އަނަސް އަށް އިންސާފު ހޯދައިދޭން ގޮވާލައި މީދޫގައި ބޮޑު ހިނގާލުމެއް

މެޔަށް ވަޅި ހަރައި މިދިޔަ ހަފުތާގައި މަރައިލި މުހައްމަދު އަަނަސް، ރ. މީދޫ، 25، އަށް އިންސާފު ހޯދައިދޭން ގޮވާލައި އެ ރަށުގައި މިއަދު ބޮޑު ހިނގާލުމެއް ބާއްވައިފި އެވެ.

ހަށިގަނޑުގެ 37 ތަނަކަށް ވަޅި ހަރައި އަނަސް މަރާލާފައިވަނީ، މާލޭގެ ލިޓަސް ސާވިސް ސެންޓަރުގެ ތެރޭގައި ހުއްޓަ އެވެ.

އެ ރަށުގެ ގިނަ އަދަދެއްގެ ބަޔަކު ބައިވެރިވި މި ހިނގާލުމުގައި ވަނީ އަނަސް މަރާލި މީހުން ހޯދައި އިންސާފުގެ ކުރިމައްޗަށް ގެނައުމަށް ގޮވާލައިފަ އެވެ. އޭނާ މަރާލި ސަބަބު ހޯދައިދިނުމަށް ވެސް އެ ހިނގާލުމުގައި ބައިވެރިވި މީހުން ވަނީ ގޮވާލައިފަ އެވެ.

މީގެ އިތުރުން އަނަސްގެ މަރަށް އިންސާފު ހޯދައިދިނުން އަވަސް ކޮށްދިނުމަށް އެދި ޕެޓިޝަނެއްގައި ސޮއިކޮށް، އެ ލިޔުން ކަމާ ބެހޭ އިދާރާތަކަށް ހުށަހަޅަން ވެސް ވަނީ ނިންމައިފަ އެވެ.

ރ. އަތޮޅުގައި ދުއްވާ ލޯންޗެއްގެ ކެޕްޓަނަކަށް އުޅޭ އަނަސް މަރާލި އިރު، އޭނާ އައީ އަލަތު ކައިވެންޏަށް ތައްޔާރުވަމުންނެވެ. އެ މަރާ ގުޅިގެން މިހާތަނަށް އެއްވެސް މީހަކު ހައްޔަރުކުރިކަމެއް އަދި ސާފެއްނުވެ އެވެ.

އޭނާގެ މަރާއެކު މުޅި ރަށަށް ވަނީ ކުއްލި ސިހުމެއް ލިބިފަ އެވެ. މިއީ އެ ރަށަށް ނިސްބަތްވާ މީހަކު މިފަދަ ގޮތަކަށް މަރާލި ފުރަތަމަ ފަހަރެވެ.