ރޯދައިގެ ކުރިން ފްލެޓް ލިސްޓު އާންމުކުރާނަން: ރައީސް

ގެދޮރުވެރިޔާ ސްކީމުގެ ދަށުން ހުޅުމާލެ 2 ގައި އިމާރާތް ކުރަމުން އަންނަ 4،000 ފްލެޓަށް އުސޫލުގެ ތެރެއިން ޝަރުތު ހަމަވާ މީހުންގެ ލިސްޓު ކުރިއަށް އޮތް ރޯދަމަހުގެ ކުރިން ނުވަތަ މި އަހަރުގެ މާޗު މަހުގެ ކުރިން އާންމު ކުރާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ގއ. އާއި ގދ. އަތޮޅަށް ކުރެއްވި ރަސްމީ ދަތުރުފުޅު ނިންމަވައި ލެއްވުމުގެ ކުރިން ނޫސްވެރިންނާ ބައްދަލުކުރައްވައި ރައީސް ވިދާޅުވީ މިދިޔަ އަހަރެއްހާ ދުވަހުގެ ތެރޭގައި ވެސް މަސައްކަތްޕުޅު ކުރައްވާފައި ވަނީ އެ މަނިކުފާނު ވައުދުވެވަޑައިގަތް ގޮތަށް ފްލެޓާއި ގޯތި ދޫކުރުމަށް ކަމަށެވެ.

ރައީސް މުއިއްޒު ވިދާޅުވި ގޮތުގައި އެއީ އެއްވެސް ރައްޔިތަކަށް ދިން ގޯއްޗާއި ފްލެޓް އަތުނުލައި ހައްގުވެރިންނަށް ފްލެޓް ދިނުމަށް އެ މަނިކުފާނު ރިޔާސީ އިންތިހާބުގެ ކެމްޕެއިންގައި ވެވަޑައިގެންނެވި ވައުދެވެ.

"އަޅުގަނޑު އުންމީދު ކުރަނީ ވީހާ ވެސް އަވަހަކަށް އެ 4،000 ފްލެޓްގެ ކަންތައް ނިންމައި ހަވާލު ކުރެވޭނެ ކަމަށް. ރޯދައިގެ ކުރިއަށް [ފްލެޓް ލިސްޓް] އިރާދަކުރެއްވިއްޔާ އިއުލާން ކުރުމަށް ހަމަ މި މަސައްކަތް ކުރަމުންދަނީ. އަޅުގަނޑަށް ވަރަށް ބޮޑަށް ގަބޫލު ކުރެވޭނެ [ލިސްޓް އިއުލާން ކުރެވޭނެ] ކަމަށް،" ރައީސް ވިދާޅުވި އެވެ.

އެކަމަކު، ރައީސް ވިދާޅުވީ މަކަރާއި ހީލަތުން ފްލެޓް ހޯދުމަށް މަސައްކަތް ކުރި މީހުން އެ މަނިކުފާނު ވިދާޅުވާ ލިސްޓުގެ ތެރޭގައި ނުހިމެނޭނެ ކަމަށެވެ. އެހެންވެ، ލިޔެކިޔުން ބަދަލުކޮށްގެން ނުވަތަ ދޮގު މައުލޫމާތު ދީގެން ފްލެޓާއި ގޯތި ހޯދަން މަސައްކަތް ކުރި މީހުން ކެންސަލް ވާނެ ކަމަށް ވިދާޅުވި އެވެ.

"އަޅުގަނޑު ވައުދުވީ އެއްވެސް ރައްޔިތަކަށް ދިން ގޯއްޗެއް ފްލެޓެއް އަތެއް ނުލާނަމޭ. ނުގައިދުން، ދޮގު ހަދައިގެން މަކަރު ހަދައިގެން، ފޯޖު ކޮށްގެން މީހަކު ފްލެޓެއް، ގޯއްޗެއް ހޯދާފައި އޮތިއްޔާ އެ މީހަކު އަތުން ކެންސަލް ވާނެ،" "މިހާރު" ގެ ނޫސްވެރިއަކު ދެންނެވި ސުވާލެއްގައި ރައީސް މުއިއްޒު ވިދާޅުވި އެވެ.

އެ މަނިކުފާނު ވިދާޅުވީ ނުހައްގުން ފްލެޓް ދިން ކަމަށް ބުނާ މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގުކޮށް، މައްސަލަތަކެއް އުޅޭ ކަމަށް ފާހަގަކުރެވޭ މީހުންނަށް ވެސް ފްލެޓް ނުލިބޭނެ ކަމަށެވެ.

