ބޯޓު ހައިޖެކްކުރި މީހުން ފައިސާ އަށް ޑިމާންޑްކޮށްފި

މޮގަދިޝޫ (މާޗް 15) - ސޮމާލިއާގެ ކަނޑުގެ ސަރަހައްދުން ފޭރިގަތް ސްރީ ލަންކާގެ ދިދަ ނަގާފައިވާ ތެޔޮ ޓޭންކަރަށް އެރި މީހުން ފައިސާ އަށް ޑިމާންޑް ކުރަމުންދާ ކަމަށް ކަނޑުފޭރުމާ ދެކޮޅަށް ހަރަކާތްތެރިވާ ޔޫރަޕިއަން ޔޫނިއަންގެ ނޭވަލް ފޯސް އިން ބުނެފި އެވެ.

ސޯމާލިއާ ސަރަހައްދުގައި ކަނޑު ފޭރުން ހުއްޓުވުމުގެ އޮޕަރޭޝަންތައް ހިންގާ ޔޫރަޕިއަން ޔޫނިއަން ނޭވަލް ފޯސް އިން ވަނީ ބޯޓުގެ ކެޕްޓަނާ ވާހަކަ ދައްކައިފަ އެވެ. ކެޕްޓަނާ ހަވާލާދީ ނޭވަލް ފޯސް އިން ބުނީ ބޯޓުގެ ފަޅުވެރިން ވަނީ ކޯޓަރިއެއްގައި ބަންދުކޮށްފައި ކަމަށެވެ. ހަތިޔާރާ އެކު ބޯޓަށް އެރި ކަނޑުފޭރޭ މީހުން ޑިމާންޑްކުރާ ފައިސާގެ އަދަދު ބުނެފައެއް ނުވެ އެވެ.

މިއީ ވޭތުވެދިޔަ ފަސް އަހަރެއްހާ ދުވަހުތެރޭ ހިންގި މި ބާވަތުގެ ފުރަތަމަ ހާދިސާ އެވެ. ކަނޑުފޭރެން އުޅޭ ކަމުގެ ސިގްނަލް ތެޔޮ ބޯޓުން ދިނީ ހޯމަ ދުވަހު ހަވީރެވެ. ބޯޓުން އަންގާފައި ވަނީ ހައި ސްޕީޑް ބޯޓުތަކުން އެ ބޯޓާ ގާތްވަމުންދާ ކަމަށެވެ. އޭރު ތެޔޮ ބޯޓު ދިޔައީ ޖިބޫތީން ސޯމާލިއާގެ ވެރިރަށް މޮގަދިޝޫ އަށް ދަތުރު ކުރަމުންނެވެ. ބޯޓުު މިހާރު އޮތީ ސޯމާލީއާގެ އުތުރުގައި އެންކާ ކޮށްފަ އެވެ.

ބޯޓު ގެންދިޔަ ސޯމާލިއާގެ އަލޫލާ ސަރަހައްދުގެ ޑިސްޓްރިކްޓް ކޮމިޝަނާ އަލީ ޝިރީ މުހައްމަދު ވިދާޅުވީ ހަތިޔާރާ އެކު ތެޔޮ ބޯޓަށް އެރި މީހުން ބުނެފައި ވަނީ އެ މީހުންނަކީ މަސްވެރިން ކަމަށެވެ.

"ބޯޓަށް އެރި މީހުން ބުނަނީ އެ މީހުންގެ މަސްވެރިކަމުގެ ސާމާނުތައް ވަނީ ގަވާއިދާޚިލާފަށް މަސްވެރިކަން ކުރަން އުޅުނު ބަޔަކު ހަލާކުކޮށްފައި ކަމަށް. އެ މީހުންނަކީ ކަނޑުފޭރޭ މީހުންނަށްވާ ނަމަ ވަގުތުން ބޯޓުން ފޭބުމަށް ވަނީ އަންގާފައި،" އޭނާ ވިދާޅުވި އެވެ.

ބާރަހާސް ޓަނުގެ ބޯޓަށް ހަތިޔާާރާ އެކު އަށް މީހަކު އަރާފައިވާ ކަމަށްވެ އެވެ. އެ ބޯޓުގައި ލަންކާގެ ދިދައެއް ހުރި ނަމަވެސް އެއީ ޔޫއޭއީގެ ބޯޓެކެވެ.

ސްރީ ލަންކާގެ ފޮރިން މިނިސްޓްރީން ބުނެފައި ވަނީ އެ ގައުމުގެ އަށް މީހުން އެ ބޯޓުގައި ތިބި ކަމަށެވެ.

މިއީ 2012 ވަނަ އަހަރުގެ ފަހުން ސޯމާލިއާ ސަރަހައްދުގައި ކަނޑުފޭރޭ މީހުން ވިޔަފާރި މުދާ އުފުލާ ބޯޓެއް ހައިޖެކްކުރި ފުރަތަމަ ފަހަރެވެ.