ދިވެހިންނާ ދޭތެރޭގައި ސައޫދީން ބާއްވަނީ އެއްބަނޑުއެއްބަފާކަމުގެ ގުޅުން: ރައީސް

ރާއްޖެއާ ދޭތެރޭގައި ސައޫދީ އަރަބިއްޔާގެ ސަރުކާރުން ބާއްވަނީ ވަރަށް ގާތް ގުޅުމެއް އަދި އެ ގައުމުން ދެކެނީ ދިވެހިންނަކީ އެއްބަނޑުއެއްބަފާ ބައެއްގެ ގޮތުގައި ކަމަށާއި އެއީ ވަރަށް މުހިންމު ކަމެއް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އެ މަނިކުފާނު އެހެން ވިދާޅުވީ، ރާއްޖެ އިން މި އަހަރު ހައްޖަށް ދިޔަ މީހުންނާ މައްކާގައި ބައްދަލުކުރައްވައި ދެއްކެވި ވާހަކަފުޅުގަ އެވެ.

ސައޫދީ ރަސްގެފާނުގެ ހާއްސަ މެހުމާންދާރީގެ ދަށުން މި އަހަރުގެ ހައްޖުގެ އަޅުކަން އަދާކުރައްވަން ރައީސް މުއިއްޒުގެ ދެކަނބަލުން ވެސް މިހާރު އުޅުއްވަނީ މައްކާގަ އެވެ.

އެ ދަތުރުފުޅުގެ ތެރެއިން ދިވެހި ހައްުޖުވެރިންނާ ބައްދަލުކުރައްވައި ރައީސް ވިދާޅުވީ، ދިވެހި ސަރުކާރުން ވެސް އެންމެ ބޮޑު އިސްކަމެއް ދެނީ ދިވެހި ހައްޖުވެރިންގެ ކަންކަން ވީހާ ވެސް ބޮޑަށް ފުރިހަމަ ކޮށްދޭން ކަމަށެވެ. އެހެންވެ، އިސްލާމިކް މިނިސްޓްރީ އާއި ހައްޖު ކޯޕަރޭޝަނުން ހައްޖުވެރިންގެ ކަންކަން ވަރަށް ގާތުން ބަލައި، ކަންކަން ފުރިހަމަ ކޮށްދޭނެ ކަމަށް އެ މަނިކުފާނު ވިދާޅުވި އެވެ.

"މި ފަހަރު ހާއްސަ ކްލިނިކެއް ވެސް ހަމަޖެހިގެން ގޮސްފައިވޭ. އެއީ ވެސް ހަމަ ސައޫދީ ސަރުކާރުގެ ވަރަށް ބޮޑު އެހީތެރިކަމަކާ އެކީގައި ވަރަށް އިސްކަމެއް ދެއްވައިގެން ކޮށްދެއްވި ކަމެއް. އެހެންވީމާ މި ގޮތަށް ހުރިހާ ކަމެއް ވެސް ތަރުތީބު ކުރެވިގެން މި ގެންދެވެނީ،" ރައީސް ވިދާޅުވި އެވެ.

ދެން ރައީސް ވިދާޅުވީ، މިނާގައި ދިވެހި ހައްޖުވެރިން ތިބޭނެ ތަނުގެ ވާހަކަ އެވެ. ކުރިއަށް ވުރެ މާ ފަސޭހަ އަދި އެ ތަން "މަތީ ކެޓަގަރީއަކަށް" ސައޫދީ ސަރުކާރުން ހަމަޖައްސައިދީފައިވާ ކަމަށް އެ މަނިކުފާނު ވިދާޅުވި އެވެ.

ރައީސް މުއިއްޒު ވިދާޅުވީ، މި ފަހަރުގެ ހައްޖުގެ އަޅުކަމުގެ ހުރިހާ ކަމެއް ވެސް ވަރަށް ފަސޭހަވާނެ ކަމަށް އެ މަނިކުފާނު އުންމީދު ކުރައްވާ ކަމަށެވެ.

ރައީސް ފާހަގަކުރެއްވި ގޮތުގައި ދިވެހި ހައްޖުވެރިން މި ފަހަރު ސައޫދީ އަށް ދަތުރުކުރުމުގައި ސައޫދީ ރަސްގެފާނާއި ވަލީ އަހުދުގެ ހާއްސަ ނިންމެވުމެއްގެ ދަށުން ބޮޑެތި ފަސޭހަތަކެއް ވަނީ ލިބިފަ އެވެ. އެ މަނިކުފާނު އެ އިޝާރާތް ކުރައްވަނީ މައްކާ ރޫޓް އިނިޝިއޭޓިވްގެ މެމްބަރެއްގެ ފުރުސަތު ފުރަތަމަ ފަހަރަށް ރާއްޖެ އަށް ދިނުމުން ހައްޖުގެ އަޅުކަމަށް ދަތުރުކުރުމުގައި ލިބުނު ބޮޑެތި ފަސޭހަތަކަށެވެ.

މައްކާ ރޫޓް އިނީޝިއޭޓިވްގައި ރާއްޖެ ބައިވެރި ކުރުމުން ޖިއްދާ އާއި ވެލާނާ އިންޓަނޭޝަނަލް އެއާޕޯޓުގައި ނުވަތަ އިމިގްރޭޝަންގެ ކިއޫގައި އެއްވެސް ގޮތަކަށް މަޑުކުރަން ނުޖެހި އަވަހަށް ހޮޓަލަށް ދެވޭނެ އިންތިޒާމު މި ފަހަރު ހަމަޖެހުނެވެ. އަދި ޖިއްދާގެ އެއާޕޯޓުން ވެސް ހާއްސަ ގޮތްތަކެއް ދިވެހިންނަށް ބެހެއްޓި އެވެ.

ރައީސް މުއިއްޒު މިއަދު ވަނީ އެ ކަމަށްޓަކައި ސައޫދީގެ ރަސްގެފާން ސަލްމާން ބިން އަބްދުލްއަޒީޒާއި ވަލީއަހުދު މުހައްމަދު ބިން ސަލްމާނަށް ދިވެހިންގެ ފަރާތުން ހާއްސަ ޝުކުރެއް ދަންނަވައިފަ އެވެ.