މެލޭޝިއާއަށް ވަންނަން އުޅުނު ރޮހިންޖާގެ 196 މީހަކު ހިފަހައްޓައިފި

މެލޭޝިއާ އަށް އެތެރެވާން އުޅެނިކޮށް އެ ގައުމުގެ އުތުރުގެ ރިސޯޓެއް ކަމަށްވާ ލަންގްކާވީ އަށް ލައްވި މިޔަންމާގެ ބޯޓެއްގައި ތިބި "ރޮހިންޖާއިން ކަމަށް ބެލެވޭ" ގާތްގަނޑަކަށް 200 މީހަކު އިއްޔެ ފުލުހުންގެ ބެލުމުގެ ދަށަށް ގެންގޮސްފި އެވެ.

މި މީހުންގެ ތެރޭގައި ހިމެނެނީ 68 ފިރިހެނުންނާއި 57 އަންހެނުންނާއި 32 ފިރިހެން ކުދިންގެ އިތުރުން 39 އަންހެން ކުދިން ކަމަށް ފުލުހުން ބުންޏެވެ.

"ހައްޔަރުކުރި އެންމެންނަކީ ވެސް ރޮހިންޖާ ދަރިކޮޅުގެ މީހުން ކަމަށް ބެލެވޭ. އެ މީހުންނަކީ މީގެ ގާތްގަނޑަކަށް 10 ވަރަކަށް ދުވަސް ކުރިން ބޯޓުގައި މިޔަންމާ އިން ފުރައިގެން ދަތުރު ފެށި ބައެއް ކަމަށް ބެލެވޭ،" ލަންގްކާވީގެ ފުލުހުންގެ ވެރިޔާ ޝަރީމަން އަޝާރީ ނެރުއްވި ބަޔާނެއްގައި ވިދާޅުވި އެވެ.

ލަންގްކާވީގައި ހުންނަ އިމިގްރޭޝަން ޑިޕާޓްމަންޓަށް އެ މީހުން ފޮނުވައި ހެލްތު ސްކްރީން ވެސް ހަދާފައިވާ ކަމަށް އޭނާ ވިދާޅުވި އެވެ.

މެލޭޝިއާގެ މެރިޓައިމް އެންފޯސްމަންޓް އެޖެންސީ (އެމްއެމްއީއޭ) އިން ބުނީ ގަވާއިދާ ހިލާފަށް އުޅޭ، މިޔަންމާގެ ހިޖުރަކުރާ މީހުން އުފުލާ ބޯޓުތައް ހޯދުމުގެ ޕެޓްރޯލްތައް ވަރުގަދަކޮށްފައިވާ ކަމަށެވެ.

"ލިޔެކިޔުމެއް ނެތި، މިޔަންމާގެ ހިޖުރަވެރިން ގޮވައިގެން އިތުރު ދެ ބޯޓެއް ކަނޑުމަތީގައި ވެއްޖެ ކަމުގެ މައުލޫމާތު އެމްއެމްއީއޭ އަށް ވަނީ ލިބިފައި. ނަމަވެސް އެ ބޯޓުތަކުގެ ސީދާ މަންޒިލެއް އަދި ނޭނގޭ،" ޑިރެކްޓާ ޖެނެރަލް މުހައްމަދު ރޮސްލީ އަބްދުﷲ ބަޔާނުގައި ވިދާޅުވެފައިވެ އެވެ.

މި ބޯޓުތަކުގެ ހަރަކާތްތައް ދެނެގަތުމަށް ތައިލެންޑުގެ ކަމާބެހޭ ފަރާތްތަކާ ވެސް މުއާމަލާތް ކުރަމުން އަންނަ ކަމަށް އޭނާ ވިދާޅުވި އެވެ.

ބުޑިސްޓުންގެ އަޣުލަބިއްޔަތު އޮންނަ މިޔަންމާގައި ރޮހިންޖާ ދަރިކޮޅުގެ މުސްލިމުންނަށް އަނިޔާލިބެމުންދާއިރު، ގިނަ ބަޔަކު ފިލައިގެން ދަނީ މުސްލިމުންގެ އަޣުލަބިއްޔަތު އޮންނަ މެލޭޝިއާ ނުވަތަ ބަންގްލަދޭޝްގެ ރެފިއުޖީ ކޭމްޕްތަކަށެވެ.

ބޯޓުފަހަރުގައި މެލޭޝިއާއަށް ދާން ނުވަތަ ތައިލެންޑަށް ގޮސް ބޯޑަރު ހުރަސްކޮށް މެލޭޝިއާއަށް އެތެރެވުމަށް ނުރައްކާތެރި ދަތުރުތައް އެ މީހުން ކުރެ އެވެ.

މި މީހުން އަތުލައިގަނެވިއްޖެ ނަމަ ގިނަ ފަހަރަށް ފޮނުވަނީ ޑިޓެންޝަން ސެންޓަރުތަކަށެވެ. އެކަމަކު އެއީ މީހުން ތޮއްޖެހި، އުޅެން ނުވާ ވަރު ތަންތަން ކަމަށް އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނެ އެވެ.

މުހައްމަދު ރޮސްލީ ވިދާޅުވި ގޮތުގައި، 2010 ވަނަ އަހަރުން ފެށިގެން 2024 ވަނަ އަހަރާ ހަމައަށް އެމްއެމްއީއޭ އާއި އެހެނިހެން ތަންފީޒީ އިދާރާތަކުން ވަނީ މިޔަންމާއިން ގަވާއިދާ ހިލާފަށް ހިޖުރަކުރަން އުޅުނު 2،089 މީހަކު 18 ބޯޓަކުން ހިފަހައްޓައިފަ އެވެ.