ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމުން ރުކުމާ އިސްތިއުފާ ދެއްވައިފި

ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމުން މުހައްމަދު އަބްދުލް ކަރީމް (ރުކުމާ) އިސްތިއުފާ ދެއްވައިފި އެވެ.

އޭނާ "މިހާރު" އަށް މިއަދު ވިދާޅުވީ ރަށްރަށުގެ ޔުޓިލިޓީ ހިދުމަތްދޭ ކުންފުނިން މިދިޔަ ޖޫން މަހުގެ 22 ވަނަ ދުވަހު ވަކިވެވަޑައިގެންފައިވާ ކަމަށެވެ. ނަމަވެސް ސަބަބެއް ވިދާޅުނުވި އެވެ.

މި ސަރުކާރާ އެކު، ރުކުމާ އެންމެ ފުރަތަމަ ހަމަޖެއްސީ ވެމްކޯގެ ޑެޕިއުޓީ މެނޭޖިން ޑިރެކްޓަރަކަށެވެ. ފެނަކައިގެ ޑެޕިއުޓީ މެނޭޖިން ޑިރެކްޓަރަކަށް އޭނާ އައްޔަން ކުރެއްވީ މިދިޔަ އަހަރުގެ އޮގަސްޓް މަހު އެވެ.

ރުކުމާ އިސްތިއުފާ ދެއްވިއަސް ފެނަކައިގެ ޑެޕިއުޓީ މެނޭޖިން ޑިރެކްޓަރުކަމުގައި އިތުރު ބޭފުޅަކު އެބަ ހުންނެވި އެވެ.

ފެނަކައިން ވަނީ ޑެޕިއުޓީ މެނޭޖިން ޑިރެކްޓަރުކަމުގައި ރުކުމާ ކޮށްދެއްވި މަސައްކަތްތަކަށް ޝުކުރު އަދާކުރައްވައިފަ އެވެ. ކުންފުނިތަކުގެ ޑެޕިއުޓީ މެނޭޖިން ޑިރެކްޓަރުން ހަމަޖައްސަވަނީ އެ ކުންފުންޏެއްގެ ބޯޑުންނެވެ.