އެމެރިކާއިން ޔަމަނުގެ ބިދޭސީންގެ މަރުކަޒަކަށް ހަމަލާ ދިނުމުން 68 މީހަކު މަރު

އެމެރިކާއިން ޔަމަންގެ ހޫތީންނަށް އަމާޒުކޮށް ކޮންމެ ދުވަހަކުހެން ދެމުން ގެންދާ ހަމަލާތަކުގައި އެންމެ ފަހުން އަމާޒުކޮށްފައިވަނީ ބިދޭސީން ބަންދުކުރާ ޑިޓެންޝަން ސެންޓަރަކަށް ކަމަށާއި އެތަނުން މަދުވެގެން 68 މީހަކު މަރުވެފައިވާ ކަމަށް ބުނެފި އެވެ.

މިދިޔަ މާޗު މަހުގެ 15 އިން ފެށިގެން އެމެރިކާއިން ޔަމަނަށް ހަމަލާ ދެމުން ގެންދަނީ އިޒްރޭލުން ޣައްޒާއަށް ދޭ ހަމަލާތަކާ ގުޅުވައި ހޫތީން ރަތް ކަނޑުގައި އިޒްރޭލާއި އެމެރިކާ އަދި އެ މީހުންނާ ގުޅުން ހުރި އުޅަނދުތަކަށް ދެމުން ގެންދާ ހަމަލާތައް ހުއްޓުވަން ކަމަށް ބުނެ އެވެ.

އާދީއްތަ ދުވަހު އެމެރިކާއިން ބުނި ގޮތުގައި މާޗް މަހުގެ މެދުތެރެއިން ފެށިގެން މިހާ ހިސާބަށް، ޔަމަނުގެ 800 އަށް ވުރެ ގިނަ ތަންތަނަށް ހަމަލާ ދީފައިވާ ކަމަށެވެ. އަދި މި ހަމަލާތަކުގައި ހޫތީ ލީޑަރުން ހިމެނޭ ގޮތަށް އެތައް ސަތޭކަ ބަޔަކު މަރުވެފައިވާ ކަމަށް ބުންޏެވެ.

އޭގެ ގަޑިއިރުތަކެއް ފަހުން ހޫތީ މީޑިއާއިން ބުނެފައި ވަނީ އެމެރިކާއިން އެންމެ ފަހުން ދިން ހަމަލާތައް އަމާޒުވީ ބިދޭސީން ބައިތިއްބާ މަރުކަޒަކަށް ކަމަށެވެ.

"ސިވިލް ޑިފެންސުން ބުނި ގޮތުގައި މި ހަމަލާތަކުގައި އެފްރިކާގެ ހިޖުރަވެރިންގެ 68 މީހަކު މަރުވި. އަދި އިތުރު 47 މީހަކު ޒަހަމްވި،" ހޫތީންގެ އަލް މަސީރާ ޓީވީން ބުންޏެވެ.

ހަމަލާ ދިން ސެންޓަރުގައި 115 ހިޖުރަވެރިން ތިބި ކަމަށާއި އެ އެންމެންނަކީ ވެސް އެފްރިކާއަށް ނިސްބަތްވާ މީހުން ކަމަށް ހޫތީންނާ ހަވާލާދީ އިންޓީރިއާ މިނިސްޓްރީން ބުންޏެވެ.

އެމެރިކާގެ ރައީސް ޑޮނަލްޑް ޓްރަމްޕު ވިދާޅުވެފައިވަނީ ހަމަލާ ދިނުން ހުއްޓާލާނީ ހޫތީން ރަތް ކަނޑުގައި ހަމަލާ ދިނުން ހުއްޓާލުމުން ކަމަށެވެ.

ހޫތީން އެންމެ ފުރަތަމަ އުޅަނދުތަކަށް ހަމަލާދޭން ފެށީ އިޒްރޭލުން 2023 ވަނަ އަހަރު ޣައްޒާއަށް ހަމަލާ ދޭން ފެށުމާ އެކުގަ އެވެ. އިޒްރޭލަށް ތާއީދުކުރާ ގައުމުތަކާއި ވިޔަފާރިތަކުގެ އުޅަނދުތަކަށް އަމާޒުކުރާ ކަމަށް ބުނާ ހަމަލާތައް މިދިޔަ ޖެނުއަރީ މަހު އިޒްރޭލުން ހަމަލާތައް މެދުކަނޑާލުމުން ހޫތީން ހުއްޓާލި އެވެ. އެކަމަކު މި މަހު އަލުން ހަމަލާތައް ފެށުމާ އެކު ހޫތީން ވެސް ހަމަލާތައް ފެށީ އެވެ.