އެމްޔޫ މަނިކަކީ ވިޔަފާރީގައި އިންތިހާއަށް ފަރުވާތެރި ނަމޫނާ ވިޔަފާރިވެރިއެއް: ގާސިމް

އާލާސްކަންފުޅު ގޯސްވެ، ސިންގަޕޫރުގައި ފަރުވާ ހޯއްދަވަމުން ގެންދަވަނިކޮށް މިއަދު ހެނދުނު އަވަހާރަވި، ރާއްޖޭގެ ޓޫރިޒަމްގެ އެއް ބާނީ މުހައްމަދު އުމަރު މަނިކު (އެމްޔޫ) އަކީ ވިޔަފާރީގައި އިންތިހާއަށް ފަރުވާތެރި ނަމޫނާ ވިޔަފާރިވެރިއެއް ކަމަށް ވިލާގެ ޗެއާމަން ގާސިމް އިބްރާހިމް ވިދާޅުވެއްޖެ އެވެ.

ދައުލަތަށް 19 އަހަރަށް ވުރެ ގިނަ ދުވަހު ހިދުމަތް ކުރައްވަވާފައިވާ އެމްޔޫ މަނިކު އުމުރުން 78 އަހަރުގައި އަވަހާރަވީ ސިއްހީ ހާލު ވަރަށް ބޮޑަށް ގޯސްވެ، ސިންގަޕޫރުގައި ފަރުވާ ހޯއްދަވަމުން އަންނަނިކޮށް، އެ ގައުމުގެ ގަޑިން މިއަދުގެ ހެނދުނު 6:30 ގަ އެވެ.

ރާއްޖޭގެ ޓޫރިޒަމްގެ އެކި ހަރުފަތްތަކުގައި ހީވާގިކަމާއި ކެރުންތެރިކަމާ އެކު މަސައްކަތް ކުރައްވަމުން އައި އެމްޔޫ މަނިކު އަވަހާރަވުމާ ގުޅިގެން އެކްސްގައި ކުރެއްވި ތައުޒިޔާގެ ޕޯސްޓެއްގައި ޓޫރިޒަމް ސިނާއަތުގެ އެންމެ މުހިންމު އެއް ބައިވެރިޔާ ގާސިމް ވިދާޅުވީ، އެމްޔޫ މަނިކަކީ ގައުމަށް ނުހަނު ގިނަ ހިދުމަތްތަކެއް ކުރެއްވި ބޭފުޅެއް ކަމަށެވެ. ހާއްސަކޮށް އެއީ ގާސިމާ އެކުގައި މަސައްކަތް ކުރެއްވި ގާތް އެކުވެރިއެއްކަން ފާހަގަކުރެއްވި އެވެ.

"ޝައްކެތް ނެތެވެ. އެމްޔޫ މަނިކު އަވަހާރަވުމަކީ، މުޅި ރާއްޖެ އަށް ލިބިގެންދިޔަ ހިތާމައެކެވެ. ފަތުރުވެރިކަމުގެ އާއިލާ އަށް ލިބިގެންދިޔަ ނުހަނު ބޮޑު ހިތާމައެކެވެ،" ގާސިމް ވިދާޅުވި އެވެ.

ރިސޯޓު ވިޔަފާރީގައި ރާއްޖޭގައި އެންމެ ކާމިޔާބު އެއް ކުންފުނި، ޔުނިވާސަލްގެ ޗެއާމަން އެމްޔޫ މަނިކުގެ އަގުވަޒަންކޮށް ސަރުކާރުން ވަނީ 2011 ވަނަ އަހަރު އޭނާ އަށް ދިވެހި ދައުލަތުގެ އިއްޒަތް އަރުވައިފަ އެވެ. އޭގެ ކުރިން 1982 ވަނަ އަހަރު ހިތްވަރު ދިނުމުގެ އިނާމު އަދި 2002 ވަނަ އަހަރު ޝަރަފުވެރިކަމުގެ އިނާމު ވެސް ސަރުކާރުން ދިނެވެ. މީގެ އިތުރުން ރާއްޖޭގެ މިނިވަންކަމަށް 25 އަހަރު ފުރުމުގެ މުނާސަބަތުގައި ދިން ހިދުމަތުގެ އިނާމާއި ދައުލަތަށް ގިނަދުވަހު ހިދުމަތް ކުރެއްވި އިއްޒަތްތެރިއެއްގެ ލަގަބު ވެސް އެމްޔޫ މަނިކަށް ވަނީ ލިބިވަޑައިގެންފަ އެވެ.

އެމްޔޫ މަނިކު ފާހަގަ ކުރެވިފައި ވަނީ ރާއްޖެ ވަރަށް ފަގީރު ހާލަތުގައި އޮއްވައި، ޓޫރިޒަމްގެ ނަފާއިން އިގުތިސާދަށް ކުރިއެރުން ލިބޭނެކަން ދިވެހިންނަށް ވިސްނަވައި ދެއްވައި، އެ ސިނާއަތު އެކި ދައުރުތަކުގައި ތަރައްގީ ކުރެއްވި އެއް މޭސްތިރިޔާގެ ގޮތުގަ އެވެ. ހާއްސަކޮށް ޓޫރިޒަމް ސިނާއަތަށް ޒުވާނުން ނެރުމުގެ އިތުރުން އެކިއެކި ދާއިރާތަކުން އަމިއްލަ ގޮތުން އެހީތެރިކަން ދެއްވުމުގައި ވެސް އެމްޔޫ މަނިކު މަސައްކަތް ކުރެއްވި އެވެ.

އެމްޔޫ މަނިކުގެ ޖަނާޒާ ބާއްވަން ނިންމާފައި ވަނީ މިއަދުގެ އަސްރު ނަމާދަށް ފަހު ސިންގަޕޫރުގެ ޕްރަސާރާ އަމަން މިސްކިތުގަ އެވެ. އަދި ޣައިބަށް ކުރާ ކަށުނަމާދު މިއަދުގެ އަސްރު ނަމާދަށް ފަހު އިސްލާމީ މަރުކަޒުގައި އޮންނާނެ އެވެ،