ދަރަވަންދޫގައި 30 އެނދުގެ ހޮސްޕިޓަލެއް އަޅަނީ

ބ. ދަރަވަންދޫގައި 30 އެނދުގެ ހޮސްޕިޓަލެއް އެޅުމަށް އަންނަ އަހަރުގެ ބަޖެޓުގައި ހިމަނާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ރައީސް ބ. އަތޮޅަށް މިހާރު ކުރައްވާ ދަތުރުފުޅުގައި 12 ވަނަ ރަށެއްގެ ގޮތުގައި މިއަދު ހަވީރު ދަރަވަންދު އަށް ވަޑައިގެން އެ ރަށު ރައްޔިތުންނާ އެކު މިރޭ ބޭއްވި ބައްދަލުވުމުގައި ވިދާޅުވީ އެ ރަށުގައި މިހާރު ހުރި ސިއްހީ މަރުކަޒުގެ ހިދުމަތް މިހާރަށް ވުރެ ރަނގަޅުކުރަން ޖެހޭ ކަމަށެވެ.

ދަރަވަންދޫގައި މި އަހަރު ޑަޔަލިސިސް އާއި އެކްސް-ރޭގެ ހިދުމަތް ފެށުމުގެ ތައްޔާރީތައް ވަމުން އަންނަ ކަމަށް ވެސް ރައީސް ވިދާޅުވި އެވެ.

"ޑަޔަލިސިސް މެޝިންތައް މި ރަށާ ހަމައަށް ގެނައުމުގެ މަސައްކަތް މިހާރު ވަނީ ފެށިފައި. ދާދި އަވަހަށް އެ ހިދުމަތްތައް ފެށޭނެ. އޭގެ އިތުރުން އިންސާނީ ވަސީލަތުގެ ގޮތުން ވަރަށް އިސްކަންދީގެން މަސައްކަތް އެބަކުރަން. މި ރަށުގައި މިހާރު ހުރި ސިއްހީ މަރުކަޒު އާ ހަރުފަތަކަށް ގެންދެވޭނެ. މިހާރުން މިހާރަށް ވެސް ކުރެވޭނެ ކަންކަން ކުރަމުން އަޅުގަނޑުމެން މި ގެންދަނީ،" ރައީސް ވިދާޅުވި އެވެ.

"މިގޮތަށް މިކަން ކުރިއަށް ގެންގޮސް މިހާރު ހުރި ސިއްހީ މަރުކަޒުގެ ފެންވަރު މަތިކޮށް އިތުރު އެނދުތަކާއި އިތުރު ވަސީލަތްތައް ހިމެނޭ ގޮތަށް އަންނަ އަހަރުގެ ބަޖެޓުގައި ހިމަނައިގެން 30 އެނދުގެ ހޮސްޕިޓަލެއް އަޅައިދޭނަން."

ހޮސްޕިޓަލަކީ ދަރަވަންދު އަށް ވަރަށް މުހިންމު ވަސީލަތެއްކަން ފާހަގަކުރައްވައި ރައީސް ވިދާޅުވީ ރަށުގައި ހޮސްޕިޓަލެއް އެޅުން މުހިންމުވާ ސަބަބަކީ އެއީ ރަށުގެ ރައްޔިތުންނަށް ބޭނުންވެފައި އޮތް ހިދުމަތަކަށް ވާތީ ކަމަށެވެ.

އޭގެ އިތުރުން، ދަރަވަންދޫއަކީ ޓޫރިޒަމް ދާއިރާގައި ކުރިއަރާފައިވާ ރަށަކަށް ވެފައި، އެއާޕޯޓު އޮންނަ ރަށަކަށް ވާތީ އެ ރަށަށް ޒިޔާރަތްކުރާ އެކި ދާއިރާގެ މީހުންނަށް ފަސޭހަ ކޮށްދިނުމަށް ހޮސްޕިޓަލެއް ހުރުން ވަރަށް މުހިންމު ކަމަކަށް ވާތީ ކަމަށް ރައީސް ވިދާޅުވި އެވެ.

ރައީސް ވިދާޅުވީ ދަރަވަންދޫގެ މަގުތައް ހެދުމަށް ވަރަށް އަވަހަށް ބަޔަކާ ހަވާލުކުރާނެ ކަމަށެވެ. އަދި އެ ރަށުގައި ޕާސްޕޯޓްގެ ހިދުމަތް ވެސް ވަރަށް އަވަހަށް ފަށާނެ ކަމަށް ރައީސް ވިދާޅުވި އެވެ.