ސީނިއާ ޕޮލިޓިކަލް ޑިރެކްޓަރުންނާއި ޑެޕިއުޓީ މިނިސްޓަރުން ހިމެނޭހެން ހައުސިން މިނިސްޓްރީގެ 10 މުވައްޒަފުން ސަސްޕެންޑް

ސީނިއާ ޕޮލިޓިކަލް ޑިރެކްޓަރުންނާއި ޑެޕިއުޓީ މިނިސްޓަރުން ހިމެނޭހެން ހައުސިން މިނިސްޓްރީގެ 10 މުވައްޒަފަކު މިއަދު ސަސްޕެންޑް ކޮށްފި އެވެ.

"މިހާރު" އަށް އެނގިފައިވާ ގޮތުގައި އެ މުވައްޒަފުން ސަސްޕެންޑް ކުރީ މިއަދު ހަވީރު އެވެ.

ނަމަވެސް އެ މީހުން ސަސްޕެންޑް ކުރީ ކޮން މައްސަލައެއްގައި ކަމެއް އަދި ނޭނގެ އެވެ.

ހައުސިން މިނިސްޓްރީގެ މުވައްޒަފުންތަކެއް ސަސްޕެންޑް ކޮށްފައި ވާއިރު، ބިންވެރިޔާ ސްކީމްގައި ނުހިމެނޭ ބަޔަކަށް އެޗްޑީސީން ގޯތިތަކެއް ދިން ކަމަށް ތުހުމަތުވާ މައްސަލައެއްގެ ތަހުގީގު ފުލުހުން ވަނީ ފަށައިފަ އެވެ. އެ ގޯތިތަކާ ގުޅޭ ގޮތުން އެޗްޑީސީ އާއި ހައުސިން މިނިސްޓްރީއާ ދެމެދު ސިޓީތަކެއް ބަދަލުކޮށްފައި ވެ އެވެ.

އެހެންވެއާ އެކު، ފުލުހުންގެ ތަހުގީގަށް މިހާރު ވަނީ ހައުސިން މިނިސްޓްރީން ބޭނުންވާ ލިޔުންތައް ވެސް ގެންގޮސްފައި ކަމަށް ފުލުހުން މިރޭ ބުންޏެވެ.

ހައުސިން މިނިސްޓްރީގައި މިދިޔަ ބުރާސްފަތި ދުވަހު ރޯވި އަލިފާންގަނޑާ އެކު، ސަލާމަތް ކުރެވުނީ މަދު ލިޔުންތަކެއް ކަމަށް މިނިސްޓަރު ޑރ. އަލީ ހައިދަރު ވަނީ ވިދާޅުވެފަ އެވެ. ފުލުހުން މިރޭ ބުނީ، ބިންވެރިޔާ ސްކީމްގައި ނުހިމެނޭ ބަޔަކަށް އެޗްޑީސީން ގޯތިތަކެއް ދިން ކަމަށް ތުހުމަތުވާ މައްސަލައިގެ ތަހުގީގަށް ހައުސިން މިނިސްޓްރީން ބޭނުންވާ ލިޔުންތައް މިހާތަނަށް ލިބެމުން އަންނަ ކަމަށެވެ.

މިދިޔަ ބުރާސްފަތި ދުވަހުގެ ހެނދުނު 6:30 ހާއިރު ހައުސިން މިނިސްޓްރީގައި ރޯވި އަލިފާންގަނޑު، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އަދި ޖެހިގެން ހުރި ގްރީން ބިލްޑިންގުގައި ހުންނަ އެންވަޔަރަންމެންޓް މިނިސްޓްރީ އަށް ފެތުރި ބޮޑު އަލިފާނުގެ ހާދިސާއަކަށް ބަދަލުވީ އެވެ. ހަތަރު ގަޑިއިރު ފަހުން އަލިފާން ނިއްވާލިއިރު މުޅި ތަން ބޭނުން ނުކުރެވޭ ވަރަށް ވަނީ އަނދައި ހުލިވެފަ އެވެ.

ހުޅުމާލެއިން ނުހައްގުން ގޯތިތަކެއް ދިން ކަމަށް ތުހުމަތުވާ މައްސަލައިގައި ފަށައިފައިވާ ޖިނާއީ ތަހުގީގާ ގުޅުވާ އެ އަލިފާނުގެ ހާދިސާއަކީ ހެކި ނައްތާލަން ބަޔަކު ގަސްދުގައި ކުރި ކަމެއް ކަމަށް ބުނެ ސޯޝަލް މީޑިއާގައި ދަނީ ތުހުމަތު ކުރަމުންނެވެ.

އެ އަލިފާނުގެ ހާދިސާ ހިނގީ ކިހިނެއްތޯ ބެލުމަށް ތަހުގީގެއް ފަށާފައިވާއިރު، ފުލުހުންގެ ފޮރެންސިކް ޓީމުތަކުން އެ ސަރަހައްދުގައި އަންނަނީ މަސައްކަތް ކުރަމުންނެވެ. ސީސީޓީވީ ފުޓޭޖްތައް ހޯދައި އެނަލައިޒް ކުރުމުގެ މަސައްކަތްތައްވެސް ކުރިއަށްދާ ކަމަށް ކޮމިޝަނާ އޮޕް ޕޮލިސް އަލީ ޝުޖާއު ވަނީ ވިދާޅުވެފަ އެވެ.

ޓިނު ބިލްޑިންގުގައި ރޯވެ އެ އިމާރާތާ ޖެހިގެން ހުންނަ ގްރީން ބިލްޑިންގަށް އަލިފާން ފެތުރުނީ އެމްއެންޑީއެފްގެ ފަޔާމަނުންގެ އިހުމާލުން ކަމަށް އެމްޑީޕީން ވަނީ ތުހުމަތު ކޮށް، އެ މައްސަލަ މަޖިލީހަށް ވެސް ހުށަހަޅައިފަ އެވެ.