މިނިވަން ދުވަހުގެ ލޯގޯ ފަރުމާކޮށްގެން 30،000ރ. ހޯދުމުގެ ފުރުސަތު ހުޅުވާލައިފި

ރާއްޖޭގެ މިނިވަންކަމަށް 60 އަހަރު ފުރޭ މުނާސަބާ ކުލަގަދަކޮށް ފާހަގަކުރާތީ، މި އަހަރުގެ މިނިވަން ދުވަހަށް ލޯގޯ ފަރުމާކޮށްގެން 30،000ރ. ލިބޭ މުބާރާތެއް ދިވެހިބަހާއި ސަގާފަތާއި ތަރިކައާ ބެހޭ މިނިސްޓްރީން ހުޅުވާލައިފި އެވެ.

އަންނަ ޖުލައި 26 ގައި ރާއްޖޭގެ މިނިވަންކަމަށް 60 އަހަރު ފުރުން ފާހަގަކުރުމަށް ބޭނުންކުރާނެ ލޯގޯއެއް ހޮވުމަށް ބާއްވާ މުބާރާތަށް ލޯގޯ ހުށަހެޅުމުގެ ސުންގަޑިއަކީ މި މަހުގެ 15 ވަނަ ދުވަހުގެ މެންދުރު 2:00 އެވެ.

ލޯގޯ ފަރުމާ ކުރުމުގައި އަމަލުކުރާނެ އުސޫލެއް ވަނީ ހަދައިފަ އެވެ. މިނިސްޓްރީން ބުނި ގޮތުގައި ލޯގޯގައި އިސްލާމްދީނާއި ދިވެހިބަހާއި ސަގާފަތާއި ދިވެހި ތަރިކައިގެ އިތުރުން ދިވެހިވަންތަކަމާއި ދިވެހި ބިމުގައި ދިވެހިންގެ ދައުލަތް މިނިވަންކަމާ އެކު ދެމިއޮތުން ރަމްޒުކޮށްދޭން ޖެހެ އެވެ.

ލޯގޯ ފަރުމާކުރުމުގައި އިސްކަންދޭން ޖެހޭ ކަންކަން:

- ދިވެހި ދައުލަތުގެ އެވޭލާކަމާއި މިނިވަންކަމުގެ 60 އަހަރު ރަމްޒު ކޮށްދިނުމާއި ކުރިމަގުގައި މިނިވަންކަމުގައި ދެމިތިބުމަށް ކުރާ އުއްމީދުތައް ރަމްޒު ކޮށްދިނުން.

- މިނިވަންކަމުގެ 60 އަހަރުގައި ދިވެހި ގައުމު ހޯދި ކުރިއެރުމާއި ކުރިއަތް އޮތް ތަނުގައި ހޯދުމަށް އުއްމީދުކުރާ ކުރިއެރުން.

- ލޯގޯގައި ބޭނުންކުރާ ކުލަތަކަކީ ގައުމީ ކުލަތަކަކަށް ވެފައި އިތުރު ކުލައެއް ބޭނުންކުރާ ނަމަ ދިވެހިންގެ ކަނޑާއި ރާއްޖޭގެ މާހައުލު ރަމްޒު ކުރާ ނޫކުލަ ބޭނުންކުރުން.

- މުނާސަބަތާ ގުޅިގެން ބެޖާއި ސްޓިކާގެ ގޮތުގައި ބޭނުންކުރަން ފަސޭހަ ފަރުމާއަކަށް ވުމާއި ބެނާ އާއި ޗާޕު ކުރާ ލިޔުންތަކުގައި ބޭނުންކުރަން ފަސޭހަ ފަރުމާއެއް ކަމަށް ވުމާއި ޓީޝާޓު ފަދަ ތަކެތީގައި ބޭނުންކުރަން ފަސޭހަ ފަރުމާއަކަށް ވުން.

- އިލެކްޓްރޯނިކް މީޑިއާ އާއި އެނިމޭޝަނާއި ވީޑިއޯތަކުގައި ބޭނުން ކުރެވޭ އެއްޗަކަށް ވުން.

މިނިސްޓްރީން ބުނި ގޮތުގައި ލޯގޯ އަށް ވަނަ ދިނުމުގައި ހަތަރު ކަމަކަށް ބަލާނެ އެވެ. އެއީ އެ ލޯގޯއެއްގެ ފެންވަރާއި ފަންނީ ކަންކަން ނުވަތަ ލޮމްޕޮޒިޝަންސް އާއި ޑިޒައިން އެލެމެންޓްސް އަށް 30 މާކްސް އާއި އަސްލުވަންތަކަމާއި އުފެއްދުންތެރިކަމާއި މަސައްކަތުގެ ބަޔަށް 20 މާކްސް އަދި ދިވެހިވަންތަކަމަށް 20 މާކްސް އާއި މިނިވަން 60 ގެ ސިފަތައް ރަމްޒު ކޮށްދީފައިވާ މިންވަރަށް 30 މާކްސް އެވެ.