18 ރަށެއްގައި ބެޓެރީ އެނާޖީ ސްޓޯރޭޖް ސިސްޓަމް ބަހައްޓަން ހަވާލުކޮށްފި

ރާއްޖޭގެ 18 ރަށެއްގައި ބެޓެރީ އެނާޖީ ސްޓޯރޭޖް ސިސްޓަމް ބަހައްޓަން ޗައިނާގެ ތިން ކުންފުންޏަކާ މިއަދު ހަވާލުކޮށްފި އެވެ.

ތިމާވެއްޓާ ބެހޭ މިނިސްޓްރީގައި މިއަދު ހެނދުނު ބޭއްވި ރަސްމިއްޔާތެއްގައި ވަނީ މި މަސައްކަތުގެ އެއްބަސްވުމުގައި ސޮއިކޮށްފަ އެވެ.

އެންވަޔަރަންމަންޓް މިނިސްޓްރީން ނެރުނު ބަޔާނެއްގައި ބުނީ، ރާއްޖޭގައި މީހުން ދިރިއުޅޭ 18 ރަށެއްގައި އެނާޖީ މެނޭޖްމަންޓް ސިސްޓަމްސް (އީއެމްއެސް)އާ އެކު، އެ މިނިސްޓްރީން ކުރިއަށް ގެންދާ އެކްސަލަރޭޓިން ސަސްޓެއިނަބަލް ސިސްޓަމް ޑިވެލޮޕްމަންޓް ޔޫސިން ރިނިއުބަލް އެނާޖީ (އެޝުއާ) ޕްރޮޖެކްޓުގެ ދަށުން 38 މެގަވޮޓް އަވާގެ ބެޓެރީ އެނާޖީ ސްޓޯރޭޖް ސިސްޓަމް (ބެސް) ގާއިމްކުރުމުގެ މަސައްކަތް ޗައިނާގެ ކުންފުނިތަކަކާ ހަވާލުކޮށްފައިވާ ކަމަށެވެ.

މި މަސައްކަތް ހަވާލުކޮށްފައި ވަނީ ޗައިނާގެ ޖޭވީ އޮފް ޝިޖިއާޒުއަންގް ކެލިން އިލްކެޓްރިކް ކޯ ލިމިޓެޑް އާއި ގޯޑިއަން ނަންޖިންގް އޮޓޮމޭޝަން ކޯ ލިމިޓެޑް އަދި ސައިނޯ ސޯއާ ހައިބްރިޑް (ބެއިޖިން) ޓެކްނޮލޮޖީ ކޯ ލިމިޓެޑާ އެވެ.

މި މަޝްރޫއުގެ ދަށުން ހދ. ހަނިމާދޫގައި 2،000 ކިލޯވޮޓް އަވާ، ށ. މިލަންދޫގައި 2،500 ކިލޯވޮޓް އަވާ، ނ. ހޮޅުދޫގައި 1،500 ކިލޯވޮޓް އަވާ، ނ. މަނަދޫގައި 3،000 ކިލޯވޮޓް އަވާ، ނ. ވެލިދޫ 3،000 ކިލޯވޮޓް އަވާ، ރ. އަލިފުށީގައި 2،000 ކިލޯވޮޓް އަވާ، ރ. ހުޅުދުއްފާރުގައި 1،500 ކިލޯވޮޓް އަވާ، ބ. ދަރަވަންދޫގައި 2،500 ކިލޯވޮޓް އަވާ، ބ. ތުޅާދޫގައި 3،000 ކިލޯވޮޓް އަވާ، މ. މުލަކުގައި 2،000 ކިލޯވޮޓް އަވާ، މ. މުލީގައި 2،000 ކިލޯވޮޓް އަވާ، މ. ވޭވަށުގައި 500 ކިލޯވޮޓް އަވާ، މ. ރަތްމަންދޫގައި 500 ކިލޯވޮޓް އަވާ، ތ. ގުރައިދޫގައި 2،500 ކިލޯވޮޓް އަވާ، ތ. ތިމަރަފުށީގައި 3،000 ކިލޯވޮޓް އަވާ، ގއ. މާމެންދޫގައި 1،000 ކިލޯވޮޓް އަވާ، ގދ. ފަރެސްމާތޮޑާ 3،000 ކިލޯވޮޓް އަވާ އަދި ގދ. ގައްދޫގައި 2،500 ކިލޯވޮޓް އަވާގެ ސްޓޯރޭޖް ސިސްޓަމެއް ބަހައްޓާނެ އެވެ.

މިނިސްޓްރީން ބުނި ގޮތުގައި، މި މަޝްރޫއުގެ މައިގަނޑު މަގުސަދަކީ އިޔާދަކުރަނިވި ހަކަތައިން އުފައްދާ ކަރަންޓް ބޭނުންކުރާ މިންވަރު އިތުރުކުރުމާއި ރައީސް ޑރ. މުހައްމަދު މުއިއްޒު ކަނޑައަޅުއްވާފައިވާ، 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ހަކަތައިގެ 33 ޕަސެންޓް އިޔާދަކުރަނިވި ހަކަތައަށް ބަދަލުކުރުމުގެ ލަނޑުދަނޑި ހާސިލްކުރުމެވެ.

މި 38 މެގަވޮޓް އަވާގެ ބެޓެރީ އެނާޖީ ސްޓޯރޭޖް ސިސްޓަމް ބަހައްޓައި، އެ ރަށްތަކުގައި އިތުރު ސޯލާ ޕީވީ ސިސްޓަމްތައް ގާއިމުކުރުމުން ގްރިޑް ސްޓެބިލައިޒްކުރުމަށް މަގުފަހިކޮށްދީ، އިތުރު ސޯލާ ޕީވީ ކެޕޭސިޓީ ވިއުގަ އަށް ގުޅުމަށް ފުރުސަތު ފަހިވާނެ ކަމަށް މިނިސްޓްރީން ބުންޏެވެ.

"މަގޭ ސޯލާ" ޕްރޮގްރާމްގެ ދަށުންނާއި އަމިއްލަ ގޮތުން ގޭގޭގަ އާއި އިމާރާތްތަކުގެ ފުރާޅުގައި ސޯލާ ޕީވީ ހަރުކުރުމަށް ވެސް މަގުފަހިވާނެ ކަމަށް މިނިސްޓްރީން ބުންޏެވެ.

"މި 38 މެގަވޮޓް އަވާގެ ބެޓެރީ އެނާޖީ ސްޓޯރޭޖް ސިސްޓަމް ބެހެއްޓުމުގެ ސަބަބުން އަހަރަކު ގާތްގަނޑަކަށް 8.4 މިލިއަން ލީޓަރުގެ ޑީސަލް ސަލާމަތްކުރެވި އަހަރަކު ގާތްގަނޑަކަށް 125 މިލިއަން ރުފިޔާގެ ތެލުގެ ހަރަދު ސަލާމަތްކުރެވޭނެ،" މިނިސްޓްރީން ބުންޏެވެ.