މަޓާޓޯ އެވޯޑްސްގެ ޚާއްސަ އެވޯޑުތައް 10 ފަރާތަކަށް ދީފި

މަޓާޓޯ އިން ދޭ ޓްރެވަލް އެވޯޑްސްގެ ޚާއްސަ އެވޯޑްތައް 10 ފަރާތަކަށް ދީފި އެވެ.

އަދާރަން ހުދުރަންފުށީގައި މިދިޔަ ބުރާސްފަތިދުވަހުގެ ރޭ އެވޯޑް ދިނުމަށް ބޭއްވި ހަފުލާގައި 10 ދާއިރާއަކުން 10 ފަރާތެއް ހޮވާފައިވެ އެވެ. އޭގެ ތެރޭގައި ހޮސްޕިޓާލިޓީ، ޓްރެވަލް، ފައިނޭންސް، އެއާލައިން، ތައުލީމު، ކުޅިވަރު އަދި މުނިފޫހިފިލުވުމުގެ ދާއިރާ ހިމެނެ އެވެ. މިއީ މަޓާޓޯ އެވޯޑްސް އިން އަލަށް ތައާރަފް ކުރި އެވޯޑެކެވެ.

މިއަހަރުގެ މަޓާޓޯ ޕީޕަލްސް އެވޯޑުގައި އެއާލައިންގެ ދާއިރާ އަށް ހޮވިފައިވަނީ ޓާކިޝް އެއާލައިންގެ މާކެޓިން ރެޕްރެޒެންޓޭޓިވް އައިމިނަތު މަމްޝޫގާ އެވެ. އަދި އަދި ޓްރެވެލް ސެކްޓާއަށް އަގުހުރި މަސައްކަތްތަކެއް ކޮށްދީފައިވާތީ ކެޕިޓަލް ޓްރަވެލް އެންޑް ޓުއާސްގެ ފައުންޑާ ރިއްފަތު ޔޫސުފަށް ވެސް އެވޯޑް ދީފައިވެ އެވެ. ރާއްޖޭގައި ހުރި ފުރަތަމަ އަދި ހަމައެކަނި ޕަޑީ ކޯހުގެ ޑިރެކްޓަރު ހުސެއިން ރަޝީދަށް ވެސް އޭނާގެޚިދުމަތުގެ އަގު ވަޒަންކޮށް އެވޯޑް ދީފައިވެ އެވެ.

މީގެ އިތުރުން ވަން އެންޑް އޮންލީ ރީތި ރަށުގެ ފައިނޭންސް ޑިރެކްޓަރު ރަސާ ސިންގެރަމްގެ ޚިދުމަތުގެ އަގު ވަޒަން ކޮށް އެވާޑްދީފައިވެ އެވެ. އަދި ޕެރަޑައިސް އައިލެންޑް ރިސޯޓް އެންޑް ސްޕާގެ ޖެނެރަލް މެނޭޖަރު ގައިސަރު ނަސީމް ވެސް ވަނީ މަޓާޓޯ ޓްރެވަލް އެވޯޑްސް ހާސިލް ކޮށްފަ އެވެ.

ޕީޕަލްސް އެޑިޝަންގެ އެވޯޑް ހާސިލް ކުރި ޖެނެރަލް މެނޭޖަރުންގެ ތެރޭގައި ޝެވަލް ބްލޮންކް ރަންދެލި ރިސޯޓްގެ ޖެނެރަލް މެނޭޖަރު ރެނަޓޯ ޗިޒޯލާ ވެސް ހިމެނެ އެވެ. އަދި މޫކައި ހޮޓެލްގެ ޖެނެރަލް މެނޭޖަރު އިބްރާހިމް އަލީ އަށް ވެސް މަޓާޓޯގެ އެ އެވޯޑް ލިބިފައިވެ އެވެ.

މުނިފޫހިފިލުމުގެ ދާއިރާ އިން އެ އެވޯޑް ލިބިފައިވަނީ މަޝްހޫރު ލަވަކިއުންތެރިޔާ އަބްދުލް ރަޝީދު (އަބްސީ) އަށެވެ. އެ އެވޯޑު ދިނީ އޭނާގެ 40 އަހަރު ވީ ލަވަ އާއި މިއުޒިކަށެވެ.

އަދި ވިލާ ހޮޓެލްސްގެ ޑިރެކްޓަރު އޮފް މާކެޓިން އެންޑް އޮޕެރޭޝަންސް އަލީ ރަޝީދަށް ވެސް ވަނީ އެވޯޑް ލިބިފަަ އެވެ. މީގެ އިތުރުން ގައުމީ ޔުނިވާސިޓީ ގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމްގެ ޑީން ޒީނާޒް ހުސެއިން އަށް ވެސް ވަނީ އެ އެވޯޑް ލިބިފަ އެވެ.