ރަސްފަންނު މަރާމާތުކުރަން ހުއްދައަށް އެދުނަސް ސިޓީ ކައުންސިލުން ފުރުސަތެއް ނުދޭ: އެމްޓީސީސީ

މާލޭގެ ރަސްފަންނު ސަރަހައްދުގައި ހުރި ތަންތަން މަރާމާތު ކުރަން ޖެހެނީ ކިއޮސްކު ހިންގާ ފަރާތުން ކަމަށާއި އެ މަސައްކަތްތައް ކުރަން ކައުންސިލްގެ ހުއްދައަށް އެދިގެން އުޅޭތާ ވަރަށް ގިނަ ދުވަސް ވެފައިވާ ކަމަށް އެމްޓީސީސީން މިއަދު ބުނެފި އެވެ.

އެ ކުންފުނީގެ މީޑިއާ އޮފިޝަލަކު ވިދާޅުވީ ރަސްފަންނު ބަލަހައްޓަން ސޮއިކުރީ ހައުސިން މިނިސްޓްރީއާ އެކު ކަމަށެވެ.

ކިއޮސްކަކީ އެމްޓީސީސީން އެހެން ފަރާތަކާ ހަވާލުކޮށްފައިވާ ތަނެއް ކަމަށާއި އެ ސަރަހައްދުގެ މަރާމާތަކީ، ކިއޮސްކު ހިންގާ ކުންފުނީގެ އިޖުތިމާއީ ޒިންމާގެ ދަށުން ކޮށްދޭންޖެހޭ ކަމެއް ކަމަށް އޮފިޝަލް ވިދާޅުވި އެވެ.

އޭނާ ވިދާޅުވީ ހަޓުތަކާއި ބާބަކިއު އޭރިއާ އަދި މަސްބާނާ ސަރަހައްދު ވަރަށް ބޮޑަށް ހަލާކުވެފައި ހުރުމުން އެ ތަން މަރާމާތު ކުރެވޭނެ ގޮތްތަކެއް ހޯދަން އުޅުނު ކަމަށެވެ. އެކަމަކު، މިހާތަނަށް ސިޓީ ކައުންސިލްގެ ހުއްދައަށް އެދުނަސް އެކަމަށް އަދިވެސް ޖަވާބެއް ނުލިބޭ ކަމަށް އޮފިޝަލް ވިދާޅުވި އެވެ.

"ހުއްދަ ނުލިބޭތީ މަސައްކަތް ނުފެށި ލަސްވަނީ،" އެމްޓީސީސީން ބުންޏެވެ.

ރަސްފަންނު ވަރަށް ބޮޑަށް ހަލާކުވެފައިވާ ތަންތަން ދައްކުވައިދޭ ވީޑިއޯއެއް "މިހާރު" އިން އިއްޔެ އާއްމުކުރުމުން މާލޭގެ މޭޔަރު އާދަމް އާޒިމް ރޭ "ވިދާޅުވީ ޕާކުތަކާއި މައިޒާންތައް ބެލެހެއްޓުމަކީ ސިޓީ ކައުންސިލްގެ ޒިންމާއަކަށް ވިއަސް ރަސްފަންނު މަރާމާތު ކުރަން އެމްޓީސީސީއާ އޮތީ ހަވާލުކޮށްފައި ކަމަށެވެ.

އާޒިމް ވިދާޅުވީ ސިޓީ ކައުންސިލުން މަރާމާތު ނުކުރަނީ، އެ މަސައްކަތް ކުރަން ބަޔަކާ ހަވާލުކޮށްފައި ހުރުމުން ކަމަށެވެ.

"އެގްރިމެންޓެއް އޮތީމާ، އެ އަށް އިހުތިރާމް ކުރަން ވެގެން އަޅުގަނޑުމެން އެ މަސައްކަތް ނުކުރަނީ. އެކަމަކު، ރަސްފަންނުގައި ހުންނަ ކުނި އެއްޗެހި ނަގައި ސާފުކުރަން،" އާޒިމް ވިދާޅުވި އެވެ.