ބޯޓު އަނދައި ހުލިވެއްޖެ، އެކަކު ގެއްލިގެން ހޯދަނީ

ތ. އަތޮޅާއި ލ. އަތޮޅަށް މުދާ އުފުލާ "ހޮޅުދޫ ބޯޓުގައި" މިރޭ ރޯވެ ހިނގި އަލިފާނުގެ ހާދިސާގައި، ބޯޓުން ދަތުރުކުރި އެކަކު ގެއްލިގެން ހޯދަން ފަށައިފި އެވެ.

އެނގިފައިވާ ގޮތުގައި އެ ބޯޓުން ދަތުރުކުރި 18 ވަރަކަށް މީހުންގެ ތެރެއިން ގެއްލިގެން ހޯދަނީ ލ. މާވަށު، އަލީ މުޝްފިގް، 25 އެވެ. ކޯސްޓްގާޑާއި އާއްމުން ގުޅިގެން އޭނާ ހޯދުމުގެ މަސައްކަތް އަންނަނީ ކުރަމުންނެވެ.

ކަނޑޫދޫ ކައިރިން ބޯޓުގައި އަލިފާން ރޯވެ އަނދައި ހުލިވީ މާލެ ދަތުރުކުރަނިކޮށް ކަމަށް ވެ އެވެ. އެނގިފައިވާ ގޮތުގައި މި ބޯޓު އޮންނަނީ ދަތުރުކުރަން ކުއްޔަށް ދޫކޮށްފަ އެވެ.

ބޯޓުގައި ތިބި ބިދޭސީންނާއި ދިވެހިންގެ ތެރެއިން ދެ މީހަކު ފިހިގެން ތ. ކަނޑޫދޫ ހެލްތު ސެންޓަރުގައި ވަނީ ފަރުވާދީފަ އެވެ. އިތުރު ފަރުވާ އަށް މިހާރު ދ. ކުޑަހުވަދުއަށް ފޮނުވާލުމުގެ މަސައްކަތް އަންނަނީ ކުރަމުންނެވެ. އެއީ ދިވެއްސަކާއި ބިދޭސީއެކެވެ.

ބޭރުފުށުން ސީރިއަސް އަނިޔާއެއް ފެންނަން ނެތް ނަމަވެސް ދެ މީހުން ތިބީ ޝޮކެއްގައި ކަމަށް ހެލްތު ސެންޓަރުން ވާހަކަ ދެއްކެވި ބޭފުޅަކު ވިދާޅުވި އެވެ.

އަލިފާނުގެ ހާދިސާއާ ގުޅިގެން، "މިހާރު"އަށް ވާހަކަ ދެއްކި ކަނޑޫދޫ ކައުންސިލްގެ ބޭފުޅަކު ވިދާޅުވީ ބޯޓުގައި ރޯވުމާ އެކު އޭގައި ތިބި އެންމެން ލައިފް ޖެކެޓް އަޅައި މޫދަށް ފުންމާލީ ކަމަށެވެ. ކަނޑުމަތީގައި ތިއްބައި އެ މީހުން ސަލާމަތްކުރީ އެ ސަރަހައްދަށް އައި ލޯންޗަކުންނެވެ. އެ ލޯންޗަށް އެންމެންނަށް ނޭރިގެން އިތުރު ލޯންޗެއް ގެންނަން ޖެހުނު ކަމަށް ވެސް އޭނާ ވިދާޅުވި އެވެ.

އެމްއެންޑީއެފުން ހިއްސާކުރި މި ހާދިސާގެ ވީޑިއޯގައި ފެންނަ ގޮތުގައި ރޯވި އަލިފާންގަނޑު ވަނީ މުޅި ބޯޓަށް ފެތުރިފަ އެވެ. އަލިފާން ރޯވެފައި ވަނީ ބޯޓު ސަލާމަތްކުރެވޭ ވަރަށް ވުރެ ބޮޑަށެވެ.