މެހުމާންދާރީގެ ފުރިހަމަ ކަމަށްޓަކައި ރައީސް މުއިއްޒުގެ ހާއްސަ ޝުކުރު ސައޫދީގެ ރަސްގެފާނަށް

ހައްޖުވެރިންނަށާއި އުމްރާގެ އަޅުކަމަށް ދާ މީހުންނަށް އަދި ދެ ހަރަމްފުޅަށް ޒިޔާރަތް ކުރުމަށް ސައޫދީ އަރަބިއްޔާ އަށް ދާ ކޮންމެ މީހަކަށް ވެސް ދެއްވާ ހާއްސަ މެހުމާންދާރީ އާއި ހިދުމަތްތަކަށާއި ފަހިކޮށްދެއްވާ ފަސޭހަތަކަށްޓަކައި އެ ގައުމުގެ ރަސްގެފާނު ސަލްމާން ބިން އަބްދުލް އަޒީޒަށާއި ވަލީއަހުދު މުހައްމަދު ބިން ސަލްމާނަށާއި ސައޫދީގެ ސަރުކާރަށް ރައީސް ޑރ. މުހައްމަދު މުއިއްޒު ހާއްސަ ޝުކުރެއް ދަންނަވައިފި އެވެ.

މި އަހަރުގެ ހައްޖުގެ އަޅުކަމަށް މި ވަގުތު މައްކާގައި ހުންނެވި ރައީސް މުއިއްޒުގެ ހާއްސަ ޝުކުރު އެ ދެބޭފުޅުންނަށް އަރިސް ކުރެއްވީ އެ މަނިކުފާނުގެ "އެކްސް" އެކައުންޓުގައި އަރަބި ބަހުން ރޭ ކުރެއްވި ޕޯސްޓެއްގަ އެވެ.

ސައޫދީގެ ރަސްގެފާނާއި ވަލީއަހުމަދު އަދި ސަރުކާރުގެ އޯގާތެރިކަން ރައީސް މުއިއްޒު ސިފަކުރައްވާފައިވަނީ، ހިތަށް ވެސް ގެންނަން ދަތި، މަތިވެރި ހިދުމަތްތަކެއްގެ ގޮތުގައެވެ. އަދި ހުއްޓުމެއް ނެތި އެ ބޭފުޅުން ކުރައްވާ ބުރަ މަސައްކަތްޕުޅެއްގެ ގޮތުގަ އެވެ.

ސައޫދީ ރަސްގެފާނުގެ ސަލްމާންގެ ހާއްސަ މެހުމާންދާރީގައި ހައްޖުގެ އަޅުކަމަށް ވަޑައިގެން އުޅުއްވަމުން ރައީސް މުއިއްޒު ވަނީ ސައޫދީ އަރަބިއްޔާގެ ރައްޔިތުންނަށް އިސްލާމްދީނަށް ހިދުމަތް ކުރުމުގެ ތައުފީގު އަބަދުވެސް ދެއްވުން އެދި ދުއާ ކުރައްވައިފަ އެވެ. އަދި އެ ބޭފުޅުންގެ ހިދުމަތުގައި ހެޔޮ ދަރުމަ އާއި ސަވާބު މިންވަރު ކުރެއްވުން އެދިވަޑައިގެންނެވި އެވެ.

ރައީސް މުއިއްޒުގެ ޕޯސްޓުގައި ވަނީ ހަސަދަވެރިންނާއި ހިޔާނާތްތެރިންނާއި މަކަރުވެރިންގެ ނުރައްކަލުން ސައޫދީ އަރަބިއްޔާ ސަލާމަތް ކޮށްދެއްވުމަށް ވެސް އެދިވަޑައިގެންފަ އެވެ.

ދިވެހި ހައްޖުވެރިންނާ ބައްދަލުކުރައްވައި މިދިޔަ ހޯމަ ދުވަހު ދެއްކެވި ވާހަކަފުޅުގައި ވެސް ރައީސް ވަނީ ސައޫދީ އަރަބިއްޔާ އަށާާއި ރަސްގެފާނު ސަލްމާނާއި ވަލީއަހުދު މުހައްމަދަށް ތައުރީފު ކުރައްވައިފަ އެވެ. އެ މަނިކުފާނު ވިދާޅުވީ ރާއްޖެއާ ދޭތެރޭގައި ސައޫދީގެ ސަރުކާރުން ބާއްވަނީ ވަރަށް ގާތް ގުޅުމެއް އަދި އެ ގައުމުން ދެކެނީ ދިވެހިންނަކީ އެއްބަނޑުއެއްބަފާ ބައެއްގެ ގޮތުގައި ކަމަށެވެ.

ރާއްޖެ އިން މި ފަހަރު ހައްޖަށް ގެންދިޔަ މީހުންނަށް ސައޫދީ ސަރުކާރުން ހާއްސަ އިންތިޒާމުތަކެއް ވަނީ ހަޖަމައްސައި ދީފައި ކަމަށް ސަރުކާރުން ވަނީ ބުނެފަ އެވެ. އޭގެ ތެރެއިން އެންމެ ހާއްސަ ކަމަކީ "މައްކާ ރޫޓް އިނިޝިއޭޓިވް" ގައި މި ފަހަރު ރާއްޖެ އަލަށް ބައިވެރިކޮށް އޭގެ ފަސޭހަތައް ލިބުމެވެ. އެހެންވެ، ދިވެހި ހައްޖުވެރިން ވެލާނާ އިންޓަނޭޝަނަލް އެއާޕޯޓާއި ޖިއްދާ އެއާޕޯޓުގެ އިމިގްރޭޝަން ކައުންޓަރުގައި މަޑުކުރަން ނުޖެހި އެއާޕޯޓުން އަވަހަށް ނުކުތުމުގެ މަގު ފަހިވި އެވެ.

އަދި ދިވެހިން މިނާގައި ތިބި ޓެންޓުތައް "މަތީ ކެޓަގަރީ" އަށް ބަދަލުކޮށްދީފައިވާ ކަމަށް ވެސް ދިވެހި ސަރުކާރުން ވަނީ ބުނެފަ އެވެ.