ފުވައްމުލަކުގައި ހިނގި އެކްސިޑެންޓެއްގައި 17 އަހަރުގެ ކުއްޖަކު ނިޔާވެއްޖެ

ފުވައްމުލަކުގައި ރޭ ދަންވަރު ހިނގި އެކްސިޑެންޓެއްގައި އުމުރުން 17 އަހަރުގެ ކުއްޖަކު ނިޔާވެއްޖެ އެވެ.

ފުލުހުން މިއަދު ބުނި ގޮތުގައި އެ ކުއްޖާ ނިޔާވީ، ފުވައްމުލަކު ފުނާޑު އަވަށުން ހުސްނުހީނާ މަގުން ސައިކަލެއްގައި ދަނިކޮށް ފާރުގައި ޖެހި ކޮންޓްރޯލް ނުވެ، މަގުބައްތި ހަރުކޮށްފައިވާ ހޮޅިދަނޑީގައި ޖެހިގެންނެވެ.

އެ ފިރިހެންކުއްޖާ ނިޔާވީ ފުވައްމުލަކު ހޮސްޕިޓަލަށް ގެންގޮސް ފަރުވާ ދެނިކޮށް ރޭ 3:38 ގައި ކަމަށް ފުލުހުން ބުންޏެވެ. ފުލުހުންނަށް އެ އެކްސިޑެންޓުގެ ރިޕޯޓު ލިބުނީ ދަންވަރު 2:40 ހާއިރު އެވެ.

މަންޒަރު ދުށް ބައެއް މީހުން ބުނީ، އެ ކުއްޖާ ފެނުނީ އެކްސިޑެންޓުވިތާ ގިނައިރުތަކެއް ވީ ފަހުން ކަމަށް ބެލެވޭ ކަމަށެވެ. އަދި ސައިކަލް އޮތީ އެކްސިޑެންޓުވި ހިސާބާ 500 ވަރަކަށް ފޫޓު ދުރުގައި ކަމަށް ވެސް މަންޒަރު ދުށް މީހުން ބުންޏެވެ.

ހޮސްޕިޓަލަށް ގެންދިޔައިރު ވެސް ވިންދު ނެތްކަން ފާހަގަވި ކަމަށް އެ ސަރަހައްދަށް ފުރަތަމަ ދިޔަ ބައެއް މީހުން ބުންޏެވެ.

މާލޭގައި މިދިޔަ މަހުގެ ޖުލައި 13 ވަނަ ދުވަހުގެ ރޭ ހިނގި އެކްސިޑެންޓެއްގައި ވެސް އުމުރުން 17 އަހަރުގެ ފިރިހެން ކުއްޖަކު ވަނީ ނިޔާވެފަ އެވެ. އެއީ ލަވަކިޔުންތެރިޔާ މަރިޔަމް އަޝްފާ އާއި މުހައްމަދު އަބްދުލް ޣަނީ (ތޭރަވާ)ގެ ހަމަ އެކަނި ދަރިފުޅު އަލްސަލް މުހައްމަދު އެވެ.