ލޯންޗު ފެރީތަކަށް އިތުރު ދެ ފަޅެއް ހަމަޖައްސަން މަޝްވަރާކޮށްފި

މާލޭ ރަސްމީ ފާލަމުން ފެށިގެން މާރުކޭޓާ ހަމައަށް ތާރު އަޅައި ޒަމާނީ ފެންވަރަށް ހެދުމުގެ މަސައްކަތް ކުރާތީ އެ ސަރަހައްދުގެ ފަޅު ބަންދުކުރުމުން ދިމާވާ ދަތިތަކަށް ހައްލެއް ހޯދުމަށް އިތުރު ދެ ފަޅެއް ހަމަޖެއްސުމަށް މާލޭ ސިޓީ ކައުންސިލުން މަޝްވަރާކޮށްފި އެވެ.

މަގުގެ މަސައްކަތް މިދިޔަ މަހުގެ 21 ގައި އެމްޓީސީސީން ފެށުމާ އެކު މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވަނީ އެ ސަރަހައްދަށް ގާތް ކުރަމުންދިޔަ އަތޮޅު ފެރީތަކާއި ލޯންޗުތަކަށް އިތުރު ދެ ސަރަހައްދެއް ބޭނުންކުރެވޭނެ ކަމަށް ބުނެފަ އެވެ.

ލޯންޗުތައް ގާތްކުރަން އެމްޕީއެލް އިން ހަމަޖެއްސީ އެމްޕީއެލްގެ ނޯތު ހާބަރުންނާއި ސައުތު ވެސްޓް ހާބަރު (ޓީޖެޓީ) ސަރަހައްދެވެ. އަންނަ ނޮވެމްބަރު މަހުގެ 19 ވަނަ ދުވަހުގެ ނިޔަލަށް އެތަނުން ހިދުމަތް ދޭނެ އެމްޕީއެލް އިން ބުނެފައިވެ އެވެ.

ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނީ ރަށްރަށުން މާލެއަށް ދަތުރުކުރާ ފަރާތްތަކާއި ފަޅުތެރެ ބޭނުންކުރާ ފަރާތްތަކަށް މާލެއަށް އަރައި ފޭބުމަށް ދިމާވާ ދަތިތައް ހައްލުކުރުމަށް އިތުރު ދެ ސަރަހައްދަކަށް ލޯންޗުތަކަށް ގާތް ކުރެވޭނެ އިންތިޒާމު ހަމަޖެއްސުމަށް އެ ސަރަަހައްދުގެ ފަޅު ބޭނުންކުރާ ފަރާތްތަކާ އެކު އެކަމުގެ މޭޔަރު އާދަމް އާޒިމް މަޝްވަރާ ކުރައްވާފައިވާ ކަމަށެވެ.

އެކަމަކު ލޯންޗުތައް ގާތްކުރަން ހަމަޖައްސާނީ ވަކި ކޮން ދެ ސަރަހައްދެއް ކަމަށް ނޭނގެ އެވެ.

ގިނަ އަދަދެއްގެ އަތޮޅު ފެރީތަކާއި އިތުރު ލޯންޗުތައް ވެސް ގާތްކުރާ އެމްއެމްއޭ ކައިރީ ފަޅު ބަންދުކުރުމާ އެކު އެހެން ސަރަހައްދުތަކަށް ވަނީ ވަރަށް ބޮޑަށް ބާރުބޮޑުވެފަ އެވެ.

އެމްއެމްއޭ ކައިރިން ފެށިގެން ބޭރު މަގު ތަރައްގީކުރަނީ މަގު ފުޅާކޮށް ހަތަރު ލޭނު އޮންނަ ގޮތަށެވެ. އެމްޓީސީސީއާ އެ މަޝްރޫއު ހަވާލުކުރީ 455 ދުވަސް ތެރޭގައި ނިންމަން ޖެހޭ ގޮތަށް 144 މިލިއަން ރުފިޔާއަށެވެ.