ޓިނު ބިލްޑިންގުގެ އަލިފާނުގެ ހާދިސާގެ ތަހުގީގަށް މައުލޫމާތު ހިއްސާ ކުރަން އެދިއްޖެ

އޮފީސް ހަތަރު އިމާރާތެއްގައި ރޯވެ، ހިނގި އަލިފާނުގެ ބޮޑު ހާދިސާއާ ގުޅޭ އެއްވެސް މައުލޫމާތެއް ލިބިފައިވާ ނަމަ ހިއްސާ ކުރަން ފުލުހުން މިއަދު އެދިއްޖެ އެވެ.

މިދިޔަ ބުރާސްފަތި ދުވަހުގެ ހެނދުނު 6:30 ހާއިރު އެންމެ ފުރަތަމަ ރޯވީ ހައުސިން މިނިސްޓްރީގަ އެވެ. އޭގެ ފަހުން، ހުޅުގަނޑު ބޮޑުވަމުން ގޮސް، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އަދި އެ ތަނާ ޖެހިގެން ހުންނަ އެންވަޔަރަންމެންޓް މިނިސްޓްރީގައި ރޯވި އެވެ. ހަތަރު ގަޑިއިރު ފަހުން އަލިފާން ނިއްވާލިއިރު މުޅި ތަން ބޭނުން ނުކުރެވޭ ވަރަށް ވަނީ އަނދައި ހުލިވެފަ އެވެ.

ފުލުހުން މިއަދު ވަނީ އެ ހާދިސާގެ ތަހުގީގަށް އާއްމުންގެ އެހީއަށް އެދިފަ އެވެ. އެ ހާދިސާއާ ގުޅޭ އެއްވެސް މައުލޫމާތެއް އެނގޭ ނަމަ 9911099 އަށް ގުޅަން ފުލުހުން އެދެ އެވެ.

މިދިޔަ ހޮނިހިރު ދުވަހު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ކޮމިޝަނާ އޮފް ޕޮލިސް (ސީޕީ) އަލީ ޝުޖާއު ވަނީ އެ ހާދިސާ ހިނގި ގޮތުގެ ތަހުގީގަށް ރާއްޖެއިން ބޭރުގެ އެހީ ހޯދަން ނިންމާފައިވާ ކަމަށް ވިދާޅުވެފަ އެވެ.

ފުލުހުންގެ ފޮރެންސިކް ޓީމުތަކުން އެ ސަރަހައްދުގައި މަސައްކަތް ކުރަމުން އަންނައިރު ސީސީޓީވީ ފުޓޭޖްތައް ހޯދައި އެނަލައިޒް ކުރުމުގެ މަސައްކަތްތައްވެސް ކުރިއަށްދާ ކަމަށް ޝުޖާއު ވިދާޅުވި އެވެ.

އެގޮތުން އަލިފާނުގެ ހާދިސާގެ މަންޒަރު އެންމެ ފުރަތަމަ ފެނުނު މީހުންގެ ބަޔާން ނެގުމުގެ މަސައްކަތާއި އެވަގުތު އެތަނުގައި ތިބި މީހުންގެ އިތުރުން، އިތުރު މީހުންގެ ފަރާތުން ވެސް މައުލޫމާތު ހޯދުމަށް މަސައްކަތް ކުރަމުން އަންނަ ކަމަށް ސީޕީ ވިދާޅުވި އެވެ. އެ ހާދިސާއާ ގުޅޭ އިތުރު މައުލޫމާތެއް ލިބިފައިވާ ނަމަ ހިއްސާ ކުރަން ވެސް ސީޕީ ވަނީ އެދިވަޑައިގެންފަ އެވެ.

ޓިނު ބިލްޑިންގުގައި ރޯވެ އެ އިމާރާތާ ޖެހިގެން ހުންނަ ގްރީން ބިލްޑިންގަށް އަލިފާން ފެތުރުނީ އެމްއެންޑީއެފްގެ ފަޔާމަނުންގެ އިހުމާލުން ކަމަށް އެމްޑީޕީން ވަނީ ތުހުމަތު ކޮށް، އެ މައްސަލަ މަޖިލީހަށް ވެސް ހުށަހަޅައިފަ އެވެ.