޮނޑުދޮށާ ގާތްކުރީ އެވެ.

"އެ މީހުން ބުނަނީ މެލޭޝިއާއިން އެ މީހުން ފޮނުވާލީ ކަމަށް،" ރޮހިންޖާ ރެފިއުޖީން ގެންދާނެ ތަނެއް ސަރުކާރުން އަދި ނިންމާފައި ނުވާކަން ފާހަގަކުރައްވަމުން އިސްކަންދަރު ވިދާޅުވި އެވެ.

މެލޭޝިއާއިން މި ހަފްތާގައި ވަނީ މިއަންމާ މީހުން ތިބި ދެ ބޯޓެއް އެ ގައުމުގެ ސަރަހައްދުން ނެރެ ފޮނުވާލާފައިވާ ކަމަށް ބުނެފަ އެވެ.

މިދިޔަ ނޮވެމްބަރު މަހުގެ ތެރޭގައި އިރުމަތީ އަޗޭގެ އައްސޭރިފަށުން 100 އަށް ވުރެ ގިނަ ރެފިއުޖީން ތިބި ބޯޓެއް އަޑިއަށް ދިއުމުގެ ސަބަބުން އެ މީހުން ވަނީ ސަލާމަތްކޮށްފަ އެވެ.

މިދިޔަ އޮކްޓޫބަރު މަހުގެ ތެރޭގައި ރޮހިންޖާ ދަރިކޮޅުގެ 152 ރެފިއުޖީއަކު ސައުތު އަޗޭ ޑިސްޓްރިކްޓްގެ އައްސޭރިފަށުގައި އެތައް ދުވަހެއް ވަންދެން ބަނދަރުކޮށްގެން ތިބެން ޖެހުނެވެ. އެއީ އެ މީހުން އިންޑޮނީޝިއާ އަށް ބާލާނާތޯ ނުވަތަ އަނބުރާ ފޮނުވާލާނީތޯ ނުނިންމިގެންނެވެ. އެކަމަކު ފަހުން އެ މީހުން ފޭބުމުގެ ހުއްދަ ވަނީ ދީފަ އެވެ.

އިންޑޮނީޝިއާއަކީ އދ.ގެ ރެފިއުޖީންގެ މުއާހަދާގައި ސޮއިކޮށްފައިވާ ގައުމެއް ނޫނެވެ. އެހެންވެ މިޔަންމާގެ ރެފިއުޖީންނާ ހަވާލުވާން މަޖުބޫރު ނުކުރެވޭނެ ކަމަށާއި ކުރަންވީ ކަމަކީ އަވަށްޓެރި ގައުމުތައް ގުޅިގެން މި މީހުންނާ ހަވާލުވެ އެކި ގައުމުތަކުގައި ރަނގަޅު ގޮތުގައި ވަޒަންވެރިކުރުވުން ކަމަށް އިންޑޮނީޝިއާއިން ބުނެފައިވެ އެވެ.

އެތައް ޒަމާނެއް ވަންދެން ލޭއޮހޮރުވުމުގެ ހަމަނުޖެހުންތަކުގައި އުޅެން ޖެހުނު އަޗޭގެ ގިނަ ބަޔަކު އެ ހަނދާންތަކާ އެކު ރޮހިންޖާއިންނަށް ހަމްދަރުދީވެ އެވެ. ނަމަވެސް އަނެއް ބަޔަކު ބުނަނީ ރޮހިންޖާ ދަރިކޮޅުގެ މީހުންގެ ސަބަބުން، މިހާރު ވެސް މަދު ވަސީލަތްތަކަށް އިތުރަށް ބާރު ބޮޑުވާ ކަމަށާއި އެކި މައްސަލަތަކުގައި އިންޑޮނީޝިއާ މީހުންނާއި ރޮހިންޖާއިންނާ ދެމެދު ކުރިމަތިލުން ހިނގާ ކަމަށެވެ. -- އޭއެފްޕީ