ނައިފަރު ގުރުއާން ލާނިން ސެންޓަރަށް ވަގުފު ފަންޑުން އެހީވަނީ

ޅ. ނައިފަރުގައި ވަގުފު ފަންޑުގެ އެހީގައި ގުރުއާން ލާނިން ސެންޓަރެއް ތަަރައްގީކޮށްދޭން ނިންމައިފި އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ނައިފަރަކީ ގިނަ އަދަދެއްގެ ކުދިންތަކެއް ގުރުއާން ހިތުދަސްކުރި ރަށެއް ކަމަށާއި އެ ރަށުގައި ވަގުފު ފަންޑުގެ އެހީގައި ގުރުއާން ލާނިން ސެންޓަރު ތަރައްގީކުރުމަށް ނިންމަވާފައިވާ ކަމަށެވެ.

ޝަހީމް ވިދާޅުވި ގޮތުގައި އެ ނިންމެވުން ނިންމެވީ އެ ގުރުއާން ލާނިން ސެންޓަރު ތަރައްގީކުރުމަށް ބޭނުންވާ ވަސީލަތްތައް ހޯދުމަށް އެދިފައިވާތީ އެވެ.

އެހެންވެ، އެ ސެންޓަރަށް ވަގުފު ފަންޑުން އެހީ ފޯރުކޮށްދޭން ނިންމިއިރު މީގެ ދެ ދުވަހެއް ކުރިން ބޭއްވި ހާފިޒުންގެ ދަސްވެނިވުމުގެ ރަސްމިއްޔާތުގައި ގުރުއާން ހިތުދަސްކޮށް ހާފިޒު ކަމުގެ ސަނަދު ހާސިލުކޮށްގެން 24 ފަރަތާކަށް ލިޔުންދިންއިރު އޭގެ ތެރެއިން ހަތަރު ދަރިވަރުންނަކީ މި ސެންޓަރުން ގުރުއާން ހިތުދަސްކުރި ކުދިންނެވެ.

އެކަމަކު އެ ސެންޓަރުގެ ހާލަތު އޮތީ ވަރަށް ދަށްކޮށެވެ. ފާރުތަކުގައި ރެނދުލާއި އެތަނުން ފެން ވަންނަ މައްސަލަ ބޮޑުވެ، އެތަން ހިންގަމުންދާ ފަރާތުން ވެސް އެކަން ސޯޝަލް މީޑިއާގައި ހިއްސާކޮށްފައިވެ އެވެ.

މިނިސްޓްރީން ވަގުފު ފަންޑު އުފެއްދީ މިސްކިތްތައް އިމާރާތް ކުރުމަށާއި މިސްކިތްތަކުގެ މަރާމާތަށާއި ހޯދަންޖެހޭ ތަކެތި ހޯދުމުގެ އިތުރުން އެހެން ގޮތްގޮތުން ވެސް ބޭނުންވާ އެކިއެކި ކަންކަމަށް ފައިސާ ޖަމާކުރެވޭނެ މަގެއް ފަހިކުރާށެވެ.