ރޮހިންޖާ ރެފިއުޖީން 2022 ގައި ރެކޯޑް އަދަދަކަށް މަރުވި

މިޔަންމާގެ ބައި މަދު ރޮހިންޖާ ދަރިކޮޅުގެ މުސްލިމުންގެ ތެރެއިން، އެ ގައުމު ދޫކޮށް ހިޖްރަކުރި މީހުން މަރުވި އަދަދު މިދިޔަ 2022 ވަނަ އަހަރު ރެކޯޑް މިންވަރަކަށް މައްޗަށް ގޮސްފައިވާ ކަމަށް އދ. އިން ބުނެފި އެވެ.

ރެފިއުޖީންނާ ބެހޭ އދ.ގެ އިދާރާ އިން ބުނި ގޮތުގައި އަވައްޓެރި ބަންގްލަދޭޝް އަށާއި އެހެން ބައެއް ގައުމުތަކަށް ރެފިއުޖީންގެ ގޮތުގައި ދިއުމަށްޓަކައި، މިޔަންމާ ދޫކޮށް ކަނޑުމަގުން ދަތުރުކުރި މީހުންގެ ތެރެއިން މަރުވި އަދި ވީނުވީއެއް ނޭނގި މިދިޔަ އަހަރު ގެއްލުނު މީހުންގެ އަދަދު 348 އަށް އަރަ އެވެ. މިއީ 2014 ވަނަ އަހަރުގެ ތެރޭގައި، މިޔަންމާގެ ރެފިއުޖީންގެ މައްސަލަ އުފެދުނު ފަހުން، އެއް އަހަރެއްގެ ތެރޭގައި އެންމެ ގިނަ މީހުން މަރުވި އަހަރެވެ.

މިދިޔަ އަހަރު ކަނޑު މަގުން އެހެން ގައުމުތަކަށް ހިޖްރަ ކުރި މިޔަންމާގެ ރެފިއުޖީންގެ ތެރެއިން 3040 މީހަކު ވަނީ ސަލާމަތުން ބައެއް ގައުމުތަކަށް ލަފައިފަ އެވެ. އޭގެ ތެރޭގައި މިޔަންމާ އާއި ބަނގްލަދޭޝް، މެލޭޝިޔާ އަދި އިންޑޮނީޝިޔާ ހިމެނެ އެވެ. ކަނޑުމަތީގައި ގިނަ ދުވަސްތަކެއް ހޭދަވުމަށް ފަހު، އޭގެ ތެރެއިން ވެސް އެންމެ ގިނަ މީހުންނަށް އަތުވި ހިކިފަސް ތަނަކީ މިޔަންމާގެ ކޮންމެވެސް އެހެން ހިސާބެކެވެ.

ކަނޑު މަގުން ހިޖްރަކޮށް ސަލާމަތުން ހިކިފަސްތަނެއް އަތުވި މީހުންގެ ތެރެއިން ގާތްގަނޑަކަށް 45 ޕަސެންޓް މީހުންނަކީ އަންހެނުންނާއި ކުޑަކުދިންނެވެ. މެލޭޝިޔާ އާއި އިންޑޮނީޝިޔާ އަށް ހިޖްރަކުރި ރޮހިންޖާ ރެފިއުޖީންގެ ބައެއް މީހުންނަކީ، މިޔަންމާ ދޫކޮށް ބަނގްލަދޭޝްއަށް ގޮސް އެގައުމުގެ ފޭލިގެތަކުގައި ދުވަސްތަކެއް ހޭދަކުރުމަށް ފަހު، އެއަށް ވުރެ ހަމަޖެހޭ ދިރިއުޅުމެއް ހޯދުމުގެ ބޭނުމުގައި އެހެން ގައުމަކަށް ދިއުމަށްޓަކައި ކަނޑު އުޅަނދުތަކުގައި ނުކުތް މީހުންނެވެ.

މިޔަންމާ ސަރުކާރު ސިފައިންގެ އަނިޔާވެރިކަމުން ސަލާމަތްވުމުގެ ބޭނުމުގައި ގައުމު ދޫކޮށް ނުކުތް އެތައް ބަޔަކު މަރުވެފައިވާ އިރު، އެތައް އަންހެނުންނަކާއި ކުޑަކުދިންނެއް ވަނީ ހިއުމަން ޓްރެފިކިންގެ ޝިކާރައަކަށްވެފަ އެވެ. އަދި ބައެއް އާއިލާތަކުގެ އެތައް ކުޑަކުދިންނެއް ވަނީ އެކުދިންގެ މައިންބަފައިންނާ ވަކިވެފަ އެވެ.

މިދިޔަ ޑިސެމްބަރު މަހުގެ ތެރޭގައި މިޔަންމާ ދޫކޮށް ކަނޑު އުޅަނދުފަހަރުގައި ނުކުތް އެތައް ބަޔަކު، ޑިސެމްބަރު މަސް ހުސްވި އިރުވެސް ހިކިފަސް ތަނެއް އަތުނުޖެހި ތިބީ ކަނޑުމަތީގަ އެވެ. އޭގެ ތެރެއިން ބައެއް އުޅަނދުތައް އިންޖީނު ހުއްޓި ކާބޯތަކެތި ހުސްވުމާ ގުޅިގެން، އެއިން ދަތުރުކުރި އެތައް ބަޔަކު ވަނީ ހާލުގައި ޖެހިފަ އެވެ.