ގަތަރަށް ކުރިމަތިކުރި ޝަރުތުތައް ދޫކޮށްލައިފި

ނިއު ޔޯކް (ޖުލައި 19) - ގަތަރާ ދެކޮޅަށް ދަތިކުރުމުގެ ފިޔަވަޅު އެޅުމުގައި އިސްވެ އުޅުނު ހަތަރު ގައުމުން ކުރިމަތިކުރި 13 ޝަަރުތު އުވާލަން ނިންމައިފި އެވެ.

ގަތަރާ ދެކޮޅަށް މިދިޔަ މަހު 5 ވަނަ ދުވަހު ބައެއް ގައުމުތަކުން ސިޔާސީ ގުޅުން ކަނޑާލުމަށް ފަހު ދަތިކުރުމުގެ ފިޔަވަޅުތައް އެޅީ އެ ގައުމުން ޓެރަރިޒަމަށް ވާގިވެރިވާ ކަމަށް ބުނެ އެވެ. ނަމަވެސް ގަތަރުން އެކަން ދޮގުކުރެ އެވެ. ދަތިކުރުމުގެ ފިޔަވަޅުތަކަށް ލުއި ދިނުމަށް ގަތަރަށް ވަނީ 13 ޝަރުތު ހުށަހަޅައިފަ އެވެ. އޭގެ ތެރޭގައި އަލް ޖަޒީރާ ބަންދު ކުރުމާއި އީރާނާ ގުޅުން ކަނޑާލުން ހިމެނެ އެވެ.

ނަމަވެސް ސައުދީ އަރަބިއާ، ޔުނައިޓެޑް އަރަބް އެމިރޭޓްސް، ބަހުރޭން އަދި މިސްރުގެ ޑިޕްލޮމެޓުން ނިއު ޔޯކުގައި ނޫސްވެރިންނާ ވާހަކަ ދައްކަވަމުން ވިދާޅުވީ ކުރިން ހުށަހެޅި 13 ޝަރުތުގެ ބަދަލުގައި ގަތަރުން މައިގަނޑު ހަ ކަމަކަށް އެއްބަސްވުމަށް ހުށަހަޅާނެ ކަމަށެވެ. އާ ޝަރުތުތަކުގެ ތެރޭގައި ޓެރަރިޒަމާއި ހައްދުފަހަނަޅާ ދިއުމާ ދެކޮޅަށް ގަތަރުން މަސައްކަތް ކުރުމާއި އެހެން ގައުމުތަކުގެ ކަންކަމާ ބެހުން ހުއްޓާލުން ހިމެނެ އެވެ.

ހަތަރު ގައުމުގެ ޑިޕްލޮމެޓުން ވެސް ބުނެފައި ވަނީ މިހާރު ބޭނުން ވަނީ ސުލްހަވެރި ގޮތުގައި ގަތަރު މައްސަލަ ހައްލު ކުރުމަށް ކަމަށެވެ. ސައުދީ ސަފީރު އަބްދުﷲ އަލް މުއައްލިމީ ވިދާޅުވީ މައިގަނޑު ހަ ކަމެއްގެ މައްޗަށް ގަތަރުން އެއްބަސްވުމަށް ނިންމީ މި މަހު 5 ވަނަ ދުވަހު ގާހިރާގައި ބޭއްވި ހަތަރު ގައުމުގެ ޚާރިޖީ ވަޒީރުންގެ ބައްދަލުވުމުގައި ކަމަށެވެ. އަދި އެއީ ގަތަރަށް ވެސް ކުރަން ފަސޭހަ ކަންކަން ކަމަށް ވިދާޅުވި އެވެ.

މުއައްލިމީ ވިދާޅުވީ އަލަށް ހުށަހަޅާ މައިގަނޑު ހަ ކަންތަކަށް ލުއި ދިނުމާ ބެހޭ ގޮތުން އިތުރު މަޝްވަރާއެއް ނޯންނާނެ ކަމަށާާއި ނަމަވެސް އެކަންތައްތައް ތަންފީޒު ކުރުމާ ގުޅޭ ގޮތުން ދެ ފަރާތުން ވާހަކަ ދެއްކޭނެ ކަމަށެވެ. ކުރިން ކުރިމަތިކުރި ޝަރުތުތަކުގެ ތެރޭގައި ހިމެނޭ އަލް ޖަޒީރާ ބަންދު ކުރުމަކީ ކުރަން ފަސޭހަ ކަމެއް ނޫން ކަމަށާއި އެކަމަކު ދެކޮޅުވެރި ކަމަށް ހިތްވަރު ދޭ ވާހަކަތައް އެ ޗެނަލުން ފޮނުވުން ހުއްޓާލެވިދާނެ ކަމަށް މުއައްލިމީ ވިދާޅުވި އެވެ.

ޔޫއޭއީގެ ދާއިމީ މަންދޫބު ލާނާ ނުސައިބާ ވިދާޅުވީ މައިގަނޑު ކަންކަމަށް ގަތަރުން އެއްބަސް ނުވާ ނަމަ އެ ގައުމަށް ގަލްފު ކޯޕަރޭޝަން ކައުންސިލުގައި އޮތުމަކީ އުނދަގޫ ކަމަކަށް ވާނެ ކަމަށެވެ. ޔޫއޭއީގެ ސްޓޭޓް މިނިސްޓާ ފޯ އިންޓަނޭޝަނަލް ކޯޕަރޭޝަން ރީމް އަލް ހައިޝިމީ ވިދާޅުވީ ބޯޅަ މިހާރު އޮތީ ގަތަރު ކޯޓުގައި ކަމަށެވެ.

އެންމެ ފަހުން ހުށަހެޅި ކަންކަމާ ބެހޭ ގޮތުން ގަތަރުން އަދި ވަކިއެއްޗެއް ނުބުނެ އެވެ. ނަމަވެސް އެ ގައުމުން ކުރިން ބުނެފައި ވަނީ ގައުމުގެ އަމިއްލަ މިނިވަންކަމާއި ސިޔާސަދަތާއި ބައިނަލްއަގުވާމީ ގާނޫނުތަކާ ޚިލާފު އެއްވެސް ކަމަކަށް އެއްބަސް ނުވާނެ ކަމަށެވެ.