މަތިވެރީގައި ގުރުއާން ހިތުދަސްކުރާ ކޮންމެ ކުއްޖަކަށް 50،000ރ.

އއ. މަތިވެރީގައި ގުރުއާން ހިތުދަސްކުރާ ކޮންމެ ކުއްޖަކަށް 50،000ރ. ގެ ފައިސާގެ އިނާމެއް ދޭން ނިންމައިފި އެވެ.

އެ ރަށު ކައުންސިލްގެ ރައީސް އަހުމަދު އަސްލަމް ވިދާޅުވީ ތަރައްގީގެ ޕްލޭން ފާސްކޮށްފައި ވާއިރު ހާފިޒުން އުފެއްދުން އޭގައި ހިމެނޭ ކަމަށެވެ. މިކަމަށް ހިތްވަރު ދިނުމަށް، ހާފިޒުކަމުގެ ސަނަދު ނަގާ ކޮންމެ ކުއްޖަކަށް ފައިސާގެ އިނާމު ދިނުން ޕްލޭނުގައި ހިމަނާފައިވާ ކަމަށް އޭނާ ވިދާޅުވި އެވެ.

މަތިވެރީގައި މި ވަގުތު އެއްވެސް ހާފިޒެއް ނެތެވެ. ނަމަވެސް، ދެ ކުއްޖަކު ގުރުއާން ހިތުދަސްކޮށް މުރާޖައާކުރުމުގެ މަރުހަލާގައި ތިބުމުން މި އަހަރު ރަށުގެ ފުރަތަމަ ދެ ހާފިޒުން ސަނަދު ނަގާނެ އެވެ.

"ގުރުއާންގެ އިލްމު ކުރިއަރުވައި އެ ކުދިންނަށް ހިތްވަރު ދިނުން ބޭނުމަކީ،" އަސްލަމް ވިދާޅުވި އެވެ.

ހާފިޒުން އުފެއްދުމަށް ބާރު އެޅުމަށް ކ. ހުރާ ކައުންސިލުން ވެސް ވަނީ ކޮންމެ ކުއްޖަކަށް 150،000ރ. ދޭން ނިންމައިފަ އެވެ.

ޒުވާން ހާފިޒުން ތަމްރީނު ކުރުމަށް ސަރުކާރުން އިސް ނަގައިގެން ވެސް އަންނަނީ މަސައްކަތްތަކެއް ކުރަމުންނެވެ. މިހާތަނަށް 250 ކުއްޖަކު ހާފިޒުކަމުގެ ސަނަދު ހާސިލް ކޮށްފައިވާއިރު، ސަރުކާރުގެ އަމާޒަކީ ހާފިޒުކަމުގެ ސަނަދު ހާސިލްކުރާ ކުދިންގެ އަދަދު ފަސް އަހަރު ތެރޭގައި 1،000 އަށް އިތުރު ކުރުމެވެ.

ކީރިތި ގުރުއާނާ ބެހޭ މަރުކަޒުން އެންމެ ފަހުން ދީފައިވާ މައުލޫމާތުން އެނގޭ ގޮތުގައި ރާއްޖޭގައި މި ވަގުތު 266 ހާފިޒުން އެބަތިއްބެވެ. އެއީ 126 އަންހެނުންނާއި 140 ފިރިހެނުންނެވެ.