މެންދުރުން ފެށިގެން ކެންދޫގައި ކަރަންޓެއް ނެތް

ބ. ކެންދޫއަށް ކަރަންޓު ދިނުމަށް ބޭނުންކުރާ ތިން ޖަނަރޭޓަރުގެ ތެރެއިން ދެ ޖަނަރޭޓަރު ހަލާކުވެ މުޅި ރަށުން ކަރަންޓު ކެނޑިއްޖެ އެވެ.

ކެންދޫ ކައުންސިލްގެ ރައީސް އިބްރާހިމް އަބްދުއްރަހްމާން، "މިހާރު" އަށް ވިދާޅުވީ މިއަދު މެންދުރުން ފެށިގެން ރަށުން އެއްކޮށް ކަރަންޓު ކެނޑިފައިވާ ކަމަށެވެ.

އެކަމަކު މިރޭ 9:00 ހާއިރު ފަހަރަކު މަގަކަށް 30 މިނެޓަށް ކަރަންޓު ދެމުންދާ ކަމަށް އޭނާ ވިދާޅުވި އެވެ.

ކެންދޫގައި ކަރަންޓު ދިނުމަށް ބޭނުންކުރަނީ 400 ކިލޯވޮޓުގެ ދެ ޖަނަރޭޓަރާއި 200 ކިލޯވޮޓުގެ ޖަނަރޭޓަރެކެވެ. އޭގެ ތެރެއިން 400 ކިލޯވޮޓުގެ ދެ ޖަނަރޭޓަރު ވެސް ވަނީ އެއްކޮށް ހަލާކުވެފަ އެވެ.

އިބްރާހިމް ވިދާޅުވި ގޮތުގައި މުޅި ރަށުން މިއަދު ކަރަންޓު ކެނޑުނުއިރު މިދިޔަ ހައެއްކަ މަސް ތެރޭގައި ވެސް އެރަށުގައި ކަރަންޓުގެ މައްސަލަ ބޮޑެވެ. އެހެންވެ ކޮންމެ ދުވަހަކު ވެސް ދިޔައީ ދެތިން ގަޑިއިރަށް ކަރަންޓު ކަނޑަމުންނެެވެ.

އެ މައްސަލާގައި ފެނަކަ އާއި ކަމާ ގުޅޭ އެހެން އިދާރާތަކާ މަޝްވަރާކުރުމުން ރޯދަ މަހުގެ ކުރިން ކަރަންޓުގެ މައްސަލަ އެއްކޮށް ހައްލުކޮށްދޭނެ ކަމަށް ބުނެފައިވާ ކަމަށް އިބްރާހިމް ވިދާޅުވި އެވެ.

އެކަމަކު އެ މައްސަލަތައް ހައްލުނުވެ އުޅެނިކޮށް އެއްކޮށް ކަރަންޓަށް ކެނޑުނީ އެވެ.

އިބްރާހިމް ވިދާޅުވި ގޮތުގައި މިރޭ 8:30 ހާއިރު ފެނަކައިގެ ޓީމެއް ވަނީ އެ ރަަށަށް ގޮސްފަ އެވެ. އިންޖީނު ހެދުމުގެ މަސައްކަތް ކުރަމުން އަޔަސް އަދި އަލިމަގެއް ނުފެންނަ ކަމަށް އޭނާ ވިދާޅުވި އެވެ.

އެހެންވެ، އެމްޑަބްލިއުއެސްސީ އިން އެރަށަށް ފެނާއި ނަރުދަމާގެ މަސައްކަތަށް ގެންގޮސްފައިވާ 150 ކިލޯވޮޓުގެ ޖަނަރޭޓަރު ބޭނުންކޮށްލަން ލިބޭތޯ އެ ކުންފުންޏާ ވެސް މަޝްވަރާކުރަމުން އަންނަ ކަމަށް އޭނާ ވިދާޅުވި އެވެ.

އާބާދީ 1400 ގައި އުޅޭ އެ ރަށުގައި ކަރަންޓު ނެތްތާ ގިނައިރުތަކެއް ވުމުގެ ސަބަބުން މިރޭ ގޭގޭގެ މީހުން ވެސް ނިދަން ނުކުމެފައި ވަނީ މަގުމައްޗަށެވެ. ފަށްޖެހި އެނދާއި ޖޯލިތަކުގައި ގިނަ އަދަދެއްގެ ކުޑަކުދިންނާއި މީހުން ނިދަން އެބަތިބި ކަމަށް އޭނާ ވިދާޅުވި އެވެ.