ފަސް ގަޑިއިރުވިއިރު ވެސް އަލިފާން ނިއްވާނުލެވޭ، ހުޅުމާލެއަށް ދުމުގެ އަސަރު

ހުޅުމާލޭގެ އެންސިސް ގުދަނުގައި މިރޭ ރޯވި އަލިފާންގަނޑު ފަސް ގަޑިއިރު ވިއިރު ވެސް ނިއްވާނުލެވި، ހުޅުމާލެއަށް ދުންތައް ފެތުރިއްޖެ އެވެ.

ހުޅުމާލެ 1 ގައި ހުންނަ އެ ގުދަނުގައި އަލިފާން ރޯވެގެން ސިފައިންނަށް ރިޕޯޓުކުރީ 6:50 ހާއިރެވެ. އެ ވަގުތުން ފެށިގެން ސިފައިންނާއި ފުލުހުން ދަނީ އަލިފާން ނިއްވާލުމުގެ މަސައްކަތް ކުރަމުންނެވެ.

ނަމަވެސް، ފަސް ގަޑިއިރު ވެގެން ދިޔައިރު ވެސް އަދިވެސް އަލިފާންގަނޑު އެއްކޮށް ނިއްވާނުލެވެ އެވެ.

މީގެ ގަޑިއިރެއް ކުރިން އެމްއެންޑީއެފްގެ މީޑިއާ އޮފިޝަލަކު ވިދާޅުވީ ރޯވެފައިވާ އަލިފާންގަނޑުގެ 55 ޕަސެންޓް ނިއްވާލެވިފައިވާ ކަމަށެވެ. އެކަމަކު، ފަހުން އިތުރު ތަފްސީލެއް ނުލިބެ އެވެ.

އެ ސަރަހައްދުގައި ހުރި މީހަކު "މިހާރު"އަށް ބުނީ އެއާޕޯޓުގެ ފަޔަ ލޮރީ ގެންގޮސްގެން ވެސް އަލިފާންގަނޑު ނިއްވަން މަސައްކަތްކުރާ ކަމަށެވެ.

"ބޭރަކަށް ނުފެނޭ އަލިފާންގަނޑެއް. އެކަމަކު، ސިފްކޯ ފްލެޓު މަތިން ބަލާލީމަ އެބަ ފެނޭ އަލިފާންގަނޑު. ތަންކޮޅެއް އެތެރޭގައި ރޯވެފައި ހުރީމަ ކަމަށް ގަބޫލު ކުރެވެނީ ނިއްވާލަން އުނދަގޫވެގެން އުޅެނީ." އޭނާ ބުންޏެވެ.

ކޮންކްރީޓުން ހަދާފައިވާ އެ ގުދަން ހުންނަނީ އެންސިސް ފެކްޓްރީ ހިންގި ތަނުގެ މަތީގަ އެވެ.

އަލިފާންގަނޑު އެއްކޮށް ނިއްވާނުލެވި ގިނަވަގުތު ވުމާއި ވައިގަދަވުމުން ހުޅުމާލޭގެ ބޮޑު ހިސާބަކަށް ވަނީ ދުންގަނޑު ފެތުރިފަ އެވެ. އެހެންވެ، އެކަމަށް ރައްކާތެރިވުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފަ އެވެ.