ރާއްޖޭ ސަރަހައްދުން ފެނުނީ ސޯމާލިއާ ބައެއް: ޕޮލިސް

އއ. އަތޮޅު ބޭރުން އޮޔާ ދަނިކޮށް ރޭ ސަލާމަތް ކުރި ޑިންގީގައި ތިބީ ސޯމާލިއާ ބައެއް ކަމަށް ފުލުހުން މިއަދު ބުނެފި އެވެ.

އއ. އަތޮޅުގެ ހުޅަނގުން، 60 ނޮޓިކަލް މޭލު ބޭރުން ތިން މީހުންނާ އެކު ސިފައިން އެ ޑިންގީ ސަލާމަތް ކުރިއިރު، ފެނާއި ކާބޯތަކެތި ހުސްވެ ތިބީ ހާލު ދެރަވެފަ އެވެ.

ފުލުހުން ބުނީ ކާއެއްޗެއް ނުލިބި ގިނަ ދުވަސްވެފައި ވުމުގެ ސަބަބުން އޭގެ ތެރެއިން އެކެއްގެ ހާލު އޭރު ވަރަށް ދެރަ ކަމަށެވެ. އެކަމަކު މިހާރު އޭނާގެ ހާލު ރަނގަޅެވެ. މި އެންމެން ވެސް މިހާރު ތިބީ ފުލުހުންގެ ބެލުމުގެ ދަށުގައި، ދޫނިދޫގަ އެވެ.

ޑިންގީގައި ތިބި މީހުންނަށް އިނގިރޭސި ބަސް ނޭނގޭތީ މުއާމަލާތު ކުރަން ދަތި ކަމަށް ފުލުހުން ބުންޏެވެ.

"އެމީހުންނަށް އިނގިރޭސި ބަހެއް ނޭނގޭ. އެހެންވެ، ބެހުނީ ކީއްވެކަމާއި ކިހާދުވަހެއް ވެއްޖެ ކަން ވެސް ސާފު ނުކުރެވިގެން މިއުޅެނީ،" ފުލުހުންގެ އޮފިޝަލަކު ވިދާޅުވި އެވެ.

ހާލުގައި ޖެހިފައި ވަނިކޮށް ސޯމާލިއާ މީހުން ރާއްޖޭގެ ސަރަހައްދުން މީގެ ކުރިން ވެސް ފެނިފައި ވެ އެވެ. އަދި ރާއްޖޭގެ ސަރަހައްދުން ގަވައިދާ ހިލާފަށް މަސްވެރިކަން ކުރަން އުޅުނު އެ ގައުމުގެ ބޯޓެއް ވެސް މި އަހަރުގެ ކުރީކޮޅު ވަނީ އަތުލައިގެންފަ އެވެ. ސޯމާލިއާ އަކީ ކަނޑުފޭރޭ މީހުން ގިނަ ގައުމެއް ނަމަވެސް ރާއްޖޭ ސަރަހައްދުން މިގޮތަށް ފެންނަ އެ ގައުމުގެ މީހުންނަކީ ކޮންމެ ބޭނުމެއްގައި މި ސަރަހައްދަށް އަންނަ ބައެއް ކަމެއް ޔަގީނެއް ނުވެ އެވެ.