ހަލާލް ޓޫރިޒަމް ފަށަން ރަށްތަކެއް ކަނޑައަޅަން ރައީސް ނިންމަވައިފި

ރާއްޖެ އަށް ހަލާލް ޓޫރިޒަމް ތައާރަފްކުރަން ތައްޔާރުވެފައިވާކަން ރައީސް ޑރ. މުހައްމަދު މުއިއްޒު މިއަދު އިއުލާނު ކުރައްވައިފި އެވެ.

ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ޓޫރިޒަމް މުޅި ދުނިޔޭގައި މަޝްހޫރުވެފައި ވަނީ، ދެމެހެއްޓެނިވި ގޮތެއްގައި ސިނާއަތް ކުރިއަރުވައި، ޓޫރިސްޓުން ރާއްޖޭގައި ކުރާ ތަޖުރިބާ އާއި އަދާކުރާ މެހެމާންދާރީގެ ނަމޫނާއެއްގެ ގޮތުގައި ކަމަށެވެ.

އެހެންވެއާ އެކު، ރާއްޖެ އިން މިހާރު އަމާޒު ހިފާފައިވަނީ، އެ މަނިކުފާނު ވިދާޅުވި ގޮތުގައި ހަލާލް ޓޫރިޒަމްގެ މަންޒިލެއްގެ ގޮތުގައި ވެސް ދުނިޔޭގެ މަގުބޫލުކަން ހޯދުމަށެވެ.

ރައީސް ވަނީ، ރާއްޖޭގައި ހަލާލް ޓޫރިޒަމް ތަރައްގީ ކުރަން ހާއްސަ ކޮށްގެން ރަށްތަކެއް ކަނޑައަޅަން ނިންމާފައިވާ ކަން އިއުލާނު ކުރައްވައިފި އެވެ.

މިކަމުގެ ތެރެއިން، އިންވެސްޓަރުންނަށް ބޮޑެތި އިނާޔަތްތަކާއި ލުއިތަކެއް ލިބޭ ކަމަށާއި މިއީ ރާއްޖޭގެ ޓޫރިޒަމް ސިނާއަތް ސިންދަފާތު ކުރުމުގައި ލިބޭނެ ބޮޑު އެހީތެރިކަމެއްގެ ގޮތުގައި އެ މަނިކުފާނު ސިފަކުރެއްވި އެވެ.

ރައީސް މުއިއްޒު ވިދާޅުވީިގޮތުގައި، ރާއްޖެއަށް ހަލާލް ޓޫރިޒަމް ތައާރަފްކުރުމުގެ ޕްލޭން މި ފެށޭ ހަފްތާގެ ތެރޭގައި ޓޫރިޒަމް މިނިސްޓްރީން އާންމުކުރާނެ އެވެ. އަދި ދުނިޔޭގެ އެކި ކަންކޮޅުތަކުން އިންވެސްޓަރުންނަށް މަރުހަބާ ކިޔަން ރާއްޖެ ތައްޔާރަށް އޮތް ކަމަށް ވިދާޅުވި އެވެ.