ރައީސް، ސައުދީގެ ހައްޖު މިނިސްޓަރާ ބައްދަލުކުރައްވައިފި

‎ރައީސް ޑރ. މުހައްމަދު މުއިއްޒު، ސައުދީ އަރަބިއްޔާގެ ހައްޖު އެންޑް އުމްރާ މިނިސްޓަރު، ޑރ. ތައުފީގު ބިން ފައުޒާން އައްރަބީއާ މިއަދު ބައްދަލުކުރައްވައިފި އެވެ.

ރައީސް އޮފީހުން ބުނީ ‎މިނާގައި ހުންނަ ހައްޖު މިނިސްޓްރީގެ އޮފީހުގައި ބޭއްވި ބައްދަލުވުމުގައި ސައުދީ ސަރުކާރުން ދެއްވާ މެހުމާންދާރީއަށާއި އެއްބާރުލެއްވުމަށް އަދި ހުރިހާ ހައްޖާޖީންނަށް ފޯރުކޮށްދެއްވި ފުރިހަމަ ހިދުމަތަށްޓަކައި ރައީސް ޝުކުރު އަދާކުރެއްވި ކަމަށެވެ.

އެ މަނިކުފާނު ވަނީ މައްކާ ރޫޓް އިނީޝިއޭޓިވްގައި ރާއްޖެ ހިމެނުމާ އެކު ހައްޖުވެރިން ދަތުރުކުރުމުގައި ލިބުނު ލުއިފަސޭހަކަމަށް އަދި ހައްޖާޖީންނަށް ދެއްވި ހާއްސަ މެހުމާންދާރީ އާއި އެ ގައުމުގައި ތިބުމަށް އެކޮމޮޑޭޝަން ހަމަޖެއްސުމުގެ އިންތިޒާމުތަކުގެ ފުރިހަމަކަމަށް ތައުރީފު ކުރައްވައިފަ އެވެ.

ރައީސްގެ ދެކަނބަލުން ވަނީ ސައުދީ ރޯޔަލް ކޯޓުގެ ދަށުން މި އަހަރު ހައްޖަށް ވަޑައިގެންފަ އެވެ. ރައީސްއާ އެކު މަތީ ފަންތީގެ ވަފުދެއް ވެސް ދަތުރުގައި ބައިވެރިވެވަޑައިގަތެވެ. އެ ދަތުރުފުޅުގެ ހުރިހާ ކަމެއް ހަމަޖައްސަވާފައިވަނީ އެ ގައުމުގެ ސަރުކާރުންނެވެ.