ސައިކަލު ދުއްވަމުން ފޯނު ބޭނުންކުރި މީހެއްގެ ސައިކަލާއި ލައިސަންސް ހިފަހައްޓައިފި

ފޯނުން ގޭމު ކުޅެމުން ސައިކަލު ދުއްވި މީހަކު ޖޫރިމަނާކޮށް، ލައިސަންސާއި ސައިކަލު އެއް މަހަށް ހިފަހައްޓައިފި އެވެ.

އާންމުވެފައިވާ ވީޑިއޯގައި ފެންނަނީ މީހަކު ސައިކަލު ދުއްވަމުން ފޯނުން ގޭމު ކުޅެން އިން މަންޒަރެވެ. އަދި އޭނާގެ ފަހަތުގައި އޭރު ސައިކަލުގައި އެހެން ވެސް މީހަކު އިނދެ އެވެ.

ފުލުހުން ބުނީ ސައިކަލު ދުއްވަމުން ފޯނު ބޭނުންކުރާ މަންޒަރު ފެންނަ ވީޑިއޯއާ ގުޅިގެން އެ މައްސަލަ ބެލުމަށް ފަހު، އެމީހާގެ ސައިކަލު 30 ދުވަހުގެ މުއްދަތަށް ޓޯކޮށް، ލައިސަންސް ހިފަހައްޓާފައިވާ ކަމަށެވެ. އަދި އޭނާ ވަނީ 2،000ރ. އިން ވެސް ޖޫރިމަނާކޮށްފަ އެވެ.

ފުލުހުން ވަނީ މަގު ބޭނުންކުރާ އެންމެން ވެސް ސަލާމަތާއި ރައްކާތެރިކަމަށް ޓްރެފިކް ގަވާއިދުތަކަށް ފުރިހަމައަށް ހުރުމަތްތެރިކޮށް ހިތުމަށް ވެސް އިލްތިމާސްކޮށްފަ އެވެ.