ތެެލެސީމިއާގެ ފަރުވާގެ ހުރިހާ ކަމެއް ހައްލު ކޮށްދޭނަން: ރައީސް

ރާއްޖޭގައި ބޮއްސުންލާފައިވާ ތެލެސީމިއާ ފަރުވާގެ ކަންކަން ހަމަ މަގަށް އަޅުވައި، އާއިލާތަކަށް ހިތްހަމަޖެހުމާއި ފާގަތިކަން ގެނެސްދެއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ދުނިޔޭގެ ތެލެސީމިއާ ދުވަހުގެ މުނާސަބަތުގައި، ހެޔޮ ދުއާ ފޮނުއްވައި ރައީސް ދެއްވި ހިތާބުގައި ވިދާޅުވީ ރިޔާސީ އިންތިހާބުގައި ތެލެސީމިއާ ކުދިންނަށް ވީ ވައުދުތައް ހަގީގަތަކަށް ހައްދަވައިދެއްވާނެ ކަމަށެވެ.

"ތެލަސީމިއާ ކުދީންނާއި އާއިލާތަކާއި ސީދާ އަޅުގަނޑު ބައްދަލުވެ، އަޑުއަހައި، އަދި އެ ކުދިންނަށް ފަރުވާ ދޭ ގޮތް ސީދާ ލޮލުން ދުށުމަށް ފަހު، އެތައް އަހަރެއް ވަންދެން ބޮއްސުންލާފައިއޮތް ކަންކަން ހަމަމަގަށް އަޅުވަން، އަޅުގަނޑުމެން މިކުރާ މަސައްކަތުން އިރާދަކުރެއްވިއްޔާ މިކުދީންނާއި އާއިލާތަކަށް ހިތްހަމަޖެހުމާއި ފާގަތިކަން ގެނަސްދޭނަމެވެ،" ރައީސް ވިދާޅުވި އެވެ.

ރައީސް ވިދާޅުވީ އާބާދީގެ ނިސްބަތުން ތެލެސީމިއާ ކުދިންގެ އަދަދު އެންމެ ގިނަ އެއް ގައުމަކީ ރާއްޖެ ކަމަށާއި އާބާދީގެ ކޮންމެ އަށާރަ މީހުންގެ ތެރެއިން އެކަކީ ތެލެސީމިއާ ވާރުތަވުމުގެ ފުރުސަތު އޮތް ކެރިއަރުން ކަމަށެވެ.

އެހެންވެ ތެލެސީމިއާ އާ ގުޅޭ ހޭލުންތެރިކަން އިތުރުކުރުމާއި ފަރުވާދެވޭނެ ވަސީލަތްތައް ފަހިކުރުމަށް ރާއްޖޭގައި ހާއްސަ ސަމާލުކަމެއް ދޭންޖެހޭ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ ރާއްޖޭގެ ރަށްރަށުގައި ތެލެސީމިއާ ތަހައްމަލު ކުރަމުންދާ ކޮންމެ ކުއްޖަކީ ވެސް އުނދަގޫ އެތައް ކަމެއް ތަހައްމަލުކުރަމުންދާ ކުދިން ކަމަށާއި ސިއްހަތު ސަލާމަތުން ބޭތިއްބުމާއި އެކުދިންނަށް ގަވާއިދުން ފަރުވާ ދިނުމަށް އިސްކަން ދިނުމަކީ ކަމާ ބެހޭ އިދާރާތަކުގެ ޒިންމާއެއް ކަމަށެވެ.

ރައީސް ވަނީ ތެލެސީމިއާ ކުދިންނަށް އޯގާތެރިކަމާ އެކު މުއާމަލާތްކުރުމުގެ މުހިއްމު ކަމާ ގުޅޭ ގޮތުން ވެސް ހިތާބުގައި ވާހަކަފުޅު ދައްކަވައިފަ އެވެ. އަދި އުނގަންނައިދިނުމާއި އާމްދަނީ ހޯދޭނެ މަގުތައް އެ ކުދިންނަށް ވެސް ހޯދައިދޭންޖެހޭ ކަމަށް ވިދާޅުވި އެވެ.

ރައީސް ވިދާޅުވީ ތެލެސީމިއާގެ އުނދަގޫ ބަރުދާސްތުކުރާ ކުދީންގެ ކެތްތެރިކަމާއި ހިތްވަރުގަދަކަމުން ފިލާވަޅު ލިބިގަންނަން ޖެހޭ ކަމަށާއި އެ ކުދިން ދިރިއުޅުމެއް ހޯދުމަށް އުފުލާ ބުރަ ލުއިކޮށްދިނުމަށް ކުރާ ކޮންމެ ކަމަކީ، ސަވާބު ލިބޭނެ ހެޔޮ އަމަލެއް ކަމަށެވެ. އެގޮތުން އެކުދިންގެ ފުރާނައިގެ ހައްގުގައި ލޭ ހަދިޔާކުރުމަކީ ލިބޭނެ ދަރުމައެއް ކަމަށް ވިދާޅުވި އެވެ.

އެމަނިކުފާނު ވަނީ ތެލެސީމިއާގެ އުނދަގޫ ތަހައްމަލުކުރާ ކުދިންނަށް އެހީތެރިވުމުގައި ސަރުކާރާއި މުޅި މުޖުތަމައު ބައިވެރިވުމަށް ވެސް އެދިވަޑައިގެންފަ އެވެ.