ވެއްޓޭއިރު އަތުގައި ހިފަން ހުރި ފިރިމީހާގެ ކުއްލި ވަކިވުމާ އެކު ބޮޑު ހިތްދަތިކަމެއް

އޮކްސިޖަން ފުޅިއެއްގެ އެހީގައި ދިރިއުޅެމުން އަންނަ އައިމިނަތު އިރަމް، ފިރިމީހާ އަބްދުﷲ ރިޝްދާންގެ ދިފާއުގައި އަސަރާ އެކު ވާހަކަ ދެއްކި ވީޑިއޯއެއް ސޯޝަލްމީޑިއާގައި ވައިރަލްވީ މީގެ ދެ ދުވަސް ކުރިންނެވެ. އެހެން މީހުންނެކޭ އެއްގޮތަށް ދިރިއުޅެން އޭނާ ބޭނުންވެ އެވެ. އެކަމަކު ބަލިކަމުން ހުރި އުނދަގޫތައް ކިޔައިދީ، ޓިކްޓޮކަށް ދޫކޮށްލި ވީޑިއޯއަކާ ގުޅިގެން ރިޝްދާންއާ ދިމާލަށް އަމާޒުވި ފާޑުކިއުންތަކުން އިރަމްއަށް ކެތްނުކުރެވުނީ އެވެ.

އެ ވީޑިއޯގައި އިރަމް ދެއްކީ، ކުއްލި ގޮތަކަށް މިއަދު ނިޔާވި ފިރިމީހާ އަބްދުﷲ ރިޝްދާންގެ ރަނގަޅު ވާހަކަ އެވެ.

ފުވައްމުލަކު ކޮންސްޓްރަކްޝަން ސައިޓެއްގައި އުޅެނިކޮށް ހަބަރު ހުސްވެފައި އޮއްވާ ފެނިގެން މިއަދު ހޮސްޕިޓަލަށް ގެންދިޔައިރު ވެސް ރިޝްދާން އޮތީ މަރުވެފައި ކަމަށް ފުލުުހުން ބުނެ އެވެ. އެކަމަކު ސަބަބެއް އަދި ނޭނގެ އެވެ.

ފިރިމީހާގެ މަރާއެކު އިރަމްއަށް ލިބޭނެ ހިތްދަތިކަން އޭނާގެ ވީޑިއޯ އިން ސާފެވެ. ވަޒީފާއަކަށް ނުގޮސް ހުންނަ ސަބަބާ މެދު އުފެއްދި ސުވާލަށް ޖަވާބުދެމުން އިރަމް ބުނީ ރިޝްދާން އަދާކުރަނީ މާބުރަ ވަޒީފާއެއް ކަމަށެވެ.

"އިރަމްގެ ފިރިމީހާ ޖޮބަށް ނުދަނީއޭ، ޖޮބަށް ނުގޮސް ހަމަ ހުންނަނީއޭ. އިރަމްގެ ފިރިމީހާ އަދާކުރާ ޖޮބް ތި މީހުންނަށް އެނގޭ ނަމަ ތިހެނެއް ނުކިޔާނެ،" ސޯޝަލްމީޑިއާއަށް ދޫކޮށްލި ވީޑިއޯއަށް ކޮމެންޓްކުރި މީހުންނަށް ރައްދުދީ ބުންޏެވެ.

"އިރަމް ވެއްޓެންދާ ކޮންމެ ފަހަރަކު ހިފަން ހުންނަނީ އެ ދެއަތުންނޭ. ތި މީހުންނެއް ނޫނޭ ހިފަހައްޓަން ތިބެނީކީ. މަގޭ ފިރިމީހާ ވަޒީފާއަށް ދެވޭނެ ހާލަތެއް ނެތީމަ ދޯ އޭނަ ނުގޮސް ހުންނާނީ."

ހިތުގެ މައްސަލަ ހުންނަ އިރަމް އަަބަދު އުޅެން ޖެހެނީ އޮކްސިޖަން ގުޅައިގެންނެވެ. ހާލު ދެރަވެ އެޑްމިޓްކުރަން ޖެހޭ ފަހަރު ވެސް ގިނަ އެވެ.

އިރަމް އާއި ރިޝްދާން ކައިވެނިކުރީ މީގެ އަހަރެއްހާ ދުވަސް ކުރިންނެވެ. މިއީ، ބަލި ހާލުގައި އުޅެނިކޮށް ކައިވެނި ރޫޅި، އިރަމްގެ ހަޔާތުގައި ދިމާވި ހިތްދަތި ކަންކަމަށް ލިބުނު ލުޔެއްގެ ގޮތުގައި ވެސް އިރަމް ސިފަކޮށްފައިވެ އެވެ.

ފިރިމީހާ އަބްދުﷲ ރިޝްދާން އަކީ އޭނާގެ ބަލި ހާލަތާ މެދު ހަމްދަރުދީވާ، އޯގާތެރި ފިރިއެއް ކަމަށް ސޯޝަލްމީޑިއާއަށް ދޫކޮށްލާފައިވާ ދެ މީހުންގެ ވީޑިއޯތަކުގައި އިރަމް ބުނެފައިވެ އެވެ.

މެއި 5، 2024 ގައި ކުރި ކައިވެންޏަށްފަހު ރ. އަލިފުއްޓަށް އުފަން 27 އަހަރުގެ ރިޝްދާން ދިރިއުޅުން އިރަމްގެ ރަށް، ފުވައްމުލަކަށް ބަދަލުކުރީ އެވެ.

އެ ރަށަށް ބަދަލުވެ، ރިޝްދާން ދިޔައީ އެކި މަސައްކަތް ކުރަމުންނެވެ. މިއަދު ނިޔާވީ ވެސް، ފުވައްމުލަކުގެ ކޮންސްޓްރަކްޝަން ސައިޓެއްގެ ކަމެއްގައި އުޅެނިކޮށެވެ.

ރިޝްދާނާ މި ފަހުން ބައްދަލުވި އޭނާގެ ރަހުމަތްތެރިއެއް "މިހާރު"އަށް ބުނީ، އެ ދެ މީހުން ބައްދަލުނުވާތާ އެތައް އަހަރެއް ފަހުން ދިމާވެ، ދެކެވުނު ވާހަކަތަކުން ވެސް އިރަމް އަށް އޮތް ލޯބި އެނގިގެން ދިޔަ ކަމަށެވެ.

"އޭނާ ވަރަށް ލޯބިވާ ކަމަށް ބުނި،" އެ ރަހުމަތްތެރިޔާ ބުންޏެވެ.

އެ ކައިވެންޏަށް ފަހު، އިރަމްއާއެކު މިދިޔަ ޖޫން މަހު ރާއްޖެއިން ބޭރަށް ބޭސްފަރުވާއަށް ވެސް ދިޔަ އެވެ.