ވ. ތިނަދޫ ރައްޔިތުން އެދުނީ އެ ރަށުގެ ނަން އެހެން ރަށަކަށް ނުކިޔާ ގޮތަށް ބަދަލުކޮށްދޭން!

ރާއްޖޭގެ ރަށްތަކުގެ ތެރެއިން 'ތިނަދޫ' އޮންނާނީ ހަމަ އެކަނި ވ. އަތޮޅުގައި ކަމަށް ކަނޑައަޅައި އެ ގޮތަށް ބަދަލުކޮށްދިނުމަށް އެ ރަށު ރައްޔިތުން ރައީސް ޑރ. މުހައްމަދު މުއިއްޒުގެ އަރިހުން މިއަދު އެދިއްޖެ އެވެ.

ވ. ތިނަދޫގެ ރައްޔިތުން އެ ކަމަށް އެދުނީ އެ މަނިކުފާނު އެ އަތޮޅަށް މިއަދު ފެއްޓެވި ދަތުރުފުޅުގައި މިރޭ އެ ރަށަށް ވަޑައިގެން ރައްޔިތުންނާ އެކު ބޭއްވި ބައްދަލުވުމުގަ އެވެ.

ތިންސަތޭކައެއްހާ މީހުން ދިރިއުޅޭ ތިނަދޫގެ ރައްޔިތުންނާ އެކު، ރައީސް މުއިއްޒު ބޭއްވެވި ބައްދަލުވުމުގައި ވަނީ އެ ރަށުގެ ކަންކަމުގައި ރައްޔިތުން ބޭނުންވާ ކަންކަމާއި ކަންބޮޑުވާ ކަންކަން ހިއްސާ ކުރުމުގެ ފުރުސަތު ދެއްވައިފަ އެވެ.

ރައީސްގެ އިތުރުން މިނިސްޓަރުންނާއި ދައުލަތުގެ ކުންފުނިތަކުގެ ވެރިން ހިމެނޭ ގޮތަށް ސުވާލު ކުރުމުގެ ފުރުސަތު ދެއްވުމުން ތިނަދޫގެ ރައްޔިތުންގެ ފަރާތުން ވާހަކަ ދައްކަމުން އަބްދުލް އަޒީ (އަޒީބެ) ކަންބޮޑުވުން ފާޅުކުރީ ވ. ތިނަދޫގެ ނަން ގދ. އަތޮޅުގެ ތިނަދު އަށް ކިޔާތީ އެވެ.

ވަރަށް ގިނަ މީހުންނަށް އެ ދެ ރަށް އޮޅުން އަރާ ކަމަށާއި އެހެންވެ، މިހާރު ވ. ތިނަދޫގެ ރައްޔިތުން ބޭނުންވަނީ އެއީ ހަމައެކަނި އެ ރަށަށް ކިޔަން ކަމަށް ވެސް އަޒީބެ ބުންޏެވެ.

"ހަވަރު ތިނަދޫ ގެސްޓުން އައިސް އެބަ ފައިބާ މި ރަށަށް. ޑަބްލިޔުޑަބްލިޔު ޑޮޓް ޖެހީމަ އެތާ ފޮޓޯ އާއި މި ތަނުގެ ފޮޓޯއާ ހުރިހާ އެއްޗެއް އެއްކޮށް މި އަންނަނީ. އެހެންވެ އެ މީހުން އައިސް އަމިއްލަ އަށް މި ފައިބަނީ،" އަޒީބެ ބުންޏެވެ.

"އަޅުގަނޑުގެ ނަޒަރުގައި ތިނަދޫ ކިޔަނީ މި ރަށަށް. ގދ. މީހުން ވެސް ނުކިޔާ ތިނަދޫއެއް، ތެނަދު ކިޔާނީ. ދެން މާލޭ ބޭފުޅުން އެ ރަށަށް ވެސް ތިނަދޫ ކިޔައިގެން މި އުޅެނީ. އެ ރަށު މީހެއް ކައިރީ ކޮން ރަށެއްތޯ އަހާލިޔަން ބުނާނީ ތެނަދުއޭ."

އެއް ނަމެއް ކިޔާ ދެ ރަށްރަށުގެ މައްސަލައަކީ ސަރުކާރުން ހައްލު ކޮށްދޭން ޖެހިފައިވާ މައްސަލައެއް ކަމަށް ވިޔަސް އެއްވެސް ސަރުކާރަކުން އަޅާނުލާ ކަމަށް އަޒީބެ ބުންޏެވެ.

އަޒީބެ ކަންބޮޑުވުން ފާޅުކުރި އަނެއް މައްސަލައަކީ ވ. ތިނަދޫގެ އާބާދީގައި ރަށުގައި ދިރިނޫޅޭ މީހުން ވެސް ހިމަނާފައި ހުރުމުންނެވެ.

"މި ރަށު އާބާދީގައި 1،000 މީހުން އެބަތިބި. އެކަމަކު ރަށުގަ ދިރިއުޅެނީ 250 އެއްހާ މީހުން. އެހެންވެ ސިއްހީ ހިދުމަތް ދޭން 40 މީހުންނަށް ހިދުމަތް ދިނުމަށް ޖަހާފައި އިންނަ ގޮޅީގައި މި އިންނަނީ 1،000 މީހުން ޖަހާފައި،" އަޒީބެ ބުންޏެވެ.

އަޒީބެގެ އެ ކަންބޮޑުވުންތަކާ ގުޅިގެން ރައީސް މުއިއްޒު ވަނީ އެ ހުރިހާ ކަމަކަށް ވެސް ހައްލު ހޯއްދަވައިދެއްވުމަށް މަސައްކަތްޕުޅު ކުރައްވާނެ ކަމުގެ ޔަގީންކަން ދެއްވައިފަ އެވެ.