ޚަތީބުންގެ ކޯހުގައި 50 ކައުންސިލަރުންނަށް ފުރުސަތު ހުޅުވާލައިފި

ޚަތީބުން ތަމްރީން ކުރަން ކުރިއަށް ގެންދާ ޕްރޮގްރާމްގައި، 50 ކައުންސިލަރުން ބައިވެރިވާން ފުރުސަތު ހުޅުވާލައިފި އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވީ، މިއީ، ކައުންސިލަރުންނަށް އަމާޒުކޮށްގެން ކުރިއަށް ގެންދަން ނިންމާފައިވާ ތަމްރީންގެ ފުރަތަމަ ބުރު ކަމަށެވެ. މި ބުރުގައި 50 ޖާގައަށް ފުރުސަތު ދޭނެ ކަަމަށް މިނިސްޓަރު ވިދާޅުވި އެވެ.

ހުކުރު ކުރުމާއި ޚުތުބާ ކިޔުމުގެ ހުއްދަ ލިބޭ މި ކޯހާ ގުޅޭ ގޮތުން، އިސްލާމިކް މިނިސްޓްރީން ގެޒެޓްކުރި އިއުލާނުގައި ބުނީ 15 ހަފްތާއަށް ކުރިއަށްދާ އެ ޕްރޮގްރާމުގައި ބައިވެރިވެވޭނީ ފިރިހެން ކައުންސިލަރުންނަށް އެކަނި ކަމަށެވެ. އޮންލައިންކޮށް ކިޔެވުން ކުރިއަށް ގެންދާނީ ބަންދު ނޫން ހުރިހާ ދުވަހެއްގެ ރޭގަނޑު 8:30 އިން 10:30 އަށެވެ.

މިނިސްޓްރީން ބުނި ގޮތުގައި ކޯހަށް ހޮވުމުގައި ބަލާނީ ގުރުއާން ފަރިތަކަމާ އެކު ކިޔަން އެނގުމާއި ދިވެހި ބަހާއި އަރަބި ބަހުގެ ކިޔުމުގެ ފަރިތަ ކަމަށެެވެ.

ޕްރޮގްރާމުގައި ބައިވެރިވާން ސީވީ އާއި އައިޑީކާޑު ފަދަ ތަކެތި ހުށަހެޅުމުގެ ފުރުސަތު އޮންނާނީ މި މަހުގެ 25 ވަނަ ދުވަހުގެ 1:00 ގެ ކުރިން ކަމަށް މިނިސްޓްރީން ބުންޏެވެ.

ކައުންސިލަރުންނަށް ޚާއްސަ ކޯހެއް ފަށަން ނިންމިއިރު، ޒުވާން ޚަތީބުން ތަމްރީންކުރަން އިސްލާމިކް މިނިސްޓްރީން އަންނަނީ ޕްރޮގްރާމެއް ހިންގަމުންނެވެ. މިހާތަނަށް 400 އަށް ވުރެ ގިނަ ކުދިން ފުރިހަމަކޮށްފައިވާ އެ ޕްރޮގްރާމަކީ ސްކޫލު ނިންމާފައި ތިބޭ ކުދިންނަށް ޚުތުބާ ކިޔުމާއި ހުކުރު ކުރުމުގެ ހުއްދަ ދިނުމަށްޓަކައި ސަރުކާރުން ކުރިއަށް ގެންދާ ޕްރޮގްރާމްއެކެވެ.

ޚަތީބުންނާ އެކު ހާފިޒުން ތަމްރީންކުރުމުގެ ޕްރޮގްރާމެއް ވެސް ކުރިއަށް ގެންދެ އެވެ. ސަރުކާރުގެ އަމާޒަކީ ފަސް އަހަރު ތެރޭގައި 1،000 ކުދިން ހާފިޒުންނަށް ހެދުމެވެ. ރާއްޖޭގައި މި ވަގުތު 266 ހާފިޒުން އެބަތިއްބެވެ. އެއީ 126 އަންހެނުންނާއި 140 ފިރިހެނުންނެވެ.