އަހަންނަކީ ނަސީބު ދެރަ މީހެއް ނޫން: ކްލޮޕް

ބަސެލް (މޭ 19) - ޔޫރޮޕާ ލީގުގެ ފައިނަލުގައި ރޭ ސެވިއްޔާ އަތުން 3-1 އިން ބަލިވެ، ކޯޗިން ކެރިއަރުގައި އެންމެ ފަހުން ކުރިމަތިލި ފަސް ފައިނަލުން ވެސް ނާކާމިޔާބުވެފައި ވިޔަސް ލިވަޕޫލްގެ ކޯޗު ޔާގަން ކްލޮޕަކީ ނަސީބު ދެރަ މީހެއް ކަމަށް ގަބޫލުނުކުރާ ކަމަށް އޭނާ ބުނެފި އެވެ.

ކްލޮޕްގެ ކޯޗުކަމުގައި އެންމެ ފަހުން ކުޅުނު ފަސް ފައިނަލް:

- ޗެމްޕިއަންސް ލީގު 2013، ބަޔާން މިއުނިކް 2-1 ބޮރޫޝިއާ ޑޯޓްމަންޑް

- ޖާމަން ކަޕް 2014، ބަޔާން މިއުނިކް 2-0 ބޮރޫޝިއާ ޑޯޓްމަންޑް

- ޖާމަން ކަޕް 2015، ވާޑާ ބްރެމެން 3-1 ބޮރޫޝިއާ ޑޯޓްމަންޑް

- އިނގިރޭސި ލީގު ކަޕް 2016، މެންޗެސްޓާ ސިޓީ 4-2 ލިވަޕޫލް (ޕެނަލްޓީ)

- ޔޫރޮޕާ ލީގު 2016، ސެވިއްޔާ 3-1 ލިވަޕޫލް

ޑެނިއަލް ސްޓަރިޖްގެ ލަނޑުން ލިވަޕޫލް ލީޑު ނަގާފައިވަނިކޮށް ސެވިއްޔާ މުބާރާތުގެ ޗެމްޕިއަންކަން ހޯދީ ދެ ވަނަ ހާފްގައި ތިން ލަނޑު ޖަހައިގެންނެވެ. އެ ޓީމުގެ ކެޕްޓަން ކޯކޭ ދެ ލަނޑު ޖެހި އިރު އަނެއް ލަނޑު ކާމިޔާބުކުރީ މި ސީޒަނުގައި މޮޅު ކުޅުމެއް ދައްކަމުން އަންނަ ކެވިން ގަމޭރޯ އެވެ.

ލިވަޕޫލްގެ ކޯޗު ޔާގަން ކްލޮޕް ބުނީ މެޗުގެ ފުރަތަމަ ހާފްގައި ލިވަޕޫލް ކުޅުންތެރިންގެ ފަރާތުން އޭނާ ބޭނުންވި ފެންވަރުގެ ކުޅުމެއް ފެނުނު ނަމަވެސް ސެވިއްޔާގެ ފުރަތަަމަ ލަނޑާ އެކު މެޗު ބަދަލުވި ކަމަށެވެ.

"އަހަރެމެންގެ ކޮންޓްރޯލް ފުރަތަމަ ހާފްގައި އޮތީ. އެކަމު ދެ ވަނަ ހާފް ފެށިގެން ސެވިއްޔާ އިން 30 ސިކުންތު ތެރޭގައި ލަނޑެއް ޖެހުމާ އެކު މުޅި މެޗު ބަދަލުވެއްޖެ. ދެން އަހަރެމެންގެ ފަރާތުން ފެނުނު ކުޅުމަށް ބަލާއިރު ފައިނަލް މެޗަކުން މޮޅުވެވޭނެ ފެންވަރަށް ނުކުޅެވޭ،" ކްލޮޕް ބުންޏެވެ.

ލިވަޕޫލް ކޯޗުކަމާ ކްލޮޕް ހަވާލުވީ މިދިޔަ އަހަރުގެ އޮކްޓޫބަރު މަހު އެވެ. ކްލޮޕްގެ އިރުޝާދުގެ ދަށުން ލިވަޕޫލް ވަނީ މި ސީޒަނުގައި ދެ މުބާރާތެއްގެ ފައިނަލުގަ ކުޅެފަ އެވެ. އެ ޓީމު ލީގު ނިންމާލީ އަށް ވަނައިގަ އެވެ. ކްލޮޕް ބުނީ އަންނަ ސީޒަނުގައި އެ ޓީމު ފެންނާނީ ކުރިއަށް ވުރެ ވަރުގަދަކޮށް ކަމަށެވެ.