ކޯޓުތަކުގެ މިނިވަންކަމަށް ހުރަސްއެޅުން ހުއްޓާލައި، ފަނޑިޔާރުންގެ ސަސްޕެންޝަން އުވާލަން ގޮވާލައިފި

ޖުޑީޝަރީގެ މިނިވަންކަމަށް ހުރަސްއެޅުން ހުއްޓާލައި، ސުޕްރީމް ކޯޓުގެ ފަނޑިޔާރުންގެ ސަސްޕެންޝަން އުވާލުމަށް އިންސާނީ ހައްގުތަކަށް ވަކާލާތުކުރާ ބައިނަލްއަގުވާމީ ޖަމްއިއްޔާ، ހިއުމަން ރައިޓްސް ވޮޗް (އެޗްއާރުޑަބްލިޔު)އިން ގޮވާލައިފި އެވެ. ސިޔާސީ ޕާޓީ ބަދަލުކުރުމުން ނުވަތަ ޕާޓީން ކަނޑާލުމުން ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލް ކަމަށް ކަނޑައަޅަން ސުޕްރީމް ކޯޓަށް ހުށަހެޅި މައްސަލަ ބަލައިގަނެ އެކަމާ ގުޅޭ އަމުރުތަކެއް ނެރުމަށް ވަގުތު ކުޑަތަންވެފައި އޮއްވައި ޖޭއެސްސީން ވަނީ އެންމެ މަތީ ކޯޓުގެ ތިން ފަނޑިޔާރަކު މިދިޔަ މަހު ސަސްޕެންޑުކޮށްފަ އެވެ. އޭގެ ތެރެއިން ފަނޑިޔާރުގެ މަގާމުން ހުސްނުއްސުއޫދު ވަނީ އިސްތިއުފާ ދެއްވައިފަ އެވެ. އެކަމަކު، ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު މަހާޒް އަލީ ޒާހިރު މިދިޔަ ފެބްރުއަރީ 26 ވަނަ ދުވަހުން ފެށިގެން ތިއްބެވީ ސަސްޕެންޝަނުގަ އެވެ. އެޗްއާރުޑަބްލިޔުގެ އޭޝިޔާ ޑިރެކްޓަރު އެލެއިން ޕިއާސަން ވިދާޅުވީ، ސުޕްރީމް ކޯޓުގެ ފަނޑިޔާރުންނަށް ސުލޫކީ ފިޔަވަޅު އެޅުމަކީ އެ ކޯޓަށް ސިޔާސީ ނުފޫޒު ފޯރުވުމުގެ ކަންބޮޑުވުން އޮތް ކަމެއް ކަމަށެވެ.

"މިފަދަ ހައްސާސީ ދުސްތޫރީ މައްސަލަތައް މިނިވަންކަމާ އެކު ބެލުމުގެ ފުރުސަތު ނުލިބޭނަމަ، ހައްގުތަކަށް އިހްތިރާމްކުރާ ގައުމަކަށް ވުމަށް ރާއްޖޭން ކުރާ މަސައްކަތަށް ހުރަސްއެޅޭ،" އޭނާ ވިދާޅުވި އެވެ.

އެއާ އެކު ޕިއާސަން ވަނީ، ޖުޑީޝަރީގެ މިނިވަންކަން ކަށަވަރުކުރުމަށްޓަކައި، ސަސްޕެންޑުކޮށްފައިވާ ސުޕްރީމް ކޯޓުގެ ފަނޑިޔާރުންގެ ސަސްޕެންޝަން ވަގުތުން އުވައިލުމަށް ގޮވާލައްވައިފަ އެވެ.

ފަނޑިޔާރު އަޒްމިރަލްދާ އާއި ފަނޑިޔާރު މަހާޒްއާ ގުޅޭގޮތުން ޖޭއެސްސީން ބަލަމުން ދަނީ ފަނޑިޔާރު އަޒްމިރަލްދާގެ ފިރިކަލުން ހައްޔަރު ކުރުމުން އޭނާ ބަންދުން ދޫކޮށްލަން ކްރިމިނަލް ކޯޓުގެ ފަނޑިޔާރުންތަކަކަށް ނުފޫޒު ފޯރުވި ކަމަށް ބުނާ މައްސަލަ އަކާއި ހައި ކޯޓުގެ އެސިސްޓެންޓް ރެޖިސްޓްރާ ހުސައިން މުހައްމަދު ހަނީފް ސުޕްރީމް ކޯޓަށް ހާޒިރުކޮށް، ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު ހުތުރު ބަހުން ވާހަކަ ދެއްކެވި ކަމަށް ބުނާ މަޖިލީހުގައި އެ ދެ ފަނޑިޔާރުން ތިއްބެވި ކަމަށް ބުނެ އެވެ.

އެ ދެ މައްސަލާގައި އެ ބޭފުޅުން ކުރިން ޖޭއެސްސީއަށް ހާޒިރުކޮށް، ބަޔާން ނެގުމަށްފަހު ތަހުގީގު ކޮމެޓީން ވަނީ އެ ކޮމެޓީގެ ރިޕޯޓް ކޮމިޝަނަށް ފޮނުވައިފަ އެވެ. ނަމަވެސް އެ ކޮމެޓީގެ ނިންމުމަކީ ކޮބައިކަމެއް މިހާތަނަށް ސާފެއް ނުވެ އެވެ.

ތަހުގީގު ކޮމެޓީގެ ރިޕޯޓް ކޮމިޝަނަށް ފޮނުވުމާއެކު، ދެން އޮންނާނީ އެ ރިޕޯޓަށް ޖަވާބުދާރީވުމުގެ ފުރުސަތު އެ ފަނޑިޔާރުންނަށް ދިނުމެވެ. އަދި އޭގެފަހުގައި ކޮމިޝަނުން އެ މައްސަލާގައި ގޮތެއް ނިންމާނެ އެވެ.

ފަނޑިޔާރު އަޒްމިރަލްދާ އާއި ފަނޑިޔާރު މަހާޒް ސަސްޕެންޑްކުރީ އެ ބޭފުޅުންނާ ގުޅޭ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ ކަމަށް ބުނެ އެވެ. ނަމަވެސް އެއީ ކޮން މައްސަލައެއް ކަމެއް މިހާތަނަށް ވެސް އޭސީސީން ހާމަކޮށްފައެއް ނުވެ އެވެ.