ހާފިޒުންނަށް ތާރީހީ ރެއެއް، އިތުރު 24 ފަރާތަކުން ގުރުއާން ހިތުދަސްކޮށްފި

ގުރުއާން ހިތުދަސްކޮށް ހާފިޒު ކަމުގެ ސަނަދު ހާސިލް ކުރެއްވި 24 ހާފިޒަކަށް ރައީސް ޑރ. މުހައްމަދު މުއިއްޒު މިރޭ ގައުން އާއި ހަނދާނީ ލިޔުން ދެއްވައިފި އެވެ.

ހާފިޒުންނަށް ހަނދާނީ ލިޔުން ދިނީ ހާފިޒުން ދަސްވެނިވުމަށް ހާއްސަކޮށް ރާއްޖޭގައި ފުރަތަމަ ފަހަރަށް މިރޭ ބޭއްވި ހަފުލާގަ އެވެ.

ރައީސް މުއިއްޒު މެޑަލް އެރުވި ހާފިޒުންގެ ތެރޭގައި ހިމެނެނީ މިދިޔަ އަހަރުގެ ޖުލައި މަހުން ފެށިގެން މި މަހުގެ ނިޔަލަށް ގުރުއާން ހިތުދަސްކުރެއްވި ހާފިޒުންނެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ، މިވަގުތަށް 250 ކުދިންނަށް ހާފިޒު ކަމުގެ ސަނަދު މިނިސްޓްރީން ދީފައިވާ ކަމަށެވެ.

ސަރުކާރުގެ އަމާޒަކީ ފަސް އަހަރު ތެރޭގައި 1،000 ކުދިން ހާފިޒުންނަށް ހެދުން ކަމަށް އޭނާ ވިދާޅުވި އެވެ.

ޝަހީމް ވިދާޅުވީ އެ ގައުނަކީ އެ ކުދިންނަށް ހާއްސަކޮށް ފަރުމާ ކޮށްފައިވާ ގައުނެއް ކަމަށެވެ.

"އެ ގައުނާ އެކު ތުރުކުރައްވާ ތާކިހާ އުސޫލެއްގެ ތެރެއިން ކުދިންނަށް މިލްކު ކުރެވޭނެ. އަދި އެ ކުދިން ބައިވެރިވެވަޑައިގަންވާ ހާއްސަ ހަފުލާތަކާއި ޖަލްސާތަކުގައި ގުރުއާން ކިޔެވުމާއި ވަޑައިގަނަންވާ ބޭފުޅުންނަށް ހުތުބާ ދެއްވުމާއި މި ކަންކަމަށް އެ ތާކިހާ ބޭނުން ކުރެވޭނެ،" މިނިސްޓަރު ވިދާޅުވި އެވެ.

"އެއީ އެކަމަށް ހާއްސަ ކުރެވިފައިވާ ތާކިހާއެއް. ތާކިހާ އަޅައިގެން ހުއްޓާ ފެނިއްޖިއްޔާ ބައްލަވާ އެއީ ހާފިޒެއް ކަމަށް. އަދި އެ ގައުން ވެސް އެ ކުދިންނަށް މިލްކު ކުރެވޭނެ."

މާލޭ ހުކުރު މިސްކިތުގެ ހިތްގައިމު ޑިޒައިންތައް ހިމެނޭހެން ނުލާއި ރަންކުލައިން ފަރުމާކޮށްފައިވާ މި ގައުން އިން ދައްކުވައިދެނީ ރާއްޖޭގެ އިސްލާމީ ތާރީހާއި ސަގާފަތާއި ދިވެހިންގެ މެދުގައިވާ އިސްލާމީ އުހުއްވަތްތެރިކަން ކަމަށް އިސްލާމިކް މިނިސްޓްރީން ބުންޏެވެ.