"އެ ކަހަލަ ކަންތައްތަކެއް ހިންގާފައި ހުރިއްޔާ، ނޫނިއްޔާ އޭސީސީން އެ ބެލި ބެލުމުގެ ތެރެއިން ގޯސްކޮށް ކަމެއް ކޮށްފައި ހުރިއްޔާ އެ ގޯސްކޮށް ކަމެއް ކޮށްފައި ހުރި މީހުން ފިޔަވައި އެހެން އެންމެންނަށް އަޅުގަނޑު ވައުދުވި ގޮތަށް ދޭންށޭ ބޭނުންވަނީ،" ރައީސް ވިދާޅުވި އެވެ.

ފްލެޓް ލިސްޓު ނެރުމަށް ސަރުކާރުން ވަނީ މިދިޔަ އަހަރު އެކި ތާރީހުތައް ދީފަ އެވެ. އެކަމަކު، އެ ތާރީހުތަކަށް ވެސް އެ ލިސްޓު އާންމު ނުކުރެވި އުޅެނިކޮށް، އެންމެ ފަހުން ނޮވެމްބަރު 16 ގައި ވަނީ ލިސްޓު އާންމުކުރުން މުއްދަތެއް ނެތް ގޮތަށް ފަސްކޮށްފަ އެވެ.

އެންމެ ފަހުން އެ މައްސަލާގައި މިނިސްޓްރީން ބުނީ ގެދޮރުވެރިޔާ ސްކީމުގެ ދަށުން ފްލެޓް ލިބޭ ކަމަށް އިއުލާން ކުރި ދާއިމީ ލިސްޓުގައި ކޮރަޕްޝަނަށް މަގުފަހިވާ ކަންތައްތަކެއް ހުރި ކަމަށް ތުހުމަތުކޮށް، އާންމު ފަރާތްތަކުން އޭސީސީ އަށް ހުށަހަޅާފައިވާ މައްސަލައާ ގުޅިގެން އެ ކޮމިޝަނުން މިނިސްޓްރީ އަށް އަންގާފައިވާ ކަންކަން ބެލުމުގެ މަސައްކަތް ކުރަމުން އަންނަ ކަމަށެވެ.

އެ ލިސްޓު މުރާޖައާ ކުރުމުގެ މަސައްކަތް ކުރަމުން އަންނަނީ ރައީސް މުއިއްޒުގެ ލަފާފުޅުގެ މަތިން އެކުލަވާލާފައިވާ ހައުސިން އެޑްވައިޒަރީ ކޮމިޓީ އާއި ހައުސިން ކޮންސަލްޓޭޓިވް ކޮމިޓީގެ ލަފާގެ މަތިން ކަމަށް މިނިސްޓްރީން ބުނެފައިވެ އެވެ.

އެ މަޝްރޫއުގެ ދަށުން އިމާރާތްކުރާ ފްލެޓްތަކަށް އެދި ހުށަހަޅާފައިވާ 20،697 އެޕްލިކޭޝަން ފޯމު ބެލުމުގައި ކަށަވަރު ކުރަންޖެހޭ ގިނަ ކަންކަން ހުރުމުން އެ މަސައްކަތްތައް ނިންމާލުމަށް އިތުރު މުއްދަތު ބޭނުންވާ ކަމަށް ބުނެފައިވެ އެވެ.

ގާތްގަނޑަކަށް މަސައްކަތް އެއްކޮށް މިހާރު ނިމިފައިވާ އެ ފްލެޓުތަކަށް ހުޅުވައިލި މުއްދަތުގައި ކުރިމަތިލި 20،697 މީހުންގެ ތެރެއިން 18،167 މީހުން ފްލެޓަށް ޝަރުތު ހަމަވާ ކަމަށް ކުރީގެ ސަރުކާރުން އޮތީ ބުނެފަ އެވެ.

ނަމަވެސް، ފްލެޓުތަކާ ގުޅިގެން އޭސީސީ އަށް ހުށަހެޅި ޝަކުވާތަކާ ހެދި ކުރި ދެ މަސް ދުވަހުގެ ތަހުގީގުން އެނގޭ ގޮތުގައި ފްލެޓް ލިބޭ ކަމަށް އާންމުކުރި ދާއިމީ ލިސްޓުގައިވާ 4،000 މީހުންގެ ތެރޭގައި ހިމެނޭ 60 ޕަސެންޓް މީހުންނަކީ މަކަރާއި އޮޅުވައިލުމުގެ ތެރެއިން ފްލެޓް ކަށަވަރުކުރި މީހުންނެވެ. އެއީ ހައްގުވެރިންނެއް ނޫން ކަމަށް އޭސީސީން ބުނެފައި ވެ އެވެ.