ކުއްލި ހާލަތުގައި އެހީ ހޯދަން ދެން ގުޅަން ޖެހޭނީ 911 އަށް

ދިމާވާ ކުއްލި ހާލަތްތަކުގައި އެހީތެރިކަމާއި ރައްކާތެރިކަމަށް އެދި ގުޅަން "ޝޯޓްކޯޑް ލައިން" 911 ރާއްޖޭގައި ރެއިން ފެށިގެން ބޭނުންކުރަން ފަށައިފި އެވެ.

ކުއްލި ހާލަތްތަކަށް، ގައުމީ ހެލްޕް ލައިނެއް ގާއިމު ކުރުމަކީ ސޯޝަލް ކައުންސިލަށް ހެލްތު މިނިސްޓްރީން ހުށަހެޅި ކަމެކެވެ. އެ ހުށަހެޅުން ސޯޝަލް ކައުންސިލުން ފާސްކޮށް، އެ މަސައްކަތް ފަށާފައި ވަނީ އޮކްޓޯބަރު މަހުގެ ތެރޭގަ އެވެ.

މި ހުށަހެޅުމުގައިވާ ގޮތަށް "911" އިފްތިތާހު ކުރުމަށްޓަކައި ރޭ ބޭއްވި ރަސްމިއްޔާތުގައި ހޯމް މިނިސްޓަރު އަލީ އިހުސާން ވިދާޅުވީ ރެއަކީ ރާއްޖެ ރަންއަކުރުން ފަވާލެވޭނެ ރެއެއް ކަމަށެވެ.

ރައީސް ޑރ. މުހައްމަދު މުއިއްޒުގެ ވެރިކަމުގެ ވަރަށް ކުރީކޮޅުގައި މިފަދަ ނޭޝަނަލް އެމަޖެންސީ ކޯލް ސެންޓަރެއްގެ މުހިންމުކަން އެނގިވަޑައިގަތް ކަމަށާއި އެވަގުތުން ފެށިގެން އެ ހިދުމަތް އެއް ނަމްބަރަކުން ރައްޔިތުންނަށް ދިނުމަށް ރައީސް ނިންމެވި ކަމަށް ވެސް މިނިސްޓަރު ވިދާޅުވި އެވެ.

އެ ހިދުމަތް ދިނުން ގާއިމްކުރީ ޕޮލިހުންގެ މުއައްސަސާގަ އެވެ. ޕޮލިހަށް ކަމެއް ރިޕޯޓު ކުރުމާއި އެމްބިއުލާންސްގެ ހިދުމަތާއި ކޯސްޓްގާޑާއި ފަޔާ އެންޑް ރެސްކިޔު ހިދުމަތް ވެސް 911 އިން ދޭނެ ކަމަށް އިހުސާން ވިދާޅުވި އެވެ.

"އިމަޖެންސީ ނަމްބަރެއް ހެދުމަށް ވިސްނިއިރު ބެލި އެންމެ މުހިންމު އެއް ކަމަކީ އެންމެ ގިނަ މީހުންނަށް ކުޑަކުދިންނަށް ވެސް އެނގޭ ނަމްބަރެއް 911 މިއީ. އާންމު ނަމްބަރެއް. ނަމްބަރު އިހުތިޔާރުކުރި އިރު ވަރަށް ބޮޑަށް ބެލިން އޭގެ ޒާތުގައި ޕްރޮމޯޓްވަމުން ކުރިއަށްއޮތް ތަނުގައި ވެސް އަންނާނެ ނަމްބަރެއް ސެލެކްޓްކުރުން،" މިނިސްޓަރު ވިދާޅުވި އެވެ.

"އެގޮތުން އަޅުގަނޑުމެންނަށް އެކިއެކި މީޑިއާގެ ޒަރިއްޔާއިން ވެސް ފެންނަ އެއް ނަންބަރަކީ، ފިލްމުތަކުން ވެސް އަދި ކާޓޫނުތަކުން ވެސް ފެންނަނީ 911. އެހެންކަމުން އަޅުގަނޑުމެން ނިންމީ އެންމެ ފަސޭހަ ގޮތަކީ އަދި ގިނަ ރައްޔިތުންނަށް ހަނދާނުގައި ބަހައްޓަން ވެސް ފަސޭހަވާނީ މިފަދަ ނަންބަރަކާއިގެން ކުރިއަށްދިޔައީމަކަން."

ރޭ ފެށި ހިދުމަތުގެ ފެންވަރު ދުވަހެއް ދުވަހަކަށް ދާނީ ރަނގަޅުވަމުން ކަން ފާހަގަ ކުރައްވައި މިނިސްޓަރު ވަނީ ބައެއް ކަންކަން ހިއްސާ ކުރައްވައިފަ އެވެ. އެއީ:

- ކޮމިޔުނިކޭޝަން ސިސްޓަމްތައް އެޑްވާންސްކުރުން

- ޖީއައިއެސް މެޕް ކުރެވޭނެ ނިޒާމަކަށް ބަދަލުކުރުން

- ޑިސްޕެޗް ސޮފްޓްވެއާ ރާއްޖޭގެ އެކި ކަންކޮޅުތަކުގައި ހުރި ޑިސްޕެޗް ސެންޓަރުތަކުން ވެސް އެ ހިދުމަތް ލިބޭނެ ގޮތަށް ހެދުން

- ރެސްޕޮންސް ޓައިމް އަވަސް ކުރުން (ހާދިސާއާ ހިސާބަށް ދެވޭނެ ވަގުތު އަަވަސް ކުރުން)

- ކޯލް ސެންޓަރުގައި ހިދުމަތްދޭ މުވައްޒަފުންގެ ކެޕޭސިޓީ އިތުރު ކުރުމަށް ތަމްރީނު ދިނުން

- 911 ކޯލް ނަގާ މީހާއަށް ދޭން ޖެހޭ ޓެކްނިކަލް ޓްރެއިނިންގް ދިނުން

އިހުސާން ވަނީ އާއްމުންނާ ގުޅިފައިވާ މިފަދަ މުހިންމު ހިދުމަތެއް، ނަހަމަ ގޮތުގައި ބޭނުން ނުކުރުމަށް ވެސް އިލްތިމާސް ކުރައްވައިފަ އެވެ.

ކުއްލި ހާލަތްތަކުގައި ގުޅުމަށް ގިނަ ގައުމުތަކުގައި ބޭނުންކުރާ އިމެޖެންސީ ނަމްބަރަކީ ވެސް 911 އެވެ.