ހުޅުމާލޭ އެންސިސް ގުދަނުގައި އަލިފާން ރޯވެއްޖެ

ހުޅުމާލޭގެ ފޭސް އެކެއްގައި ހުންނަ ގުދަނެއްގައި އަލިފާން ރޯވެއްޖެ އެވެ.

އެމްއެންޑީއެފްއިން ބުނީ އަލިފާން ރޯވެފައިވަނީ އެންސިސް ކުންފުނީގެ ގުދަނެއްގައި ކަމަށެވެ. އެ ހާދިސާގެ ރިޕޯޓް ލިބުނީ މިރޭ 6:48 ހާއިރު ކަމަށް އެމްއެންޑީއެފްއިން ބުންޏެވެ.

އަލިފާން ނިއްވުމުގެ މަސައްކަތުގައި އެމްއެންޑީއެފްގެ ފަޔާ އެންޑް ރެސްކިއު ސާވިސްއިން ދަނީ ހަރަކާތްތެރިވަމުންނެވެ.

އެ ހާދިސާގައި މީހަކަށް އަނިޔާވިކަމެއް އަދި ސާފެއް ނުވެ އެވެ.

އަލިފާާން ނިއްވުމުގެ މަސައްކަތް ހިނގަމުންދާ ގޮތް ބެއްލެވުމަށް ޑިފެންސް މިނިސްޓަރު ޤައްސާން މައުމޫނާއި ސިފައިންގެ އިސްވެރިން ވެސް އެ ސަރަހައްދަށް ވަނީ ވަޑައިގެންފަ އެވެ.

ފުލުހުން ބުނީ އެ ހާދިސާގެ ސަބަބުން އެ ސަރަހައްދުގައި ދުން ބޯވެ، ފެތުރެމުންދާތީ ދުރު ފެންނަ މިންވަރު ދަށްވެފައިވާ ކަމަށެވެ. އަދި ސިއްހީ ގޮތުން ނޭދެވޭ އަސަރުތައް އޭގެ ސަބަބުން ކޮށްފާނެތީ އެ ސަރަހައްދާ ކައިރި ގެތަކުގައި ދިރިއުޅޭ މީހުންނާއި އެ ސަރަހައްދުން ދަތުރުކުރާ މީހުން ރައްކާތެރިކަމުގެ ފިޔަވަޅުތައް އަޅަން އެދޭ ކަމަށް ފުލުހުން ބުންޏެވެ.