Roadha Mihaaru

ފަލަސްތީނު ރައްޔިތުންގެ ހިމާޔަތަށް ހަމާސް އިން ބާރުތައް ދޫކޮށްލަންޖެހޭ: ފަތަހް

ޣައްޒާގައި ފަލަސްތީނު ރައްޔިތުން ސަލާމަތުން ދެމިތިބުމަށްޓަކައި ހަމާސް ޖަމާއަތުން ބާރުތައް ދޫކޮށްލަން ޖެހޭ ކަމަށް ކަމަށް އެ ޖަމާއަތުގެ ސިޔާސީ ވާދަވެރި، ރައީސް މަހްމޫދު އައްބާސްގެ ފަތަހް ޖަމާއަތުން ބުނެފި އެވެ.

ހަމާސް އިން ބާރުތައް ދޫކޮށްލަންޖެހޭ: ފަތަހް

ޣައްޒާގައި ފަލަސްތީނު ރައްޔިތުން ސަލާމަތުން ދެމިތިބުމަށްޓަކައި ހަމާސް ޖަމާއަތުން ބާރުތައް ދޫކޮށްލަން ޖެހޭ ކަމަށް ކަމަށް އެ ޖަމާއަތުގެ ސިޔާސީ ވާދަވެރި، ރައީސް މަހްމޫދު އައްބާސްގެ ފަތަހް ޖަމާއަތުން ބުނެފި އެވެ.

"ހަމާސް އިން ޣައްޒާގެ ކުޑަކުދިންނާއި އަންހެނުންނާއި ފިރިހެނުންނަށް އޯގާތެރިކަން އިސްކުރަންޖެހޭ،" ޣައްޒާގައި ހުންނަވައިގެން އޭއެފްޕީއަށް ފޮނުއްވި މެސެޖެއްގައި ފަތަހް ޖަމާއަތުގެ ތަރުޖަމާނު މަންތަރު އަލް ހައިކް ވިދާޅުވި އެވެ.

އޭނާ ވަނީ ޣައްޒާގައި ހަމާސް އިން ވެރިކަންކުރަމުންދާ ނަމަ ހަނގުރާމައިގައި އެންމެ ފަހުން ޣައްޒާއިން ފަލަސްތީނު ރައްޔިތުން ނެތި ހިނގައިދާނެކަން ހަމާސް އިން ގަބޫލުކޮށް ހަމާސް "އެއްފަރާތަކަށް ޖެހެން" ގޮވާލައްވައިފަ އެވެ.

ހަމާސް އިން ޣައްޒާގެ ކޮންޓްރޯލް ހޯދައި ވެރިކަން ކުރަން ފެށީ ފަތަހް ޖަމާއަތުގެ ބާރުގެ ދަށުގައި އޮއްވައި އުފެދުނު ކުރިމަތިލުންތަކަށް ފަހު 2007 ވަނަ އަހަރު އެވެ. އޭގެ ފަހުން ސުލްހަވެރިކަމާ އެކު މި މައްސަލަ ހައްލުކުރަން ކުރި ހުރިހާ މަސައްކަތެއް ވަނީ ނާކާމިޔާބު ވެފަ އެވެ.

ހަމާސް އިން އޮކްޓޫބަރު 7، 2023 ގައި އިޒްރޭލަށް ދިން ހަމަލާއާ އެކު އިޒްރޭލުން ރައްދުގައި ދޭން ފެށި ހަމަލާތަކުގައި ޣައްޒާ މިހާރު ވަނީ އެއްކޮށް ބިމާ ހަމަވެފަ އެވެ. އަދި އަނެއްކާ އަލުން ހަމަލާތައް ފަށައި ގެއްލުން ދަނީ ބޮޑުވަމުންނެވެ.

"ހަނގުރާމައަށް ފަހު، ޣައްޒާގެ އިދާރީ ހިންގުމާ ގުޅޭ ކޮންމެ އެއްބަސްވުމެއް ބަލައިގަންނަން މި ތިބީ ތައްޔާރަށް. އެ ކަމުގައި ބައިވެރިވުމުގެ ޝައުގުވެރިކަމެއް ނެތް،" ހަމާސްގެ ތަރުޖަމާނު އަބްދުލް ލަތީފް އަލް ގާނޫ ހޮނިހިރު ދުވަހު ނެރުއްވި ބަޔާނެއްގައި ވިދާޅުވި އެވެ.

"އަޅުގަނޑުމެންނަށް މުހިންމީ ގައުމީ އެއްބައިވަންތަކަން،" ހަނގުރާމައަށްފަހު ޣައްޒާ ބެލެހެއްޓުމަށާއި އާރާސްތުކުރުމުގެ ކަންކަން ބެލެހެއްޓުމަށް ޕްރޮފެޝަނަލުންގެ މިނިވަން ކޮމެޓީއެއް އެކުލަވާލުމަށް މިސްރުން ހުށަހެޅި ހުށަހެޅުމަށް ހަމާސް އިން ތާއީދުކޮށްފައިވާކަން ހަނދާންކޮށްދެމުން އޭނާ ވިދާޅުވި އެވެ.

އައްބާސް ވަނީ، އޭނާ ގަބޫލުކުރައްވާ ގޮތަށް، ޣައްޒާގައި ވެރިކަން ކުރުމުގެ ގާނޫނީ ހަމައެކަނި ފަރާތް ކަމަށްވާ ފަލަސްތީން އޮތޯރިޓީއަށް އެ ކޮމިޓީން ރިޕޯޓް ކުރަން ޖެހޭނެ ކަމަށް ވިދާޅުވެފަ އެވެ. ނަމަވެސް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ސަރުކާރުން އެކަމަށް ދެކޮޅުހަދަ އެވެ.

ޣައްޒާގައި އަނެއްކާވެސް އިޒްރޭލުން ހަމަލާތައް ފެށީ، ހަމަލާ ބަދަލުކުރުން މެދުކަނޑާލަން ޖެނުއަރީ 19 ވަނަ ދުވަހު އަމަލުކުރަން ފެށި އެއްބަސްވުމުގެ ދެ ވަނަ މަރުހަލާ ކުރިއަށް ގެންދާނެ ގޮތަކާ މެދު އުފެދުނު ހިޔާލު ތަފާތުވުންތަކަށް ފަހުގަ އެވެ. މިދިޔަ އަންގާރަ ދުވަހު ފެށި ހަމަލާތަކުގައި މިހާތަނަށް ޣައްޒާއިން 600 އަށް ވުރެ ގިނަ މީހުން ޝަހީދުކޮށްލާފައި ވާއިރު މީގެ ތެރޭގައި ގިނައީ ކުޑަކުދިންނާއި އަންހެނުންނާއި އުމުރުން ދުވަސްވީ މީހުންނެވެ. އަދި އޮކްޓޫބަރު 7، 2023 އިން ފެށިގެން ޣައްޒާއިން ޝަހީދުވި މީހުންގެ އަދަދު މިހާރު ވަނީ ގާތްގަނޑަކަށް ބައި ލައްކައަށް އަރައިފަ އެވެ.